AL-Jamiat V.3 No.2

BARAKAT DAROOD SHAREEF

Sheik-ul Hadice Hazrat Maulana Zakariyyah rahmatoullahi ‘alayh dire dans ene de so banne récits ki li fine faire dans so livre “Fazail-e-Daroud”, "place cote Maulana Faizul-Hassan ti mort, pendant ene mois ça place-là fine reste senti bon. Maulana Qaasim fine dire ki ça c’est Barakat de Daroud Shareef parceki chaque jeudi soir Maulana Faizul-Hassan ti pé passe la nuit en envoyant Daroud lors le Prophète (s.a.w)."

Ene dimoune ki paraite pas conne respect banne ‘Oulama, fine faire ene commentaire banale lors ça. Li dire :

“Pas ena doute qui banne qui fine envoye plus beaucoup Daroud lors le prophète, et dans ene meilleur façon légale, c’étaient banne Swahaabah. Malgrés sa, nou pas fine trouve ene « Barakat » pareille. Cote zotte fine alle tire sa Barakat la zotte ? Eski quicaine apres banne Swahaabah fine envoye plus beaucoup Daroud lors le prophète et dans ene meilleur façon qui banla ?”

Nou pou remarqué ki ça dimoune-là pas fine amene aukene preuve depi dans Qour’aan ou depi dans hadice pou désapprouve ça récit-là. Li fine necque base so l’opinion lors ene supposition banale. Eski ena kit preuve dans Qour’aan ou dans hadice ki dire ene Barakat ki Sahaba pas fine gagné, ene l’autre pas capave gagne li ? Définitivement perna aukene preuve coumsa. Donc ceki ça dimoune-là fine dire, li pas basé lors aukene preuve dans shariah. Au contraire li contre boucou kitchose dans Qour’aan et dans hadice. Parceki si Hazrat Yunus (a.s) ti reste sain et sauf pendant 40 jours dans ventre poisson, pou ça vine vrai, eski li bizin arrivé avec Rassouloullah (s.a.w) aussi ? Si Hazrat Ibrahim (a.s.) pas ti brûlé dans du feu, eski li bizin arrivé avec Rassouloullah (s.a.w) aussi pou li vine vrai ? Hazrat Khubaib (r.a) ti gagne pou mange ene grappe raisin grosseur la tête ene dimoune pendant ki li ti emprisonné acote banne moushrik dans Makka et pourtant dans ça banne jours-là pas ti ena raisin aukene part dans Makkah. Eski kikene capave permette li dire “Cote sa zotte fine alle tire ça Barakat raisin-là zotte” pou la simple raison ki Hazrat Abou Bakr (r.a) ou Hazrat ‘Oumar (r.a) pas fine gagne ça l’honneur-là ?

Tout ça-là montré ki parfois Allah Ta’ala li accorde ene faveur particulier à ene tipti ki li pas accorde à ene grand. Selon ene anecdote ki Allaamah Bin Taimiyah fine raconté dans so “Al-Fourqaan”, banne l’ennemis ti jette Abou Mouslim Al-Khawlaani dans du feu. Quand banne-là vine guette li, zotte trouve li pé diboute pé faire namaz dans du feu. Eski nou gagne droit dire “Cote zotte fine alle tire ça” ziste acoze ki ça miracle-là pas fine arrive ça avec banne Sahaba-e-Kiraam (r.a) ?

A ce stade, nou pas capave empêche nou dire ki ça commentaire-là li vine de la part ene dimoune ki pas conne Deen ou bien ene ki fine apprane Deen mais ki pas conne so sujet bien.

Pli devant li continué so commentaire futile: "Chaque soir Maulana Fayzul-Hassan ti pé passe la nuit en envoyant Daroud lors le Prophète. Est-ce qui le Prophète fine enseigne nou pou passe la nuit chaque jeudi soir en envoyant Daroud". Li bien difficile pou croire ki ene commentaire pareille capave vine de la part ene ki conne Deen. Mais ça Dounia-là ena tout qualité échantillon. Li pas drôle si ene ki peut être capave ene B.A ou M.A dans Shariat, faire ene commentaire aussi futile. Pou reponne à ça objection-là, nou dimandé eski ena kit hadice ki empêche envoye Daroud dans jeudi soir ? Nou pé pose ene question pareille parceki banne ki autorise faire khutbah en créole, zotte ena l’habitude dimandé si eski ena kit hadice ki empêche faire khutbah en créole. Par cela zotte envie dire ki li permette parceki selon zotte perna narien dans hadice ki empêche ça. Si zotte sincère dans zotte preuve, alors d’après zotte propre preuve même,  passe la nuit chaque jeudi soir dans envoye Daroud li bizin permette. Pas ziste ça. Mais nou ena ene hadice cote Rassouloullah (s.a.w) fine recommande faire boucou Daroud dans la nuit et dans la journée de Jum’ah. Allaamah Ibn Taimiyah fine rapporté dans so Al-Fourqaan ki Rassouloullah (s.a.w) fine dire :

"اكثروا على الصلاة يوم الجمعة وليلة الجمعة فان صلاتكم معروضة على"

“Envoye boucou Daroud lors moi jour Jum’ah et la nuit de Jum’ah parceki zotte Daroud pou présenté divant moi …”

D’après ça hadice-là, Rassouloullah (s.a.w) fine recommande pou faire boucou Daroud dans la nuit de Jum’ah. D’après Shariat, la nuit vine avant la journée. Donc la nuit de Jum’ah c’est ça la nuit ki commencé apartir Maghrib jour jeudi. Dans nou langage nou appelle li jeudi soir mais d’après Shariat c’est vendredi soir ou bien la nuit de Jum’ah. Donc, ki ou trouve pas bon si ene dimoune passe ça la nuit-là, c'est-à-dire la nuit de Jum’ah dans envoye Daroud lors Rassouloullah (s.a.w) acoze ki Rassouloullah (s.a.w) fine recommande ça pratique-là ?

