BARAKAT DAROOD SHAREEF
Sheik-ul Hadice Hazrat Maulana Zakariyyah rahmatoullahi ‘alayh dire dans ene de so banne récits ki li fine faire dans so livre “Fazail-e-Daroud”, "place cote Maulana Faizul-Hassan ti mort, pendant ene mois ça place-là fine reste senti bon. Maulana Qaasim fine dire ki ça c’est Barakat de Daroud Shareef parceki chaque jeudi soir Maulana Faizul-Hassan ti pé passe la nuit en envoyant Daroud lors le Prophète (s.a.w)."
Ene dimoune ki paraite pas conne respect banne ‘Oulama, fine faire ene commentaire banale lors ça. Li dire :
“Pas ena doute qui banne qui fine envoye plus beaucoup Daroud lors le prophète, et dans ene meilleur façon légale, c’étaient banne Swahaabah. Malgrés sa, nou pas fine trouve ene « Barakat » pareille. Cote zotte fine alle tire sa Barakat la zotte ? Eski quicaine apres banne Swahaabah fine envoye plus beaucoup Daroud lors le prophète et dans ene meilleur façon qui banla ?”
Nou pou remarqué ki ça dimoune-là pas fine amene aukene preuve depi dans Qour’aan ou depi dans hadice pou désapprouve ça récit-là. Li fine necque base so l’opinion lors ene supposition banale. Eski ena kit preuve dans Qour’aan ou dans hadice ki dire ene Barakat ki Sahaba pas fine gagné, ene l’autre pas capave gagne li ? Définitivement perna aukene preuve coumsa. Donc ceki ça dimoune-là fine dire, li pas basé lors aukene preuve dans shariah. Au contraire li contre boucou kitchose dans Qour’aan et dans hadice. Parceki si Hazrat Yunus (a.s) ti reste sain et sauf pendant 40 jours dans ventre poisson, pou ça vine vrai, eski li bizin arrivé avec Rassouloullah (s.a.w) aussi ? Si Hazrat Ibrahim (a.s.) pas ti brûlé dans du feu, eski li bizin arrivé avec Rassouloullah (s.a.w) aussi pou li vine vrai ? Hazrat Khubaib (r.a) ti gagne pou mange ene grappe raisin grosseur la tête ene dimoune pendant ki li ti emprisonné acote banne moushrik dans Makka et pourtant dans ça banne jours-là pas ti ena raisin aukene part dans Makkah. Eski kikene capave permette li dire “Cote sa zotte fine alle tire ça Barakat raisin-là zotte” pou la simple raison ki Hazrat Abou Bakr (r.a) ou Hazrat ‘Oumar (r.a) pas fine gagne ça l’honneur-là ?
Tout ça-là montré ki parfois Allah Ta’ala li accorde ene faveur particulier à ene tipti ki li pas accorde à ene grand. Selon ene anecdote ki Allaamah Bin Taimiyah fine raconté dans so “Al-Fourqaan”, banne l’ennemis ti jette Abou Mouslim Al-Khawlaani dans du feu. Quand banne-là vine guette li, zotte trouve li pé diboute pé faire namaz dans du feu. Eski nou gagne droit dire “Cote zotte fine alle tire ça” ziste acoze ki ça miracle-là pas fine arrive ça avec banne Sahaba-e-Kiraam (r.a) ?
A ce stade, nou pas capave empêche nou dire ki ça commentaire-là li vine de la part ene dimoune ki pas conne Deen ou bien ene ki fine apprane Deen mais ki pas conne so sujet bien.
