Al-Jamiat V.2 No 15

CAUSE VRAI !

Cause vrai ! Ou pli chagrin quand ou manque ene namaz ou bien quand ou perdi ene somme d’argent ? Ça li depanne eski ou ene dimoune dans Deen ou bien ou content dounia. Si ou content ou Deen, ou pou pli chagrin quand ou arrivé manque ene namaz. Nou pas dire ki ou pas pou chagrin quand ou perdi ene somme d’argent ou ene kitchose mondaine. Li tout à fait normal ki ene dimoune li senti li affecté quand li perdi kitchose. Mais ene dimoune dans Deen li éprouve la chagrin ene ti pé plis quand li perdi so namaz.

Cause vrai ! Eski ou madame li habille pou ou, ou bien pou lizié dimoune ? Si li vrai ki li pas habille pou lezot, abé ki faire li dévide so l’armoire quand li sorti ? Et dans la caze ena des fois ou capave pas reconnaite li !

Ene madame li gagne droit habille chic. Mais li bizin faire ça pou so missié dans so la caze. Li pas gagne droit expose so charme et so beauté ki Allah Ta’ala fine accorde li devant banne zommes étrangers. Li ene péché bien grave. Ene joli dimoune aussi quand li commette ene péché, li paraite bien vilain pou banne anges. Quand Allah Ta’ala fine donne nou beauté, laisse nou garde li bien pou nou paraite joli physiquement et aussi spirituellement.

Cause vrai ! Ene visage avec la barbe d'après sounnat li pli ressemblé avec le visage de Rassouloullah SAW ou bien ene visage bien rasé ? Mille ou justifié mais endans ou, ou bizin reconnaite ki rase la barbe jamais ti ene pratique islamique. Si ou pencore ena la volonté faire li, pas critique banne ki ena li ni dire ki perna narien dans perna li. Nou espéré ki ene jour ou pou réussi garde li si malgré ou appréciation, ou pas pé réussi garde li pou kit raison.

Cause vrai ! Eski Hazrat ‘Oumar RA pas conné ki veut dire bid’ah pli bien ki ou ? Ou pas capave pretanne le contraire. Bé ki faire ene pratique ki Hazrat ‘Oumar RA fine approuvé, ou qualifié li de bid'ah? Hazrat ‘Oumar RA fine approuve 20 rakaat taraawih mais ou qualifié li de bid'ah. Hazrat ‘Oumar RA compte trois talaaq ki fine donné ene seul coup comme trois talaaq. Et ou mathématique dire li compte ene seul. Ou pas capave déclare conne Deen et comprend hadice de Nabi SAW pli bien ki Hazrat ‘Oumar RA. Cause vrai! Vrai, pas vrai!

Cause vrai! Li pas pli bon faire khutbah jum'ah en arabe? Tout banané l'oummah fine pratique coumsa même. Si ou perna l'esprit desordeur, bé ki faire ou fine commence faire li en créole ki fine bouleverse l'oummah? Ki profit ou fine gagné dans faire ça apart divise musulmans? Ceki ti pé faire Eid ene jour avant tout dimoune, fine reconnaite so l'erreur. Nou salué so courage ki li fine aligne li avec l'oummah. Faudré pas attane quand position aggravé pou rétracté. Ki Allah Ta'ala donne nou tawfeeq reconnaite nou erreur!

Ene principe banale

Souvent dimoune ena tendance justifié ene façon faire ibaadat avec prétexte ki perna narien ki empêche faire ça ibaadat-là dans ça façon-là. Par exemple faire deuxième doah après banne namaz sounnat et nafil. Normalement doah c'est ene kitchose ki très recommandé. Là-dans perna aukene restriction tanque ene dimoune faire li à titre individuel. Mais quand dimoune faire li avec jamaate, là li prend ene l'autre tournure. Surtout quand dimoune commence faire li régulièrement avec jamaate, là li ena ene l'autre l'aspect.

Dimoune ki faire li, li dire ki perna narien dans faire li parceki perna narien dans shariat ki empêche faire li. Mais eski c'est ene bon principe ki capave servi pou soutenir ene pratique? En ceki concerne banne formes de ibaadat, ça principe-là li pas valable. Nou bizin adopté ça même forme de ibaadat ki banne salaf (Sahaba-e-Kiraam, Tabeines et Taba Tabeines) fine adopté. Banne forme de ibaadat ki banne salaf pas fine pratiqué, alors ça li pas d'après shariah. Quand banne salaf pas fine pratique ene forme de ibaadat, alors ça même sufi pou dire ki ça li pas bon. Li pas correcte ni li nécessaire dimane ene preuve spécifique cote zotte fine dire ki ça forme de ibaadat-là li pas bon. Banne salaf pas fine pratique deuxième doah après sounnat et nafil avec jamaate. Donc ça façon faire doah-là li pas d'après shariah. Si li ti d'après shariah, zotte ti bizin faire li.

Coumsa même ene banne ki autorise faire khutbah Jum'ah en créole aussi amène ene thèse pareil. C'est-à-dire d'après zotte perna narien dans shariah ki dire ki pas gagne droit faire li dans ene l'autre langue. Mais couma fine expliqué, ça façon raisonné-là li pas ene bon façon parceki le fait ki salaf pas fine faire li dans ça façon-là malgré ki ti ena la nécessité pou faire li dans ene l'autre langue, li sufi pou montré ki li pas ene bon façon faire khutbah. Pas nécessaire ena ene preuve spécifique ki empêche ça pratique-là.