Du feu l'enfer

Du feu l'enfer li 70 fois pli intense ki du feu dans dounia. Dimoune ki pou gagne ene punition pli faible et pli léger, c'est ene dimoune ki pou gagne pou mette ene soulier ki faire avec du feu. So la cervelle pou bouille avec so chaleur. Acoze ça nou bizin toujours dimane protection Allah Ta'ala contre so punition et contre du feu l'enfer.

L'enfer li ene manifestation de la colère Allah Ta'ala. Allah Ta'ala li en colère avec so serviteur ki pas obéir li. Donc nou bizin faire zeffort vive dans l'obéissance Allah Ta'ala. Si jamais nou arrivé faire kit erreur, faudré pas nou reste lors la même. Nou bizin repentir de ça erreur ki nou fine faire-là et dimane Allah Ta'ala pardon au pli vite possible.

Souvent dimoune cause ene qualité causé ki donne l'impression ki li pas peur punition Allah Ta'ala. Nou bizin faire bien attention parceki pas peur punition Allah Ta'ala c'est Kufr.

Hadice

"Ene juge li bizin pas faire jugement entre deux personnes quand li en colère." (Saheeh Boukhari)

Explication:

La colère li ene kitchose ki decontrôle ene dimoune. Ena des fois li dire certaine kitchose sans être conscient de gravité de ça causé-là. Dans ene l'état pareil, ene dimoune li arrivé gagne dégoût pou so madame ki li ti faire la terre le ciel ene seul pou marié avec li. Mais zordi dans ene moment de colère, li pas trouve li bon.

En réalité narien pas fine changé. C'est so colère ki fine change so façon voir les choses. C'est acoze ça ki Rassouloullah (s.a.w) fine empêche faire jugement dans ene l'état pareil.

Selon banne savants, par ça hadice-là, Rassouloullah (s.a.w) fine attire nou l'attention vers tout banne l'états ki décontrole ene dimoune couma la faim, la soif, sommeil, tristesse ou la joie extrême etc. Donc dans ça banne l'états-là aussi ene dimoune bizin pas faire aukene jugement.

En général ene dimoune bizin assuré ki li en état normal avant li prend ene décision. Si li senti li bouleversé, li capave laisse ene l'autre lors ki li ena confiance, prend décision pou li. Nou bizin adopté ça principe-là partout cote nou ena pou prend ene décision important. Surtout banne jeunes ki zotte en projet mariage, bizin toujours contacté banne dimounes ki pli expérimenté et pli Deendaar afin ki zotte capave faire ene bon choix par ene bon décision. Banne jeunesses, quand zotte content pou marié, zotte blié ki enbas fleur rose ena so piquant aussi. C'est-à-dire zotte blié ki zotte ena pou amene ene la vie mouvementé ki ena so haut et so bas. Zotte pensé ki tous le temps pou ena ça la vie acteur-actrice, joine dans snack, dans restaurant ou dans boite de nuit ou enbas tout coin la rue. Avant marié zotte gagne l'occasion necque guette ene seul face de la vie. Et par manque de l'expérience, l'esprit-là aussi pas assez ouvert ki permette zotte réalisé couma ça la vie après mariage-là pou été cotte chakene pou bizin prend so responsabilité et cote rôle playboy ou playgirl pou fermé.

Apart ça nou ena encore ene l'autre sujet. C'est le sujet de talaaq. Ici aussi nou faire face avec même qualité problème. Boucou dimoune, à ene moment donné, sous l'emprise de colère, zotte vine lors décision donne talaaq avec ene l'idée pou débarrassé de banne problèmes. Ena parmi là-dans ki capave ena raison dans ceki li fine faire. Mais ça li pas le cas en général. Dans la plupart de banne cas, dimoune-là mal prend décision parceki li nepli capave raisonné. C'est necque plutard ou pou tanne dire ki li ti mauvais en colère. C'est dans ene moment de colère ki li fine prononce tout les trois talaaq. Zotte amene ça prétexte-là zisse pou gagne ene chemin sorti. Mais nou bizin conné ki dimoune pas donne so madame talaaq dans contentement. Li donne li dans colère même. Mais pou perna aukene regret plutard, nou bizin toujours analyse les pours et les contres avec l'esprit posé avant nou tire ça mot talaaq-là ki nou pas pou capave re-avale li. Et pou être pli prudent, li pas de trop si nou contacté ene personne ki ena Deen et connaissance de Deen ki capave conseille nou.