Pli devant li continué so commentaire futile: "Chaque soir Maulana Fayzul-Hassan ti pé passe la nuit en envoyant Daroud lors le Prophète. Est-ce qui le Prophète fine enseigne nou pou passe la nuit chaque jeudi soir en envoyant Daroud". Li bien difficile pou croire ki ene commentaire pareille capave vine de la part ene ki conne Deen. Mais ça Dounia-là ena tout qualité échantillon. Li pas drôle si ene ki peut être capave ene B.A ou M.A dans Shariat, faire ene commentaire aussi futile. Pou reponne à ça objection-là, nou dimandé eski ena kit hadice ki empêche envoye Daroud dans jeudi soir ? Nou pé pose ene question pareille parceki banne ki autorise faire khutbah en créole, zotte ena l’habitude dimandé si eski ena kit hadice ki empêche faire khutbah en créole. Par cela zotte envie dire ki li permette parceki selon zotte perna narien dans hadice ki empêche ça. Si zotte sincère dans zotte preuve, alors d’après zotte propre preuve même, passe la nuit chaque jeudi soir dans envoye Daroud li bizin permette. Pas ziste ça. Mais nou ena ene hadice cote Rassouloullah (s.a.w) fine recommande faire boucou Daroud dans la nuit et dans la journée de Jum’ah. Allaamah Ibn Taimiyah fine rapporté dans so Al-Fourqaan ki Rassouloullah (s.a.w) fine dire :
"اكثروا على الصلاة يوم الجمعة وليلة الجمعة فان صلاتكم معروضة على"
“Envoye boucou Daroud lors moi jour Jum’ah et la nuit de Jum’ah parceki zotte Daroud pou présenté divant moi …”
D’après ça hadice-là, Rassouloullah (s.a.w) fine recommande pou faire boucou Daroud dans la nuit de Jum’ah. D’après Shariat, la nuit vine avant la journée. Donc la nuit de Jum’ah c’est ça la nuit ki commencé apartir Maghrib jour jeudi. Dans nou langage nou appelle li jeudi soir mais d’après Shariat c’est vendredi soir ou bien la nuit de Jum’ah. Donc, ki ou trouve pas bon si ene dimoune passe ça la nuit-là, c'est-à-dire la nuit de Jum’ah dans envoye Daroud lors Rassouloullah (s.a.w) acoze ki Rassouloullah (s.a.w) fine recommande ça pratique-là ?
Du feu l'enfer
Du feu l'enfer li 70 fois pli intense ki du feu dans dounia. Dimoune ki pou gagne ene punition pli faible et pli léger, c'est ene dimoune ki pou gagne pou mette ene soulier ki faire avec du feu. So la cervelle pou bouille avec so chaleur. Acoze ça nou bizin toujours dimane protection Allah Ta'ala contre so punition et contre du feu l'enfer.
L'enfer li ene manifestation de la colère Allah Ta'ala. Allah Ta'ala li en colère avec so serviteur ki pas obéir li. Donc nou bizin faire zeffort vive dans l'obéissance Allah Ta'ala. Si jamais nou arrivé faire kit erreur, faudré pas nou reste lors la même. Nou bizin repentir de ça erreur ki nou fine faire-là et dimane Allah Ta'ala pardon au pli vite possible.
Souvent dimoune cause ene qualité causé ki donne l'impression ki li pas peur punition Allah Ta'ala. Nou bizin faire bien attention parceki pas peur punition Allah Ta'ala c'est Kufr.
Hadice
"Ene juge li bizin pas faire jugement entre deux personnes quand li en colère." (Saheeh Boukhari)
Explication:
La colère li ene kitchose ki decontrôle ene dimoune. Ena des fois li dire certaine kitchose sans être conscient de gravité de ça causé-là. Dans ene l'état pareil, ene dimoune li arrivé gagne dégoût pou so madame ki li ti faire la terre le ciel ene seul pou marié avec li. Mais zordi dans ene moment de colère, li pas trouve li bon.
En réalité narien pas fine changé. C'est so colère ki fine change so façon voir les choses. C'est acoze ça ki Rassouloullah (s.a.w) fine empêche faire jugement dans ene l'état pareil.
Selon banne savants, par ça hadice-là, Rassouloullah (s.a.w) fine attire nou l'attention vers tout banne l'états ki décontrole ene dimoune couma la faim, la soif, sommeil, tristesse ou la joie extrême etc. Donc dans ça banne l'états-là aussi ene dimoune bizin pas faire aukene jugement.