Donc bizin pratique ene ibaadat d'après structure ki banne salaf fine pratiqué. Pratique li autrement et différemment li pou ene facon indésirable.

L’indépendance

Depi plis ki ene quart siècle chaque l’année nou pays pé fête l’indépendance. Mais ki ça l’indépendance ki nou pays pé fêté depi tout banané ? Nou pays ti dans la main ene l’autre. Lezot ti pé décide pou nou. Nou fine réussi tire nou pays depi dans ça la main-là et nou fine ena l’honneur prend nou propre décision pou nou propre l’avenir. Ça nou fine appelle li l’indépendance nou pays ki nou fêté chaque l’année.

Nou pays fine gagne l’indépendance mais nou même, nou encore pé subir l’esclavage parceki nou pencore libère nou de banne virus couma l’égoïsme, jalousie, rancune, l’orgueil, vantardise, l’injustice etc. Nou encore sous l’emprise de shaitaan. Nou pencore conne servi nou prochain. Li vrai ki nou pencore conne vive couma dimoune avec dimoune. Ça amene nou pou dire ki l’indépendance ki nou fine gagné c’est necque ene parti l’indépendance. Li pas l’indépendance complète. Ena encore boucou pou faire pou ki ça l’indépendance-là vine ene l’indépendance complète. Quand même, nou satisfait avec ceki nou ena. Mais sans ki ça empêche nou alle de l’avant et faire maximum zeffort pou perfectionne ceki nou ena.

Nou pou perfectionne ça par libère nou et débarrasse nou de banne maladies ki trouve dans nou l’intérieur ki fine détruire l’humanité de génération en génération. C’est ene defi ki nou banne dirigeants bizin relevé si vraiment zotte ena la volonté pou donne ça mot l’indépendance-là so vrai dimension et so valeur réelle. Sinon nou pays pou toujours ene joli cadavre avec ene endans totalement carriaté.

La Reconnaissance

Si kikene fine faire ou kit faveur, eski ou pou osé faire quelque chose ou agir avec li dans certaine manière ki pou déplaire li ? Li tout à fait normal et naturel ki ene dimoune bizin ena reconnaissance pou ene kikene ki fine traite li bien. De par so nature même ene dimoune li éprouve l’amitié pou kikene ki fine soulage li dans so banne moments difficile et fine faire li du bien. Donc ene dimoune ki encore pé raisonné, jamais capave perna reconnaissance pou ene ki fine ranne li service. Agir autrement li anormal, inhumain et pas naturel. C’est ene sentiment ki ene zanimau couma li chien aussi li éprouvé envers kikene ki fine mette ene ti boute lezos divant li. Ça veut dire ki ene être humain bizin ena ça qualité-là pli bien dans li.

Celui ki nou bizin pli reconnaissant envers li c’est Allah Ta’ala. C’est li même ki fine crée nou et fine accorde nou tout ceki nou bizin pou nou capave vive. Tous banne faveurs ki ena lors nou c’est so bonté et so faveur.

La santé, l’emploi, l’environnement favorable, l’harmonie et le bien-être en général, tout ça-là c’est faveur Allah Ta’ala. Allah Ta’ala dire dans Qour’aan-e-Kareem :

“Et tout ceki ena lors ou comme faveur li de coté Allah …” (S16/V53)

Perna aukene faveur ki sorti quelque part. ni ena kit possibilité ki li vine de quelque part apart Allah Ta’ala parceki li dans la main Allah Ta’ala même. Si tout ceki nou ena lors nou li faveur Allah Ta’ala et ça faveur-là li continué reste lors nou 24 lors 24, alors ki quantité reconnaissant nou bizin été envers Allah Ta’ala ? Ça pas capave estimé ni kikene capave faire li. Mais Allah Ta’ala de par so grâce et so bonté fine dimane nou pou montré nou reconnaissant envers li d’après nou capacité.

Nou montré nou reconnaissance envers Allah Ta’ala par amene nou la vie d’après ceki li oulé et par reste dans so l’obéissance. Pli grand reconnaissant c’est celui ki pli obéissant. Donc pli ou désobéir, pli ou vine ingrat. Finalement le plus ingrat c’est celui ki refuse accepté l’existence Allah Ta’ala. C’est banne ingrats ki pas reconnaite faveur Allah Ta’ala et ki refuse accepté so l’existence même ki Allah Ta’ala qualifié zotte de pli égaré ki banne zanimau.

LA POLITIQUE

Tanne dire ki bizin ene expert dans conne cause menti pou capave être ene politicien. Si ça vrai, veut dire ki ene bon musulman pas capave exerce la politique ni li capave être ene bon politicien. Autant ki nou conné, aukene religion pas autorise cause menti. Ça signifié ki ene homme de foi pas capave être ene bon politicien.