SERVI LA MAIN DROITE

Nou servi la main droite pou mangé. Coumsa même nou bizin attrape avec la main droite quand nou boire. Selon ene hadice ki trouve dans Saheeh Mouslim, Rassouloullah (s.a.w) fine qualifié mangé-boire avec la main gauche de la façon ki shaitaan mangé-boire. Ene bon musulman li bizin toujours reste loin avec ceki shaitaan content et ceki shaitaan faire. Li pas coute nou narien dans servi la main droite pou mangé-boire. Mais ene simple ti négligence capave coûte nou bien cher. Apres ça aussi, ki plaisir ena dans faire couma shaitaan quand ena tout facilité suive le principe de nou bien-aimé Nabi (s.a.w) et profité énormement dans dounia et dans aakhirat sans faire la peine et sans perdi kitchose?

SERVI LA MAIN GAUCHE

Nous servi la main gauche pou nettoye nou dans toilette. Coumsa même nou servi la main gauche pou nettoye tout kitchose ki impure.

SERVI TOUS LES DEUX LA MAIN

Cote ene la main li pas sufi, là-bas capave servi tous les deux la main. Par exemple ene dimoune pas capave boire coco avec ene seul la main. Alors li gagne droit attrapé avec tous les deux la main. Coumsa même quand nou donne la main pou faire Mousafahah, li pli bon faire li avec tous les deux la main. C'est ene façon pli respectable.

QUAND LEVE DORMI

Ene dimoune pas conné cote-cote so la main fine vire-viré dans sommeil. Alors quand li lève dormi, li pli propre ki li lave so la main avant li mette so la main dans ene kitchose mangé ou bien dans ene kitchose boire.

La richesse réelle

"La richesse li pas vine apartir boucou fortune mais la (vrai) richesse c'est la richesse (ki trouve) dans le cœur." (Saheeh Boukhari)

Explication:

Ene dimoune li capave perna narien dans so poche mais li pas mort aussi pou l'argent. So le cœur li attaché avec Allah Ta'ala. Tout ceki li bizin, li dimane avec Allah Ta'ala. C'est ene personne vraiment indépendant et riche de par le cœur malgré ki li perna narien. Li pas galoupe derrière dounia. Li pas la guerre avec kikene acoze du bien. Li pas jaloux so camarade quand li trouve li pé gagné. Ene dimoune coumsa li senti li léger et libre acoze ki so le cœur pas attaché avec narien.

Par contre ene personne ki so le cœur attaché avec du bien, li pou reste toujours tracassé et bouleversé couma ene dernier dimoune pauvre malgré ki li possède ene quantité. Pli li ena, pli li senti li dans le besoin couma dire li fine gagne la grattelle. Pli li gratté, pli li envi gratté. C'est ene prisonnier ki pé viré-tourné couma ene dimoune libre. Li bien vrai ki quand ou content kikene plis ki Allah Ta'ala, ou pou amene ene la vie misérable même. Ou la caze, ou fortune, ou l'entourage narien pas capave donne ou le vrai confort ki ou bizin si ou le cœur li attaché avec ene l'autre kitchose apart Allah Ta'ala parceki Allah Ta'ala même li la source de la joie. Sans li, ou pou vine ene proie pou tout qualité bouleversement.

Question:

Eski gagne droit prend casse pou lire Qour'aan dans la caze dimoune?

Réponse:

Lire Qour'aan li ene ibaadat. D'après principe ene dimoune perna droit réclame narien pou ene ibaadat. Selon ene hadice, Rassouloullah r fine empêche servi Qour'aan comme ene gagne pain. Donc li pas permette prend casse pou lire Qour'aan dans la caze dimoune. Ça dimoune ki donné-là aussi pou coupable divant Allah Ta'ala. Quant à l'enseignement Qour'aan-e-Kareem, alors li permette employe dimoune lors la paye pou assume ça responsabilité-là parceki l'enseignement Qour'aan li ene kitchose de base dans Deen. Donc li ene nécessité. Zordi jour ena bien tigite dimoune ki pou disposé faire li volontairement à longue terme. Si nou pou attane banne volontaires même, nou banne zenfants pou reste sans conne Qour'aan. Alors acoze ça nécessité-là, banne 'Oulama fine trouve ene concession en ceki concerne l'enseignement Qour'aan. Longtemps banne ki ti engage zotte dans travail de Deen, ti pé gagne aide de coté Bait-ul-Maal ki ti ena dans l'état Islamique. Astere perna li. Mais travail-là bizin continué. Donc ça li vine lors responsabilité de chaque individu ki pé bénéficié avec ça service-là couma li possible ki ça aide-là li garanti en forme salaire de la part ene société, organisation ou bien ene institution. C'est-à-dire travail ki Bait-ul-Maal ti pé faire longtemps, bizin faire li à titre individuel ou collectif astere.

Coumsa même gagne droit employe kikene pou enseigne Deen, pou faire Imaam ou bien pou donne azaan parceki ca banne kitchose-là pou négligé si pas pou payé. Mais pas gagne droit payé pou lire Qour'aan.

Ene société idéale

Bizin ena la justice pou dimoune capave vive avec la paix. Sans la justice, chaque individu dans la société senti li menacé en ceki concerne so la vie, so di bien, so la famille et so dignité. Ene societé à cote dimoune bizin peur dimoune plis ki dimoune peur serpent scorpion etc, c'est ene société vraiment barbare malgré li paraite bien civilisé pou lizié dimoune.