En général ene dimoune bizin assuré ki li en état normal avant li prend ene décision. Si li senti li bouleversé, li capave laisse ene l'autre lors ki li ena confiance, prend décision pou li. Nou bizin adopté ça principe-là partout cote nou ena pou prend ene décision important. Surtout banne jeunes ki zotte en projet mariage, bizin toujours contacté banne dimounes ki pli expérimenté et pli Deendaar afin ki zotte capave faire ene bon choix par ene bon décision. Banne jeunesses, quand zotte content pou marié, zotte blié ki enbas fleur rose ena so piquant aussi. C'est-à-dire zotte blié ki zotte ena pou amene ene la vie mouvementé ki ena so haut et so bas. Zotte pensé ki tous le temps pou ena ça la vie acteur-actrice, joine dans snack, dans restaurant ou dans boite de nuit ou enbas tout coin la rue. Avant marié zotte gagne l'occasion necque guette ene seul face de la vie. Et par manque de l'expérience, l'esprit-là aussi pas assez ouvert ki permette zotte réalisé couma ça la vie après mariage-là pou été cotte chakene pou bizin prend so responsabilité et cote rôle playboy ou playgirl pou fermé.
Apart ça nou ena encore ene l'autre sujet. C'est le sujet de talaaq. Ici aussi nou faire face avec même qualité problème. Boucou dimoune, à ene moment donné, sous l'emprise de colère, zotte vine lors décision donne talaaq avec ene l'idée pou débarrassé de banne problèmes. Ena parmi là-dans ki capave ena raison dans ceki li fine faire. Mais ça li pas le cas en général. Dans la plupart de banne cas, dimoune-là mal prend décision parceki li nepli capave raisonné. C'est necque plutard ou pou tanne dire ki li ti mauvais en colère. C'est dans ene moment de colère ki li fine prononce tout les trois talaaq. Zotte amene ça prétexte-là zisse pou gagne ene chemin sorti. Mais nou bizin conné ki dimoune pas donne so madame talaaq dans contentement. Li donne li dans colère même. Mais pou perna aukene regret plutard, nou bizin toujours analyse les pours et les contres avec l'esprit posé avant nou tire ça mot talaaq-là ki nou pas pou capave re-avale li. Et pou être pli prudent, li pas de trop si nou contacté ene personne ki ena Deen et connaissance de Deen ki capave conseille nou.
SERVI LA MAIN DROITE
Nou servi la main droite pou mangé. Coumsa même nou bizin attrape avec la main droite quand nou boire. Selon ene hadice ki trouve dans Saheeh Mouslim, Rassouloullah (s.a.w) fine qualifié mangé-boire avec la main gauche de la façon ki shaitaan mangé-boire. Ene bon musulman li bizin toujours reste loin avec ceki shaitaan content et ceki shaitaan faire. Li pas coute nou narien dans servi la main droite pou mangé-boire. Mais ene simple ti négligence capave coûte nou bien cher. Apres ça aussi, ki plaisir ena dans faire couma shaitaan quand ena tout facilité suive le principe de nou bien-aimé Nabi (s.a.w) et profité énormement dans dounia et dans aakhirat sans faire la peine et sans perdi kitchose?
SERVI LA MAIN GAUCHE
Nous servi la main gauche pou nettoye nou dans toilette. Coumsa même nou servi la main gauche pou nettoye tout kitchose ki impure.
SERVI TOUS LES DEUX LA MAIN
Cote ene la main li pas sufi, là-bas capave servi tous les deux la main. Par exemple ene dimoune pas capave boire coco avec ene seul la main. Alors li gagne droit attrapé avec tous les deux la main. Coumsa même quand nou donne la main pou faire Mousafahah, li pli bon faire li avec tous les deux la main. C'est ene façon pli respectable.
QUAND LEVE DORMI
Ene dimoune pas conné cote-cote so la main fine vire-viré dans sommeil. Alors quand li lève dormi, li pli propre ki li lave so la main avant li mette so la main dans ene kitchose mangé ou bien dans ene kitchose boire.
La richesse réelle
"La richesse li pas vine apartir boucou fortune mais la (vrai) richesse c'est la richesse (ki trouve) dans le cœur." (Saheeh Boukhari)
Explication:
Ene dimoune li capave perna narien dans so poche mais li pas mort aussi pou l'argent. So le cœur li attaché avec Allah Ta'ala. Tout ceki li bizin, li dimane avec Allah Ta'ala. C'est ene personne vraiment indépendant et riche de par le cœur malgré ki li perna narien. Li pas galoupe derrière dounia. Li pas la guerre avec kikene acoze du bien. Li pas jaloux so camarade quand li trouve li pé gagné. Ene dimoune coumsa li senti li léger et libre acoze ki so le cœur pas attaché avec narien.