Et pourtant la politique pé être exercé partout à tout niveau. Eski ça li ene façon pou dire ki le monde li sous l’emprise de banne menteurs et de mensonge ? Tout ça-là pé arrivé acoze dimoune pé mal servi li. Sinon la politique dans so vrai sens, li signifié l’art de gouverner. Li ene kitchose indispensable dans la société. Bizin ena kikene ki épaule ça responsabilité-là pou ena la justice sociale et pou ki la société pas vive dans l’anarchie. Li ene kitchose très noble et louable pou celui ki capave faire li dans ene façon correct et convenable. Dans ene hadice ki trouve dans Saheeh Boukhari, Rassouloullah (s.a.w) dire :

"Ena sept catégories de personne ki Allah Ta’ala pou mette zotte enbas so l’ombrage ça jour ki pas pou ena aukene l’ombrage apart so l’ombrage : Premièrement ene chef (d’état) ki ‘aadil (juste) … "

Pou être ene dirigeant juste, li dimane trois kitchoses :

1. Le savoir faire,
2. L’honnêteté,
3. La volonté et le courage.
Le savoir faire pou guide li dans ceki li bizin faire. L’honnêteté pou empêche li agir contre ceki li conné. La volonté et le courage pou faire li applique ceki li conné.

Par exemple ene dirigeant li conné ki l’existence casino li cancéreux et néfaste pou la santé ene société. So l’honnête empêche li déclare le contraire. Et li ena le courage empêche casino opéré, même si ça ranne li impopulaire. C’est ene dirigeant pareil ki ene dirigeant juste et ki capave faire kitchose pou dresse la société. Par contre si ene dirigeant li marche d’après tendance le peuple, alors li pas pou capave faire narien apart soutire le peuple dans toute sorte bêtise. Li pou légalise homosexualité et banir la polygamie. Li pou autorise dimoune marche indécent et empêche madame mette hijaab. Tout ça-là ziste pou li capave reste au pouvoir. Zordi jour dimoune pé guette so l'intérêt avant tout. Si li trouve so l'intérêt dans donne ene kitchose ki li ti rassé hier et vice-versa, alors li pou faire li nez-nez ouvert. C'est ça même ki faire vice du hier vine vertu d'aujourd'hui et vice-versa. Ça veut dire ki perna aukene principe. Le but principal c'est pou reste à la tête du pays et au pouvoir. Ça but-là li autorise tout et légalise tout.
La politique fine vine analogue à tout ceki insignifiant. Acoze ça banne dimoune prend le terme la politique dans le sens insignifiant quand zotte dire "Eh pas vine faire politique ici."

Quantité et qualité

"Pas bizin guette quantité, bizin guette qualité."
Ça causé-là li ene causé ki ena boucou sagesse et li appliqué aussi dan boucou circonstance. Mais malgré ça, pas capave généralise li. Ça li appliqué quand ene coté ena boucou mauvais et l'autre coté ena tigite mais seulement li bon. Par exemple ene dimoune ena ene quantité zenfants mais zotte tous mauvais et ene l'autre dimoune ena ene seul zenfant mais li bien bon. Dans ene situation pareil nou dire: "Vaut mieux ene seul bon zenfant ki ou ena ene tas ki pas bon". Ena des fois, dans ene situation pareil ou tanne dimoune dire: "Vaut mieux perna même zenfant ki ena zenfant mauvais coumsa."

Couma ça aussi li possible ki ene dimoune ena ene quantité zenfants et zotte tous bon. Et ene l'autre ena ene seul zenfant mais li bien mauvais. Définitivement ça premier dimoune-là li dans ene meilleur position ki ça deuxième-là. Dans ça cas-là nou pas capave donne tigite préférence lors boucou parceki l'essentiel c'est ki ene kitchose bizin bon. Ene bon kitchose li reste toujours bon. Ene bon kitchose ki tigite li pli bon ki ene kitchose ki pas bon quand même li bien boucou. Ene bon kitchose ki li en grande quantité li pou pli bon encore. Donc comparaison-là li pas entre boucou et tigite, li entre bon et mauvais. Ceki mauvais-là li pou toujours inférieur à ceki bon quand même li en minorité. Donc quand ene ti minorité pé pratique le sounnah de Nabi SAW, ça li pli bon ki la grande majorité ki noyé dans bid'ah. Astere si ene kitchose fine pratiqué par la majorité de banne Sahaba-e-Kiraam, banne Tabeines et banne Taba-Tabeines, li pou encore pli bon. Ene pratique ki pou oppose ça, li pou être qualifié de ene pratique isolé, ene bid'ah et ene kitchose ki mérite d'être abandonné. Ici nou pas gagne droit amene ça thèse ki bizin guette qualité, pas quantité. Parceki si nou servi ça principe-là ici, nou pou contredire ceki Rassouloullah SAW fine enseigne nou. D'après hadice, nou bizin suive As-Sawaad Al-A'zam ki signifié la grande majorité. D'après ça même hadice, ene dimoune ki isole li de As-Sawaad Al-A'zam pou alle dans l'enfer.

Donc nou ena plusieurs principes devant nou:

1. Ene kitchose ki bon et li en grande quantité, li pli bon ki ene bon kitchose ki tigite ou bien ene mauvais kitchose ki boucou.

2. Ene mauvais kitchose ki en grande quantité li pli mauvais ki ene mauvais kitchose ki tigite.

3. Ene kitchose ki bon et ki tigite li pli bon ki ene mauvais kitchose quand même li boucou.

Quand nou dire As-Sawaad Al-A'zam, ça li vine d'après le principe numéro ene. C'est-à-dire banne sujet couma trois talaaq compte trois talaaq même, Khutbah Jum'ah bizin en arabe même etc. C'est banne sujet ki fine adopté par As-Sawaad Al-A'zam. Donc li pou ena priorité et préférence à tout niveau. Pas accepté ça, c'est ene façon pou isole ou de As-Sawaad Al-A'zam ki li ene kitchose bien grave.