Bizin ena ene seul qualité la loi pou tout dimoune. Pas capave ena ene la loi pou ti dimoune et ene l'autre la loi pou ene l'autre catégorie dimoune. Sans ça ene société pas capave être considéré couma ene société civilisé. Ene société acote la loi li applique lors seulement ti dimoune, c'est ene société injuste et barbare ki permette ene certaine catégorie de la population piétine droit ene l'autre catégorie.

Ene fois dans l'époque Rassouloullah (s.a.w), ene madame juive fine coquin. Madame-là ti sorti dans ene grand famille. Malgré ça Rassouloullah (s.a.w) fine donne l'ordre pou coupe so poignet. So la famille fine faire démarche pou ça pas arrivé. Mais Rassouloullah (s.a.w) pas fine cédé et fine dire:

"Par Allah! Si (par hasard) Fatimah aussi ti arrivé faire ça, mo ti pou coupe so la main. Acoze ça même banne Bani Israël fine périr parceki la loi ti pé appliqué lors banne ti dimoune seulement. Quand ene depi dans ene grand famille ti pé coquin, zotte ti pé laisse li."

Hazrat 'Oumar t aussi pas fine hésité pou fouette so propre garçon pou ene certaine délit ki li ti commette. Ça c'était vraiment ene société idéale ki ou sur dimoune pou vine chez ou pou donne ou, ou droit dans ou la caze couma ene zenfant gagne dilait directe dans la bouche. C'est ene société cotte chaque dimoune ena le souci assume so responsabilité envers le zot ki réclame so droit. C'est ene société ki ti basé principalement lors ene seul kitchose. Et ça c'est la crainte d'Allah Ta'ala. Ou bien la croyance ou la conviction ki li pou bizin ranne compte pou tout ceki li fine faire et li pou être jugé sans ki li capave par kit moyen influence jugement.

Qour'aan-e-Kareem

Qour'aan-e-Kareem c'est la parole Allah Ta'ala ki li fine révèle ça lors nou bien-aimé Nabi Hazrat Mouhammad (s.a.w). 

Ça Qour'aan-là pas fine révélé dans ene seul coup. Li fine dessane tigite par tigite selon la nécessité pendant 23 bananés.

Dans Qour'aan-e-Kareem, Allah Ta'ala dire ki li fine révèle Qour'aan-e-Kareem dans la nuit de Qadr. 

Ça signifié ki Allah Ta'ala fine dessane entier Qour'aan-e-Kareem depi dans "Al-Lawh Al-Mahfouz" à ene l'endroit ki appelle Bait-ul-Izzah dans la nuit de Qadr. Et depi là-bas li fine dessane tigite par tigite lors Nabi r pendant 23 bananés.

Qour'aan-e-Kareem ena 114 sourah. Pli long sourah c'est sourah Baqarah et sourah pli courte c'est sourah Al-Kawthar.  

Qour'aan-e-Kareem li commence par sourah Al-Fatiha et li terminé par sourah An-Naas. 

Cinq premiers versets de sourah Al-'Alaq (96) c'était la première révélation ki Nabi (s.a.w) fine recevoir quand li ti engagé comme d'habitude dans ibaadat et dans méditation dans ene la cave ki appelle Hira. Et le dernier verset ki fine révélé c'est le verset 281 de sourah Al-Baqarah.

Qour'aan-e-Kareemc'est le livre ki pli authentique. Allah Ta'ala fine donne la garantie ki li pou préserve ça livre-là ziska Qiyaamat. Personne pas pou capave ajouté ou retiré depi là-dans. Et effectivement fine gagne plis ki 1400 bananés. Ça livre-là li encore pareille couma li ti eté 1400 bananés auparavant. 

Allah Ta'ala fine facilite apprane ça livre-là par cœur. Ou capave trouve banne tipti zenfants enbas l'age dix ans ki capave lire ça Qour'aan-là par cœur. Donc Qour'aan en li même li ene Mou'jizah (miracle) ki montré li ene révélation divine et ki le personnage ki fine gagne ça par révélation li ene véritable Nabi (prophète).

Qour'aan-e-Kareem li ene bienfait et ene bénédiction pou entier l'humanité. Selon ene hadice, Rassouloullah (s.a.w) fine dire ki Allah Ta'ala li donne dignité à ene peuple par ça Qour'aan-là couma li déshonore lezot acoze ça Qour'aan-là même. C'est-à-dire celui ki attrape li fort, li gagne le succès total. Par contre celui ki tourne le dos, li échoué et li dénigré li même.

Banne Sahaba-e-Kiraam fine dirige le monde quand zotte ti ena Qour'aan dans zotte la vie. Mais banne ki fine vine après, zotte fine perdi pouvoir ziska même dans zotte la caze aussi parecki zotte fine néglige Qour'aan. 

Donc la réussite totale et complète trouve dans amene la vie d'après Qour'aan. C'est ça même kitchose ki nou manqué dans nou et c'est ça même kitchose ki lezot pé faire la tête li pied pou tire li depi dans nou. Acoze ça nou bizin promouvoir Qour'aan-e-Kareem. 

Nou bizin accélère nou zeffort au niveau maktab et madrassah pou assure ene lecture et tilaawat correcte de Qour'aan-e-Kareem.

Quand ene dimoune li conne Qour'aan-e-Kareem correctement, li pou ena goût lire li tous les jours. Et ça pou servi li comme ene lumière dans dounia et comme ene provision dans aakhirat. 