Par contre ene personne ki so le cœur attaché avec du bien, li pou reste toujours tracassé et bouleversé couma ene dernier dimoune pauvre malgré ki li possède ene quantité. Pli li ena, pli li senti li dans le besoin couma dire li fine gagne la grattelle. Pli li gratté, pli li envi gratté. C'est ene prisonnier ki pé viré-tourné couma ene dimoune libre. Li bien vrai ki quand ou content kikene plis ki Allah Ta'ala, ou pou amene ene la vie misérable même. Ou la caze, ou fortune, ou l'entourage narien pas capave donne ou le vrai confort ki ou bizin si ou le cœur li attaché avec ene l'autre kitchose apart Allah Ta'ala parceki Allah Ta'ala même li la source de la joie. Sans li, ou pou vine ene proie pou tout qualité bouleversement.
Question:
Eski gagne droit prend casse pou lire Qour'aan dans la caze dimoune?
Réponse:
Lire Qour'aan li ene ibaadat. D'après principe ene dimoune perna droit réclame narien pou ene ibaadat. Selon ene hadice, Rassouloullah r fine empêche servi Qour'aan comme ene gagne pain. Donc li pas permette prend casse pou lire Qour'aan dans la caze dimoune. Ça dimoune ki donné-là aussi pou coupable divant Allah Ta'ala. Quant à l'enseignement Qour'aan-e-Kareem, alors li permette employe dimoune lors la paye pou assume ça responsabilité-là parceki l'enseignement Qour'aan li ene kitchose de base dans Deen. Donc li ene nécessité. Zordi jour ena bien tigite dimoune ki pou disposé faire li volontairement à longue terme. Si nou pou attane banne volontaires même, nou banne zenfants pou reste sans conne Qour'aan. Alors acoze ça nécessité-là, banne 'Oulama fine trouve ene concession en ceki concerne l'enseignement Qour'aan. Longtemps banne ki ti engage zotte dans travail de Deen, ti pé gagne aide de coté Bait-ul-Maal ki ti ena dans l'état Islamique. Astere perna li. Mais travail-là bizin continué. Donc ça li vine lors responsabilité de chaque individu ki pé bénéficié avec ça service-là couma li possible ki ça aide-là li garanti en forme salaire de la part ene société, organisation ou bien ene institution. C'est-à-dire travail ki Bait-ul-Maal ti pé faire longtemps, bizin faire li à titre individuel ou collectif astere.
Coumsa même gagne droit employe kikene pou enseigne Deen, pou faire Imaam ou bien pou donne azaan parceki ca banne kitchose-là pou négligé si pas pou payé. Mais pas gagne droit payé pou lire Qour'aan.
Ene société idéale
Bizin ena la justice pou dimoune capave vive avec la paix. Sans la justice, chaque individu dans la société senti li menacé en ceki concerne so la vie, so di bien, so la famille et so dignité. Ene societé à cote dimoune bizin peur dimoune plis ki dimoune peur serpent scorpion etc, c'est ene société vraiment barbare malgré li paraite bien civilisé pou lizié dimoune.
Bizin ena ene seul qualité la loi pou tout dimoune. Pas capave ena ene la loi pou ti dimoune et ene l'autre la loi pou ene l'autre catégorie dimoune. Sans ça ene société pas capave être considéré couma ene société civilisé. Ene société acote la loi li applique lors seulement ti dimoune, c'est ene société injuste et barbare ki permette ene certaine catégorie de la population piétine droit ene l'autre catégorie.
Ene fois dans l'époque Rassouloullah (s.a.w), ene madame juive fine coquin. Madame-là ti sorti dans ene grand famille. Malgré ça Rassouloullah (s.a.w) fine donne l'ordre pou coupe so poignet. So la famille fine faire démarche pou ça pas arrivé. Mais Rassouloullah (s.a.w) pas fine cédé et fine dire:
"Par Allah! Si (par hasard) Fatimah aussi ti arrivé faire ça, mo ti pou coupe so la main. Acoze ça même banne Bani Israël fine périr parceki la loi ti pé appliqué lors banne ti dimoune seulement. Quand ene depi dans ene grand famille ti pé coquin, zotte ti pé laisse li."