Salaat-ud-Doha

Salaat-ud-Doha c'est ene namaz nafil ki varié entre deux à huit rakaat. D'après certaine hadice li dire ziska 12 rakaat aussi. Ça namaz-là faire dans gramatin. Le mot doha même signifié ça l'intervalle ki trouve entre levé du soleil ziska avant istiwaa. C'est-à-dire avant ki soleil complète so la moitié trajet.

Donc l'heure salaat-ud-doha li commencé à partir ki soleil fini levé et li resté ziska avant soleil complète so la moitié trajet. Mais so l'heure pli recommandé c'est quand soleil fini complète so ene quart trajet. A noté ki la moitié trajet ou ene quart trajet li par rapport à levé du soleil et couché du soleil.

Ene fois Rassouloullah SAW fine trouve banne Sahaba-e-Kiraam pé faire ça namaz-là ziste après levé du soleil. Lors ça li fine dire: "Salaat-ul-Awwaabeen c'est l'heure ki la patte banne ti chameau commence brûlé". Ça l'heure ki banne ti chameau commence gagne difficulté pou marché acoze chaleur, c'est ça l'heure quand soleil fine monte assez haute dans le ciel. Ça li arrive apeu près quand soleil fini complète so ene quart trajet. Donc d'après ça hadice-là, li permette pou faire ça namaz-là pli bonheur aussi apartir ki soleil fini levé. Mais so pli bon l'heure ou bien banne awwaabeen ou bien banne ki dévoué zotte l'heure faire ça namaz-là, c'est ça l'heure quand banne ti chameau commence gagne difficulté pou marché acoze li commence faire chaud et la terre fini bien chauffé.

Dans ça l'heure-là, normalement dimoune intéresse pou reposé. Malgré ça, quand ene dimoune li consacré ça l'heure-là dans faire namaz au lieu reposé, dans ene certaine façon li prouve so sincérité et so dévotion. Par ça rapport-là, ça namaz ki faire dans ça l'heure-là fine qualifié de ene namaz de banne awwaabeen (dévoués). C'est-à-dire ene namaz ki banne ki bien dévoué accomplir.

Ça namaz-là li dimane ene ti pé sacrifice enplis. Et ça c'est necque banne ki dévoué même capave ena li. Acoze ça, Nabi SAW dire:

"Personne apart ene ki awwaab (dévoué) même ki capave observe salaat-ud-doha régulièrement parceki ça c'est namaz ene ki awwaab (dévoué).

Couma ene dimoune li prouve so dévotion et so sincérité par engage ça l'heure-là dans namaz, coumsa même li exprime ça par consacré li dans namaz nafil pendant l'intervalle entre Maghrib et Esha. Par ça rapport-là li correct pou appelle ça namaz-là aussi salaat-ul-Awwaabeen couma ça fine être qualifié par Hazrat Abdullah Bin Abbaas RA et Hazrat Abdullah Bin 'Oumar RA. Li vrai ki salaat-ud-doha fine être qualifié de salaat-ul-Awwaabeen mais ça pas empêche ene l'autre namaz appelle par ça nom-là parceki fine appelle li par ça nom-là par rapport à l'état d'esprit ça banne dimoune ki accomplir ça namaz-là. Ça l'état d'esprit-là li capave existé dans plusieurs circonstances à l'occasion différent namaz. Li bon conné ki jamais salaat-ul-Awwaabeen ti ene nom propre pou salaat-ud-doha en sorte ki ça pas capave appliqué pou ene l'autre namaz.
Li pareil couma Rassouloullah SAW fine qualifié ene certaine façon faire namaz de salaat-ul-Mounaafiq. Couma nou conné ki ça nom-là li pas ene nom propre de kit namaz. C'est necque par rapport à certaine mauvaise façon ki trouve dans le mouswalli ki Rassouloullah SAW fine appelle ça namaz ki li faire-là salaat-ul-Mounaafiq.

Acoze ça même banne 'Oulama pas fine trouve aukene contradiction dans appelle namaz nafil après maghrib comme salaat-ul-Awwaabeen. Donc appelle ça namaz-là salaat-ul-Awwaabeen li pas ene fausse conception. Au contraire refuse accepté li ainsi li basé lors ene mal compréhension de hadice.

Hadice

"Ene personne ki donne depeine dans occupe banne veuves et banne dimoune pauvre, li couma dire ene dimoune ki pé combatte dans chemin Allah ou bien couma ene dimoune ki reste engagé dans Ibaadat pendant la nuit et ki garde roza dans la journée" (Sahih Boukhari)
Explication: Ena boucou récompense dans faire Ibaadat pendant la nuit. Coumsa même garde roza li ene kichose de grande mérite. Si ene personne pas gagne le temps ou bien li incapable faire tout ça-là acoze ki li pé donne so le temps dans occupe banne pauvres, alors d'après ça hadice-là, so banne z'effort pour être considéré couma banne zeffort ki ene dimoune donné dans faire Ibaadat dans la nuit et dans garde roza ou bien ene kikene ki faire jihad dans chemin Allah Ta'ala.
Normalement ene dimoune bizin faire boucou sacrifice et boucou zeffort pou faire banne Ibaadat pareil ki tous déjà conné. Le hadice fine compare zeffort ene ki occupe bannes veuves et bannes pauvres avec zeffort ça banne Ibaadat difficile-là pou donne ene l'idée de la valeur et mérite de ça travail ki normalement dimoune ena tendance pas considère li couma ene grand travail.