Et l'attachement ki pou développé dans li à travers tilaawat de tous les jours, pou garde li ferme lors Deen. Acoze ça même Nabi r fine dire:

"Meilleur parmi ou c'est celui ki apprane Qour'aan et li enseigne li"

C'est parceki apprane Qour'aan et enseigne li, c'est ene moyen pou faire Qour'aan prévaloir à tous niveau ki garanti le salut éternel.

L'amour pou Rassouloullah (s.a.w)et so sounnat

Ene personne ti ena 1000 Dinar en so possession. Li ti pé préparé pou li alle faire hajj. Quand tout fine fini paré et li pé alle faire hajj, en route li joine ene madame. Madame-là dire ki li ene descendant Nabi r et li dans ene grand difficulté. Ça personne-là fine dévide tout ceki li ti ena avec li et li fine donne ça madame-là. Acoze ça li pas fine capave alle faire hajj et li fine retourne so la caze.

Apres hajj, tous banne hajis ki joine li pé souhaite li Hajj Maqboul c'est-à-dire ene hajj ki fine accepté. Ça fine étonne li et li commence casse so la tête ki manière dimoune pé souhaite li ça quand tandis ki li pas fine alle faire hajj. A soir li fine rêve Rassouloullah (s.a.w) ki fine informe li ki Allah Ta'ala fine crée ene farishta dans (ça personne-là) so forme ki fine faire hajj dans so part. En plus de ça, Rassouloullah r fine annonce li ki ça farishta-là pou continué faire hajj de so coté ziska Qiyaamat acoze ki li fine aide ene descendant de Nabi (s.a.w).

(Raddul-Muhtaar)

Quand ça dimoune-là ti aide ça madame-là, li ti faire li acoze ça l'amitié ki li ti ena avec Rassouloullah (s.a.w). L'amitié pou Rassouloullah (s.a.w) li ene kitchose très très noble, exalté et beni. Donc ceki ça personne-là fine bénéficié, c'était acoze ça l'amitié ki li fine montré pou Nabi (s.a.w) à travers ça aide ki li fine accorde ça madame-là.

Suive Nabi (s.a.w) so sounnat et so principe li encore pli béni ki ça. Par ça, nou capave gagne ene l'idée ki quantité bénédiction dessane lors ene dimoune ki content Rassouloullah (s.a.w) et li suive so sounnat.

Malheureusement nou pas fine conne valeur ça l'amitié-là. Nou fine donne nou le cœur tout qualité malpropreté et nou senti nou fier dans suive zotte principe malpropre. Et pas fini! Nou fine qualifié suive Nabi (s.a.w) de l'extrémisme! Quand tandis ki suive Nabi (s.a.w) li faire Allah Ta'ala content nou et ça faire Allah Ta'ala dessane so bénédiction lors nou. Lezot capave pas conne ça ou bien zotte capave pas croire là-dans. Mais nou, nou bizin conné ki c'est Nabi (s.a.w) ki bizin nou pli grand bien-aimé. Et ça, nou pas pou prouve li par necque dire avec la bouche. Nou bizin montré li par suive so sounnat dans entier nou la vie. Ena ene grand lumière dans Nabi (s.a.w) so sounnat. Celui ki pou mette ca en pratique, li pou illumine so la vie dans dounia, dans Qabar et dans Aakhirat. Et ça même li ene pli grand preuve ki li content Nabi (s.a.w).

اللهم ارزقنا حبك وحب نبيك محمد صلى الله عليه وسلم

O Allah! Accorde moi to l'amitié et l'amitié de to Nabi Mouhammad (s.a.w).

Redacteur en chef: Moufti Mouhammad Raffick Meerun
Email: jamiat2009@gmail.com

AL-Jamiat V.3 No.1

Kafan depi dans Jannat

Allah Ta’ala fine réserve banne grand grand cadeau pou so banne serviteurs privilégiés dans aakhirat. Et parfois ici dans dounia même, Allah Ta’ala donne ene ti réclame. Par exemple d’après ene anecdote ki Sheik-ul Hadice Hazrat Maulana Zakariyyah rahmatoullahi ‘alayh fine raconté dans so “Fazail-e-Hajj”, ene ti tifille esclave fine mort. So patron Mouhammad Bin Hussain Baghdaadi fine alle bazaar pou acheté banne kitchose pou kafan. A so surprise, quand li fine retourné, li fine trouve ça tifille-là enveloppé dans deux draps couleur vert bien parfumé.
Ene kikene fine qualifié ça de ene fausseté pou la simple raison ki le Prophète fine mort, kafan pas fine dessane depi jannat. Grand grand Sahaabah fine mort, kafan pas fine dessane. Mais ça li pas ene preuve parceki couma Allaamah Ibn Taimiyyah (R) fine faire ressortir dans so Al-Fourqaan, ki ene miracle li capave manifesté lors la main ene inférieur d’après ki ça inférieur-là bizin. Et pourtant ene ki capave pli grand wali mais aukene miracle capave pas manifesté dans so la main parceki li pas bizin li. C’est acoze ça même, ça banne miracles-là gagne li dans banne Tabeines ene ti pé plis ki ti ena li dans l’époque banne Sahaba-e-Kiraam. Apres ça explication-là, li facile pou comprend comment si kafan pas fine dessane pou banne Sahaba, li capave dessane pou ene ki pas Sahabi. Ça li pas ene preuve ki li pas capave dessane pou lezot.
D’après ene récit ki Allaamah Bin Taimiyyah (R) fine rapporté dans so Al-Fourqaan, dans banne linges de Hazrat Uwais Al-Qarni rahmatoullahi ‘alayh ti gagne kafan ki pas ti ena avec li auparavant. Apres ça, banne dimounes fine trouve ene Qabar ki fine déjà fouyé dans ene rocher. Alors zotte fine mette ça kafan-là avec li et zotte fine enterre li là-bas.
Eski ceki Allaamah Ibn Taimiyah fine rapporté aussi pou être qualifié de fausseté ? Ici aussi nou pou osé dire ki c’est ene zistoire fausse acoze ki grand grand Sahaba fine mort, kafan pas fine dessane ? Raisonné si vraiment ou ena l’intelligence !