Hazrat 'Oumar t aussi pas fine hésité pou fouette so propre garçon pou ene certaine délit ki li ti commette. Ça c'était vraiment ene société idéale ki ou sur dimoune pou vine chez ou pou donne ou, ou droit dans ou la caze couma ene zenfant gagne dilait directe dans la bouche. C'est ene société cotte chaque dimoune ena le souci assume so responsabilité envers le zot ki réclame so droit. C'est ene société ki ti basé principalement lors ene seul kitchose. Et ça c'est la crainte d'Allah Ta'ala. Ou bien la croyance ou la conviction ki li pou bizin ranne compte pou tout ceki li fine faire et li pou être jugé sans ki li capave par kit moyen influence jugement.
Qour'aan-e-Kareem
Qour'aan-e-Kareem c'est la parole Allah Ta'ala ki li fine révèle ça lors nou bien-aimé Nabi Hazrat Mouhammad (s.a.w).
Ça Qour'aan-là pas fine révélé dans ene seul coup. Li fine dessane tigite par tigite selon la nécessité pendant 23 bananés.
Dans Qour'aan-e-Kareem, Allah Ta'ala dire ki li fine révèle Qour'aan-e-Kareem dans la nuit de Qadr.
Ça signifié ki Allah Ta'ala fine dessane entier Qour'aan-e-Kareem depi dans "Al-Lawh Al-Mahfouz" à ene l'endroit ki appelle Bait-ul-Izzah dans la nuit de Qadr. Et depi là-bas li fine dessane tigite par tigite lors Nabi r pendant 23 bananés.
Qour'aan-e-Kareem ena 114 sourah. Pli long sourah c'est sourah Baqarah et sourah pli courte c'est sourah Al-Kawthar.
Qour'aan-e-Kareem li commence par sourah Al-Fatiha et li terminé par sourah An-Naas.
Cinq premiers versets de sourah Al-'Alaq (96) c'était la première révélation ki Nabi (s.a.w) fine recevoir quand li ti engagé comme d'habitude dans ibaadat et dans méditation dans ene la cave ki appelle Hira. Et le dernier verset ki fine révélé c'est le verset 281 de sourah Al-Baqarah.
Qour'aan-e-Kareemc'est le livre ki pli authentique. Allah Ta'ala fine donne la garantie ki li pou préserve ça livre-là ziska Qiyaamat. Personne pas pou capave ajouté ou retiré depi là-dans. Et effectivement fine gagne plis ki 1400 bananés. Ça livre-là li encore pareille couma li ti eté 1400 bananés auparavant.
Allah Ta'ala fine facilite apprane ça livre-là par cœur. Ou capave trouve banne tipti zenfants enbas l'age dix ans ki capave lire ça Qour'aan-là par cœur. Donc Qour'aan en li même li ene Mou'jizah (miracle) ki montré li ene révélation divine et ki le personnage ki fine gagne ça par révélation li ene véritable Nabi (prophète).
Qour'aan-e-Kareem li ene bienfait et ene bénédiction pou entier l'humanité. Selon ene hadice, Rassouloullah (s.a.w) fine dire ki Allah Ta'ala li donne dignité à ene peuple par ça Qour'aan-là couma li déshonore lezot acoze ça Qour'aan-là même. C'est-à-dire celui ki attrape li fort, li gagne le succès total. Par contre celui ki tourne le dos, li échoué et li dénigré li même.
Banne Sahaba-e-Kiraam fine dirige le monde quand zotte ti ena Qour'aan dans zotte la vie. Mais banne ki fine vine après, zotte fine perdi pouvoir ziska même dans zotte la caze aussi parecki zotte fine néglige Qour'aan.
Donc la réussite totale et complète trouve dans amene la vie d'après Qour'aan. C'est ça même kitchose ki nou manqué dans nou et c'est ça même kitchose ki lezot pé faire la tête li pied pou tire li depi dans nou. Acoze ça nou bizin promouvoir Qour'aan-e-Kareem.