Sounnat avant namaz Zohar

Avant faraz de namaz zohar ena 2 rakaat ou bien 4 rakaat sounnat? Ena hadice ki dire Rassouloullah SAW ti pé faire 2 rakaat couma ena hadice ki dire ki Rassouloullah SAW ti pé faire 4 rakaat. Mais pli boucou hadice faire mention de 4 rakaat. Et la plupart du temps, Rassouloullah SAW ti pé faire 4 rakaat. Acoze ça, selon Imaam Tirmizi, la majorité de Sahaba-e-Kiraam et de Tabeines ti préfère faire 4 rakaat avant faraz namaz zohar.

...............................................................................

Redacteur en chef: Moufti Mouhammad Raffick Meerun
Email: jamiat2009@gmail.com

Al-Jamiat V 2 No 14

DU COEUR A COEUR

Mo conné to fine fecque pose lipied dans ça l’étape ki appelle jeunesse. Quant à moi mo conné mo pas fine gère mo le temps couma bizin. Zordi quand mo oulé faire ceki mo fine raté dans mo jeunesse, mo trouvé soit mo perna le temps ou bien mo la santé pas permette moi. Mo jeunesse ! Mo pas oulé ki arrive toi ceki fine arrive moi. Conne gère to le temps et to courage parceki to pas pou regagne li encore.

Pas plis ki hier, to fine commence apprane Deen, disons to conne anglais, français et peut-être impé arabe casse-cassé. Mais avec ça ti connaissance absolument narien du tout-là, to déclare comprend Qour’aan et hadice pli bien ki banne grand ‘Oulama auparavant. To pretanne capave comprend Deen par to même quand tandis ki banne grand grand ‘Oulama, banne savants de tafseer et banne grand grand savants dans hadice, zotte tous fine bizin suive kit Imaam pou suive Deen. Ça la passe ki to pé rode mette to pirogue là-dans, fine avale banne grand grand navire. Si to sappé, ça pou ene grand miracle. Mais miracle pas tous dimoune ki gagné. To risqué perdi to Deen si to pas faire attention.

*** Mo comprend to encore jeune. To manque l’expérience. Acoze ça ena kitchose to bien oulé faire li correcte, mais li pas vine correcte. Ça li arrivé acoze ki to pas conne certaine principe. Et l’autre coté, banne ki to gagne zaffaire avec zotte, zotte aussi zotte jeune, ducal et banne ki perna l’expérience. Laisse mo dire toi ene principe ki pou servi toi tout le temps. Si to oulé suive to Deen couma bizin, guette ceki to banne grand fine suive. Banne grand c’est banne ki ena la connaissance de Deen et zotte ena la volonté pou mette li en pratique. Ça qualité-là, li trouve pli bien dans banne Sahaba-e-Kiraam. Alors guette ceki banne Sahaba-e-Kiraam fine pratiqué et aussi ceki zotte z’élèves c’est-à-dire banne Tabeines fine pratiqué.

Quand tous banne Sahaba-e-Kiraam fine pratique ene kitchose dans ene facon et to trouve ene hadice dans ene l’autre façon, alors suive ceki banne Sahaba-e-Kiraam fine pratiqué parceki banne-là conne porté de chaque hadice et so application correcte pli bien ki toi. Si to dire hadice-hadice et lors ça prétexte-là to quitte ceki banne Sahaba-e-Kiraam fine pratiqué, to pou arrivé commette ene erreur capital parceki to pou démolir ene pratique établie et bien structuré lors la base ene simple hadice ki to pas capave pretanne conne so porté pli bien ki banne Sahaba-e-Kiraam. To bizin conné ki ene hadice de ene tel genre li ene hadice isolé et étrange, quand même li paraite authentique. Ceki nou bizin suive dans ça contexte-là, c’est ceki la grande majorite de banne Sahaba-e-Kiraam fine pratiqué. Par exemple banne Sahaba-e-Kiraam fine pratique 20 rakaats taraweeh. Coumsa meme banne Sahaba-e-kiraam fine considère trois talaaq ki donné ene seul coup couma trois talaaq même. Banne Sahaba-e-Kiraam fine faire Khutbah Jum’ah dans langue arabe. Nou bizin suive ceki banne-là fine suive.

Eski to trouve bon ki to quitte ceki banne Sahaba-e-Kiraam fine pratiqué lors parole banne marchands ki pé mette désordre et ki pé crée confusion et dissension dans la communauté par change banne pratique ki fine établi depi tout le temps ?

Conné ki dans attrape ça quatre mazhab-là ena très grand l’avantage et dans tourne le dos avec zotte, ena ene grand désordre. (Iqd-ul-Jeed par Shah Waliyullah Dehlavi)

ERRATA

Le dernier numéro Al-Jamiat en réalité c’est Vol 2 No 13 au lieu de Vol 2 No 14. Li bon ou faire correction nécessaire pou facilite prend référence. Jazaak-Allah !