Attention!

La loi M.P.L c'est la loi Allah Ta'ala. La loi ki Allah Soubhaanahou Wa Ta'ala fine révélé dans Qour'aan et fine enseigné par Nabi  couma ene musulman bizin vive et comporte li en ceki concerne so la vie mariage et l'héritage etc. Bizin faire bien attention quand pé discute M.P.L avec banne camarade ou bien dans banne commentaires ki nou faire à propos M.P.L. Ça façon dire ki mo pas accepté M.P.L ou bien mo pas d'accord avec M.P.L ou bien M.P.L li ene la loi injuste etc, c'est banne parole de kufr ki annule tout banne bon actions ki ene dimoune fine faire et casse nikah la personne ki fine dire ça. Donc bizin faire bien attention! Si arrivé pas comprend kitchose là-dans, vaut mieux reste tranquille et essaye pou comprend li avec banne ki ena connaissance. Si malgré ça aussi pas fine comprend, alors comprend ene kitchose ki pas tout kitchose ki ou capave comprend. Ena boucou kitchose ki ou pas comprend mais ou pé faire li toute longue la vie sans ou comprend.

Insaan et Insaaniyyat

Allah Ta'ala fine crée insaan (être humain) comme "Ashraful-Makhlouqaat". C'est-à-dire insaan même li la création la plus noble. So noblesse li trouve dans capacité ki li ena pou distingue entre ceki bon et ceki mauvais et la volonté ki li ena pou attrape ceki bon par servi so l'intelligence.
Allah Ta'ala fine mette dans insaan ça nature ki permette li vive avec l'amitié et dans l'harmonie avec so qualité et aussi avec banne lezot espèces. Par ça nature ki Allah Ta'ala fine crée dans li, li conne partagé dans la vie. Ça qualité partagé-là distingue li de lezot espèces. Kitchose ki guide insaan vive dans la façon ki bizin et d'après ça nature ki Allah Ta'ala fine crée li, c'est Deen. La quantité ki li pou Deendaar, ça même quantité insaaniyyat (nature humaine) li pou ena. Ça veut dire ki ene vrai insaan c'est ene ki bien Deendaar. Ça amene nou pou comprend ki pli ene dimoune li éloigné de Deen, pli li éloigné de insaaniyyat. Quand ene dimoune li éloigné de Deen et li laisse li contaminé et envenimé par banne éléments négatifs ki entoure li, li vine dans stage cote le Bahimiyyah (caractère bestial) prend control lors so nature insaaniyyah. Dans ça stage-là, nou trouve dimoune dans forme dimoune mais avec banne caractère lezot espèce. Ça même qualité dimoune ki Allah Ta'ala appelle zotte pli inférieur ki toute la création.
"O Allah! Protége nou tous de ça bassesse-là et accorde nou la volonté pou suive Nabi (S.A.W) afin ki nou capave trouve nou vrai dimension de insaan.

Zaahir et Baatin

Zaahir veut dire ene forme l’extérieur ki paraite en dehors et ki dimoune capave trouve li avec so lizié. Baatin veut dire ene forme l’intérieur ki reste cachiette et ki lizié pas trouvé.
Par rapport à Zaahir et Baatin, nou ena quatre catégories dimoune :

 
Premier catégorie:

Ene dimoune ki so Zaahir et Baatin tous les deux d’après shariah. Par exemple banne Nabi, banne Sahaba, banne Tabeines et banne Auliya-Allah en général ki zotte endans et endehors tous les deux d’après shariah. Zotte sincère depi endans et de par zotte en dehors aussi zotte conforme à banne règle et principes de shariah. Zotte garde la barbe, zotte cheville reste découvert et zotte pas imite banne kaafir ou banne faasiq (perverse) dans zotte tenue en général. Ça c’est pli bon musulman.

 
Deuxième catégorie:

Ene ki so Zaahir et so Baatin tous les deux pas bon. So la coupe, so tenue et so l’apparence li plutôt ressemblé banne kaafir et banne faasiq. Et de par so l’intérieur aussi, li pas ene croyant. Ça c’est ene catégorie de dimoune ki pli pas bon.