Nou bizin accélère nou zeffort au niveau maktab et madrassah pou assure ene lecture et tilaawat correcte de Qour'aan-e-Kareem.
Quand ene dimoune li conne Qour'aan-e-Kareem correctement, li pou ena goût lire li tous les jours. Et ça pou servi li comme ene lumière dans dounia et comme ene provision dans aakhirat.
Et l'attachement ki pou développé dans li à travers tilaawat de tous les jours, pou garde li ferme lors Deen. Acoze ça même Nabi r fine dire:
"Meilleur parmi ou c'est celui ki apprane Qour'aan et li enseigne li"
C'est parceki apprane Qour'aan et enseigne li, c'est ene moyen pou faire Qour'aan prévaloir à tous niveau ki garanti le salut éternel.
L'amour pou Rassouloullah (s.a.w)et so sounnat
Ene personne ti ena 1000 Dinar en so possession. Li ti pé préparé pou li alle faire hajj. Quand tout fine fini paré et li pé alle faire hajj, en route li joine ene madame. Madame-là dire ki li ene descendant Nabi r et li dans ene grand difficulté. Ça personne-là fine dévide tout ceki li ti ena avec li et li fine donne ça madame-là. Acoze ça li pas fine capave alle faire hajj et li fine retourne so la caze.
Apres hajj, tous banne hajis ki joine li pé souhaite li Hajj Maqboul c'est-à-dire ene hajj ki fine accepté. Ça fine étonne li et li commence casse so la tête ki manière dimoune pé souhaite li ça quand tandis ki li pas fine alle faire hajj. A soir li fine rêve Rassouloullah (s.a.w) ki fine informe li ki Allah Ta'ala fine crée ene farishta dans (ça personne-là) so forme ki fine faire hajj dans so part. En plus de ça, Rassouloullah r fine annonce li ki ça farishta-là pou continué faire hajj de so coté ziska Qiyaamat acoze ki li fine aide ene descendant de Nabi (s.a.w).
(Raddul-Muhtaar)
Quand ça dimoune-là ti aide ça madame-là, li ti faire li acoze ça l'amitié ki li ti ena avec Rassouloullah (s.a.w). L'amitié pou Rassouloullah (s.a.w) li ene kitchose très très noble, exalté et beni. Donc ceki ça personne-là fine bénéficié, c'était acoze ça l'amitié ki li fine montré pou Nabi (s.a.w) à travers ça aide ki li fine accorde ça madame-là.
Suive Nabi (s.a.w) so sounnat et so principe li encore pli béni ki ça. Par ça, nou capave gagne ene l'idée ki quantité bénédiction dessane lors ene dimoune ki content Rassouloullah (s.a.w) et li suive so sounnat.
Malheureusement nou pas fine conne valeur ça l'amitié-là. Nou fine donne nou le cœur tout qualité malpropreté et nou senti nou fier dans suive zotte principe malpropre. Et pas fini! Nou fine qualifié suive Nabi (s.a.w) de l'extrémisme! Quand tandis ki suive Nabi (s.a.w) li faire Allah Ta'ala content nou et ça faire Allah Ta'ala dessane so bénédiction lors nou. Lezot capave pas conne ça ou bien zotte capave pas croire là-dans. Mais nou, nou bizin conné ki c'est Nabi (s.a.w) ki bizin nou pli grand bien-aimé. Et ça, nou pas pou prouve li par necque dire avec la bouche. Nou bizin montré li par suive so sounnat dans entier nou la vie. Ena ene grand lumière dans Nabi (s.a.w) so sounnat. Celui ki pou mette ca en pratique, li pou illumine so la vie dans dounia, dans Qabar et dans Aakhirat. Et ça même li ene pli grand preuve ki li content Nabi (s.a.w).
اللهم ارزقنا حبك وحب نبيك محمد صلى الله عليه وسلم
O Allah! Accorde moi to l'amitié et l'amitié de to Nabi Mouhammad (s.a.w).
Redacteur en chef: Moufti Mouhammad Raffick Meerun
Email: jamiat2009@gmail.com