Hadice :

“Ene madame ki en état haiz et ene personne ki en état janaabat bizin pas lire narien comme Qour’aan.” (Tirmizi)

Explication :

Ene personne bizin ena roussal lors li pou li gagne droit lire Qour’aan. Si li perna roussal acoze ki li dans so haiz, ou bien nifaas ou bien li en état janaabat, alors li pas gagne droit lire Qour’aan. Dans ene l’état pareil, lire par cœur sans touche Qour’aan aussi, pas gagne droit lire Qour’aan. 

N.B : Nou fine reproduire ça parceki la dernière fois ça morceau “sans touche Qour’aan aussi pas gagne droit lire Qour’aan” ti resté par l’erreur ki ti donne l’impression gagne droit lire Qour’aan par cœur en état jannabat et en état de haiz. Or, li pas coumsa. Nou re-précisé ki dans l’état janaabat et en état haiz, pas gagne droit lire Qour’aan quand même par cœur aussi sans touche Qour’aan.

Question:Causé rié après la mort

Eski li possible ene dimoune ki fine fini mort, li rié causé?

Réponse:

Normalement banne kitchose couma causé rié après la mort pas habitué arrivé. Acoze ça li paraite impossible mais en réalité li ene kitchose impossible seulement dans la pratique. Li pas ene kitchose impossible ki pas capave arrivé parceki ena banne l’événements pareille ki fine déjà arrivé dans le passé.
Dans Qour’aan-e-Kareem ena plusieurs l’événements ki montré ki dimoune mort fine revive et fine causé. Dans l’époque Hazrat Moussa (a.s), ene dimoune fine levé après la mort pou montré ça dimoune ki ti touye li. Hazrat Issa (a.s) fine lève plusieurs dimoune après zotte la mort par l’ordre Allah Ta’ala. Ça banne dimounes-là fine vive aussi ene bon boute le temps après ça.
Selon ene hadice dans Al-Moustadrak de Al-Hakim et dans Tibraani ki fine qualifié de ene hadice authentique, dans l’époque Hazrat Usmaan (r.a), Hazrat Zaid Bin Kharijah (r.a) ti causé après so la mort. Allaamah Ibn Hajar Al-Asqalaani présente Hazrat Zaid Bin Kharijah (r.a) dans so Taqreebut-Tahzeeb en ce terme :

"صحابى بدرى توفى فى خلافة عثمان وهو الذى تكلم بعد موته" 

“Li ene Sahabi (compagnon du Prophète (s.a.w)) et ene Badri (ki ti participe dans bataille de Badr). Li ti mort dans l’époque khilaafat Hazrat Usmaan (r.a). C’est li même ki ti causé après so la mort.”
Selon ceki Allaamah An-Nawawi fine cité dans so commentaire lors sahih Mouslim, ti ena deux frère ربعى et ربيع. Tous les deux ti garçon حراش.
ربعى ti faire serment ki jamais li pou riyé tanque li pas conne so place dans aakhirat. Alors c’est necque après so la mort même ki li fine riyé. Quant à so l’autre frère ربيع, li aussi li ti faire même qualité serment. Ça dimoune ki ti donne li ghoussal après so la mort raconté ki ربيع ti pé faire sourire pendant ki nou ti pé baigne li. Si nou servi l’intelligence, li pas difficile pou comprend ça banne kitchose-là parceki quand ene tronc pied tamme capave ploré, la grain tamme capave faire tasbeeh, banne vaisselle dans la caze capave faire zikr, roche capave faire salaam, ene la chaire ki fine fini cuit capave causé, banne zanimau capave causé couma dimoune causé, alors ki impossible ena quand ene dimoune ki ti pé déjà causé, arrivé causé après so la mort.

Apres vine faire banne remarques couma “eski dimoune même sa ou bien Robo” ….. “Sa bizin ki li ene superman” ou bien “sa ziste dans livre zistoire qui ena sa”, c’est banne remarques et banne commentaires banales, futiles et sans fondations. Nou constate avec ene grand regret et amertume ki de jour en jour connaissance de Deen apé déprécié parceki kitchose dans Deen ki dimoune ti pé comprend sans alle l’école, zordi jour dimoune pas pé comprend li après avoir faire même B.A ou M.A dans shariat aussi. Et pas fini ! Ceki pli étonnant, ou gagne applaudissement lors banne remarques enfantin et banales. Mais li pas bizin paraite étonnant parecki quand B.A ou M.A dans shariat pas pé comprend, abé public ki pas fine appranne, cote pou comprend.

Eski ça banne ‘connaisseurs’ de Deen-là pou ena le courage traite Qour’aan et hadice aussi de ene livre zistoire ? Eski zotte capave qualifié le Al-Fourqaan de Ibn Taimiyah aussi de livre zistoire ? Faudré pas causé quand pas conné. Cause kitchose sans conné capave amene ou ziska perdi Imaan aussi. Acoze ça même Rassouloullah (s.a.w) fine dire :
“… Celui ki ena Imaan lors Allah et lors dernier jour du jugement, alors li bizin cause bon causé ou bien li reste tranquille.”

Question : Sajdah Tilaaawat

Eski li permette faire Sajdah Tilaaawat après namaz Fajar et après namaz Assar ?

Réponse :

D’abord nou bizin conné ki ena cinq l’heure ki li pas permette pou faire namaz nafil :
1. Apartir Soubha-saadiq (l’aube) ziska ki soleil levé,
2. Pendant ki soleil pé levé, 
3. Pendant zawaal (zénith), 
4. Après namaz Assar ziska soleil couché,
5. Pendant ki soleil pé couché.
Et banne namaz qadhaa nou gagne droit remplacé dans tout banne l’heure excepté : 
1. Pendant ki soleil pé levé
2. Pendant zawaal (zenith)
3. Pendant Taghai-yur. 