Troisième catégorie:

 Nou ena ene troisième catégorie. C'est-à-dire ene dimoune ki so Zaahir (en dehors/l’apparence) li bien bon mais li bien pas bon de par so Baatin (endans). Ça catégorie dimoune-là li trouve impé partout ou bien c’est ça même ki nou trouve partout en general. Ça catégorie-là li tellement commun ki ça fine faire dimoune croire ki l’apparence pas important. Ou capave trouve ene dimoune bien correct. Mais quand ou gagne zaffaire avec li, lerla ou conné ki li été en réalité. Mais malgré tout ça-là li pas correct minimise l'importance Zaahir (l'apparence) parceki couma garde Baatin correct li ene l'ordre de shariat, coumsa même garde Zaahir aussi correct li ene l'ordre de shariah. Li vrai ki shariah fine attache pli boucou l'importance à Baatin ki Zaahir. Ça li paraite pli banale quand dimoune commence servi ça comme ene prétexte pou néglige le coté Zaahir. Zotte servi ça pou justifié zotte Zaahir ki pas corresponne avec shariah. Souvent ou tanne dimoune dire:
"Ou guette moi coumsa. Quand même mo perna la barbe, mais mo le cœur clair."
Finalement ça donne naissance à ene 4eme catégorie. C'est-à-dire ene ki so l'apparence pas corresponne avec principe islamique mais ki pretanne li ene bon musulman de par so l'intérieur. Ki quantité vérité ena dans ça prétention-là, ça Allah Ta'ala même conné. Nou pas gagne droit juge personne. Allah Ta'ala va juge li dans aakhirat mais pou le besoin administratif dans Dounia, ena certaine critères ki nou bizin satisfaire pou capave être considéré comme ene bon musulman. C'est-à-dire ene ki so l’apparence li pas islamique, nou pas gagne droit confié li banne responsabilité ki bizin ene bon musulman pou confié ça. Par exemple la responsabilité faire Imaam, donne azaan et vine moutawalli etc, nou pas gagne droit confié ça banne porte-là à ene ki so l'apparence li pas islamique.
Ene dimoune ki so l’apparence li islamique mais ki so l’intérieur li pas correct, ça li capave être acoze ki la personne li pas ene musulman mais li pé déclare ene musulman pou kit l’intérêt ou kit bénéfice. Ça nou appelle li ene pur Mounaafiq (hypocrite). Ça li pas bon même ditout. Li pareil couma ene kaafir ou bien pire ki ene kaafir déclaré. Ici nou pas pé cause ça catégorie de personne-là. Nou pé cause ene ki musulman de par so conviction mais ki so bon l’apparence pas corresponne avec so l’intérieur. C'est-à-dire li faible depi endans.
Nou capave comprend problème ça catégorie-là. Peut-être acoze ki dresse l’extérieur li pli facile ki dresse l’intérieur. Acoze ça li fine faire ceki facile. Et li pencore dresse ceki ene ti pé difficile. Li capave pé faire so zeffort pou dresse li. Ça li encore bon. Ou bien forcé forcé li possible ki li pé embette dimoune avec so l’apparence sans ki li ena la volonté pou dresse so l’intérieur. Ça catégorie-là nou agir avec zotte d’après zotte l’apparence. Amoins si nou ena kit doute ki basé lors certaine indication, alors nou pou bizin prend nou précaution.
Mais nou pas comprend ki l’intérêt ene dimoune ena dans cachiette so bon l’intérieur derrière paravent ene l’extérieur défavorable et indésirable. Si li pé vive quelque part ki ena pression lors banne Deendaar, alors ça li ena so raison. Mais ene dimoune ki pé vive dans ene l’endroit ki perna aukene difficulté pou pratique Deen ni ena kit l’empêchement concernant so tenue vestimentaire ou kit objection lors so l’apparence, alors malgré ça li pas tini ene l’apparence islamique et lors-là li continué dire ki li bien bon endans, ça li pas vrai. Li bien difficile pou croire. Ou même raisonné, si ene dimoune li bien doux depi endans, alors ki profit li ena dans montré amertume lors so visage quand li capave pas montré li. Coumsa même si ene dimoune li bon depi endans, li perna aukene l’intérêt cachiette li. Amoins ki li perna li même dans so l’intérieur mais li pé déclaré ki li ena ça dans li. Ça aussi li ene genre de fausseté et l’hypocrisie.
En principe quand ou endans fini dressé, mille ou cachiette li, ça pas capave reste cachiette. Vine pretanne ki endans li superbe quand même ou l’apparence pas corresponne avec ça, li pas vrai. Ene dimoune ki so l’apparence bon, si li capave pas bon depi endans, alors ça li applique pli bien lors ene ki so l’apparence même pas bon. C'est-à-dire li bizin pas bon depi en dans.

IMAAN

Imaan li la clé de tout succès. Sans imaan perna succès. Ene succès ki ene dimoune li gagné sans imaan, c’est ene succès temporaire. Nom de dire li ene succès parceki li couma dire ene dimoune ki pé gagne tout facilité pendant la nuit et ki le matin li pé alle pendi. Ceki li fine gagné li pas représente narien divant ça problème ki pé attane li gramatin. Dans la même façon, si nou trouve kikene dans bien malgré ki li perna imaan, alors c’est ene progrès et bien-être temporaire pou quelque temps.
Imaan li couma dire la clé ça mallette ki ou fine garde tout ou banne objets important là-dans. Tanque perna ça la clé-là, ou pas pou capave bénéficié avec narien. Banne faveurs ki Allah Ta’ala fine gardé dans jannat, pas capave profité avec ça tanque perna imaan parceki imaan c’est la clé de jannat.