N.B : Taghai-yur veut dire changement. Dans ce contexte ici, li signifié ça phase quand soleil change couleur et li vine jaune. Normalement ça li arrive ene ti pé le temps avant ki soleil couché. Pou conne Taghai-yur, nou bizin essaye fixé soleil. Si nou capave fixé, ça veut dire ki Taghai-yur fine fini commencé. Tanque li difficile pou fixé regard, veut dire ki soleil pencore rente dans ça phase ki appelle Taghai-yur.

4. Pendant ki soleil pé couché.

Nou capave faire Sajdah Tilaawat dans n’importe ki l’heure. Nou capave faire li même dans banne l’heure cote namaz qadhaa ou bien namaz nafil pas permette. Mais li bon si nou pas faire li pendant ça quatre l’heure-là. Si jamais sajdah fine vine waajib dans ene lot l’heure apart banne l’heure ki fine mentionné là-haut, alors li pas pou permette faire li dans ça quatre l’heure là aussi. Par ça explication-là nou fine comprend ki li permette faire sajdah tilaawat après namaz Fajar et après namaz Assar. Et coumsa même quand soleil pé levé et quand soleil pé couché aussi, nou gagne droit faire li. Malgré ki li pli bon si nou faire dans ene lot l’heure. Mais li pas permette pou nou choisir ça deux l’heure-là, c’est-à-dire quand soleil pé levé et quand soleil pé couché, pou faire ene sajdah ki ti wajib dans ene lot l’heure.

Bonheur et Malheur

Bonheur et malheur, tous les deux trouve uniquement dans la main Allah Ta’ala. Ça pas trouve dans la main kikene apart li. Si ou pensé ki ou ena ou bonheur dans gagne kikene ki ou content dans ou la vie, abé ou dans l’erreur. Ça bonheur ki ou pé rodé nuit et jour couma ene dernier charité lors tout qualité la porte, li trouve dans la main ou Rabb ki fine crée ou. Alors tout ça jours-là ou fine mal tappe la porte. Ou pas fine tappe la porte ki bizin.

Hier ou ti passe ene nuit cri pou attane minuit sonné. Ou fine sonne pétard, ou fine amusé, ou fine sauté pillé. Combien malédiction fine sorti depi dans le cœur banne dimoune ki fine indisposé par gros-gros canon ki ou fine sonné. Eski ou satisfait zordi avec ceki ou fine faire hier ? Ou pou d’accord ou regretté ceki fine arrivé hier. Ou conné ki faire ou triste zordi malgré ki ou fine bien amusé hier ? Parceki ou fine cherche l’amusement dans désobéissance ou Créateur ! Ou fine amusé pou faire ou qualité même du tort. Ou fine guette zisse pou ou. Ou pas fine pense pou ou camarade. Absolument la grattelle-là fine donne ou ene grand sensation gratté. Dimoune dire ou pas gratté. Li pas bon. Mais ou fine trouve li correct et ou fine senti ou soulagé. Ou ti pensé ki dimoune pé barre ou bonheur. Mais après ça ki fine arrivé ? Partout fine enflammé. Ça même arrivé quand ene dimoune amusé par désobéir so Créateur. Li pensé ki so bonheur trouve dans ça l’amusement-là mais en réalité li trouve dans reste sincère envers Allah Ta’ala.

Vrai la joie

Par vive dans l’obéissance Allah Ta’ala, ene personne li gagne ene la joie dans so le cœur. Nou capave appelle li “Sakeenah” ou ene genre de tranquillité morale ou bien ene sensation du bien être total ki Allah Ta’ala li dessane dans le cœur de banne ki sérieux dans Deen. C’est ene la joie inestimable ki ou moyen ou bien ou fortune pas capave acheté. Si banne ki noyé dans cherche le monde matériel ti arrivé conne le vrai goût de ça la joie-là, zotte ti pou oulé envahir banne personnages pieux au détriment de zotte royaume.

Si ou perna la volonté souhaite bonheur ou camarade, au moins pas souhaite so malheur !

Vrai misérable et dernier misérable

Ene vrai misérable li pas ene dimoune ki perna le moyen. Li possible ki ene dimoune li misérable malgré ki li entouré de toute sorte de confort. Ene le roi ki pé assize lors trône, pas nécessairement li pli dans bien ki ene ki lors so natte casse-cassé.

Ene vrai misérable c’est ene kikene ki désobéir so Créateur. Et ene dimoune ki misère de par moyen et ki pé désobéir so Créateur, c’est ene dernier misérable.

Qourbaani

Qourbaani li wajib (obligatoire) essentiellement lors ene dimoune ki ena le moyen.
Ene dimoune ki ena le moyen veut dire ene dimoune ki ena dans so possession la somme de cinq ou six mille roupies ou ça valeur-là dans n’importe ki forme apart so banne nécessités de base et so banne dettes.

La caze, l’habillement, moyen transport, z’outil travail et mangé boire c’est banne nécessités de base pou ene dimoune. Quand ene dimoune ena la somme ou la valeur de 5 ou 6 mille roupies dans n’importe ki forme ki dépasse so banne nécessité de base et so dettes, alors en principe li bizin faire Qourbaani. Ensemble avec ça, li important ki li pas en voyage, li sain d’esprit et li majeur. Ça veut dire ene dimoune ki ena le moyen mais li en voyage, alors Qourbaani pas pou wajib lors li. Coumsa même ene zenfant mineur perna pou faire Qourbaani même si li ena la monnaie. Si ene mama ou ene papa oulé faire Qourbaani de coté so zenfant, li ena droit faire li. Mais li bizin faire li avec so propre la monnaie. Li pas gagne droit servi la monnaie ça zenfant mineur-là. Dans la même façon, Qourbaani pas wajib lors ene dimoune ki so la tête pas bon.

L’HEURE POU FAIRE QOURBAANI

Bizin guette l’endroit acote pé faire Qourbaani. Pas l’endroit acote ça dimoune ki fine prend part-là resté. Par exemple si dans l’endroit acote pé faire Qourbaani fine fini faire namaz Eid, alors gagne droit faire Qourbaani. Et ça Qourbaani-là li compté. Quand même dans l’endroit ki ça dimoune ki fine prend part-là, pencore faire namaz Eid. Par exemple ene dimoune à Maurice so Qourbaani pé faire dans l’Amérique. Le troisième jour de Qourbaani, soleil fine fini couché à Maurice. Mais en Amérique, ena encore quelque heures pou soleil couché. Dans ce cas, si fine faire Qourbaani en Amérique, ça Qourbaani-là pou compté. Coumsa même si ene dimoune en Amérique so Qourbaani pé faire à Maurice, alors ça Qourbaani-là pou compté, quand même namaz Eid en Amérique pou faire 8 ou 9 heures temps après. Tout ça-là li basé lors le principe ki l’endroit acote pé faire Qourbaani ki bizin guetté.

HADICE

“… Celui ki cachiette défaut ene musulman, Allah (Ta’ala) pou cachiette so défaut dans Dounia et dans Aakhirat …”

N.B : En principe pas gagne droit dévoile péché ene musulman. Bizin cachiette so défaut. Mais si cachiette ça défaut-là li menace l’intérêt ene l’autre personne, alors bizin averti la personne concernée pou li capave prend so précaution. Dans ce cas li pas empêché. Au contraire li ene devoir pou dévoile li.

Roza jour ‘Arafah

Li recommandé pou garde roza le jour de ‘Arafah. Le jour de ‘Arafah c’est le 9eme Zulhijjah ou bien la veille Baqr Eid. Selon ene hadice ki trouve dans Saheeh Mouslim, par garde ça jour-là so roza, Allah Ta’ala efface banne péchés ki fine ena l’année d’avant et l’année après. D’après explication banne savants dans Deen, c’est banne péchés mineurs ki effacé. Quant à banne péchés majeurs, en principe bizin faire tawbah pou ça être pardonné. Couma li possible ki Allah Ta’ala li gracié celui ki li oulé sans ki li faire tawbah aussi.

Après tout, ça aussi li possible ki ene dimoune li gagne la volonté repentir et faire tawbah sincère de banne péchés par barakat banne roza nafil et change so la vie pour de bon. Faudré pas nou néglige banne roza nafil par minimise zotte l’importance et par prétexte ki zotte pas obligatoire. Li capave paraite simple acoze li pas obligatoire mais ça pas empêche li vine ene moyen pou dresse la vie ene dimoune. Acoze ça tanque possible nou pas bizin laisse allé banne l’occasion pareil.

Le roza de ‘Arafah li recommandé garde li le 9eme Zulhijjah. Chaque l’endroit et chaque pays so 9eme Zulhijjah li depanne d’après ceki l’autorité concerné de ça pays-là fine décidé et fine décrété. Ça pas nécessaire coïncide avec l’heure ou avec jour ki banne haji zotte dans la plaine ‘Arafah. Ene question pareil ti soulevé dans l’époque Hazrat Aisha (r.a). Et Hazrat Aisha (r.a) ti montré zotte ki bizin guette d’après l’endroit ki ou pé resté. Selon ene récit ki trouve dans Mousawannaf Abdurazzaaq et Al-Baihaqui, Masrouq fine vine acote Hazrat Aisha (r.a) jour ‘Arafah. Hazrat Aisha (r.a) fine dimane pou servi Masrooq “Saweeq” (ene l’espèce la crème ou la patte préparé avec du blé et tamme). Ça jour-là si Hazrat Masrooq pas ti garde roza, c’était par mesure de précaution ki ça jour-là ti capave être le jour de Eid. Alors li fine préfère pas garde roza. Quant à Hazrat Aisha (r.a), alors li ti garde roza. Hazrat Masrooq fine dimane Hazrat Aisha (r.a) :
“O maman de banne croyants ! Eski ou pé garde roza zordi ? Ki conné li capave être jour Eid zordi ?”

Hazrat Aisha (r.a) fine repone : 

“Jour Eid c’est ça jour ki le chef d’état et la grande majorité célébré…”

Par ça anecdote-là nou comprend ki nou bizin observe le roza de ‘Arafah ça jour ki tombe le 9eme de Zulhijjah d’après calcul dans nou pays sans prend compte ceki ça capave été pou banne haji dans makkah.

..................................................................................................................

Redacteur en chef: Moufti Mouhammad Raffick Meerun

Email: jamiat2009@gmail.com

Biographie du President du J.U.M

Bismillaahirrahmaanirraheem