VALEUR IMAAN

Ene-ene ti boute de ça Imaan-là li tellement valeureux ki li capave faire ou gagne ene confort et salut éternel. Ene dimoune li gagne le salut éternel quand li arrête gagne problème ou kit tracas. Li senti li complètement gai, joyeux et dans bien. Ene ti dernier Imaan narien du tout aussi ena le potentiel faire ou gagne ça salut-là. C'est ene salut ki entier le monde so fortune pas capave acheté. Dans ce sens, ça ene ti boute narien ditout-là li pli précieux ki entier le monde so fortune.
D'après ene hadice, ene dimoune dans jahannam ki so Imaan li tellement faible ki li pas pou capave être détecté par banne farishta aussi. Et pourtant farishta ki responsable jahannam li conne jahannam et tout banne ki là-dans couma ene maman li conne so ti bébé. Et d'ailleurs ene farishta li tellement puissant ki li capave détecté ceki banne l'appareil pli sophistiqué pas capave détecté. Ça montré ki quantité tigite imaan ça dimoune-là pou ena ki pas capave être détecté par banne farishta aussi.
Acoze ça ene tigite imaan narien ditout ki ça dimoune-là ena, Allah Ta'ala pou tire li depi dans jahannam et pou mette li dans jannat. Imagine ene coup ki quantité précieux et valeureux ca fortune ki appelle Imaan été. Après ça, ou dire ki l'autre-là ki imbécile acoze li fine brûle ene gros la bougie Rs3 pou rode ene ti pièce 20 sous. Eski nou pas pé faire plis ki ça? Alors ki sanla le pli gros imbécile?

La polygamie

La polygamie veut dire marié avec plis ki ene madame. Ene zomme musulman ena droit marié ziska 4 madames à la fois. Mais li bizin traite tous so banne madames pareil. Traite tous banne madames pareil li applique ziste dans banne zaffaires matériels couma mangé-boire, l'habillement, logement et resté pendant la nuit. C'est-à-dire li bizin reste ene-ene nuit acote chakene. Li pas gagne droit reste deux nuits cotte ene et ene seul nuit cote ene l'autre. Li bizin donne chakene le même nombre de nuit. Coumsa même li bizin donne chakene le même niveau de vie dans tout kitchose.
En ceki concerne l'amitié et le coté sentimental, personne pas capave pretanne capave ena control lors-là. Acoze ça Shariah pas impose égalité là-dans parceki ça li impossible. Mais ene missié ena capacité pas laisse paraite ki li content ene plis ene moins. Donc li bizin faire zeffort ça quantité-là. Apres tout, combien zeffort ou pou faire pou garde tout pareil mais chakene pou trouvé ki so camarade pé gagne plis. Donc acoze ça, de temps en temps pou gagne problème ki pou bien fatiguant. Alors ene dimoune bizin conne so capacité avant li marié plis ki ene madame.
La polygamie li ene kitchose ki trouve presque dans tout dimoune. Li vrai ki ena aussi boucou ki pretanne pas content ça. Mais si zotte gagne l'occasion, zotte pou faire li. C'est ene désir et ene l'envie ki reste dormi dans l'intérieur tout dimoune. Li couma dire ene l'appétit ki pas pé manifesté. Li depanne ki menu ou mette divant li. Si li gagne ene bon plat, ou même guetté si li pas mangé.
Coumsa même boucou madames capave qualifié ça de ene vice. Mais necque guetté, si ene prince ou ene acteur propose li, si li pas accepté pou marié avec li sans ki li guette ki ….ieme li pou été.
Apres tout, mariage li pas ene esclavage. Si ene madame pas oulé vine ene deuxième madame pou ene ki déjà ena so premier madame, alors personne pas capave force li pou marié. Ene mariage c'est ene contrat ki dimane le consentement missié et madame tous les deux pou li finalisé. Au lieu vine dire banne zomme pas marié deuxième ou troisième, empêche banne madames vine deuxième ou troisième madame kikene. Mais madame-là ki l'intérêt li ena dans evite faire ça quand li trouvé ki vaut mieux li ena ene bon dimoune derrière so ledos ki ki li vive tout seul pou vine ene proie pou toute sorte jouisseur. Ou bien li capave préfère vine ene deuxième pou ene kikene ki garde li bien au lieu marié avec ene célibataire ki pou ruine li toute longue la vie. Vaut mieux li reste avec kikene dans légalité avec l'honneur et respect ki laisse banne jouisseur jouir et joué avec so la vie sans prend la moindre responsabilité.

Débats lors M.P.L

Banne débats ki pé faire lors M.P.L à plusieurs niveau, li pas paraite ki ça pou aboutir à quelque chose positive. Parceki discussion-là pé mal faire. Ça ti bizin faire lors 3 points ki bien essentiel:
1. Eski ena ene Être Suprême ki fine crée l'Univers?
2. Eski Qour'aan-e-Kareem c'est le message de ça Être Suprême-là à l'humanité?
3. Eski Hazrat Mouhammad  li le Prophète, Envoyé et Dernier mais pli grand Nabi de ça Être Suprême-là?
Si ça trois kitchose-là fini établi, tout problème pou fini réglé. Parceki quand pou fini établi ki Qour'aan-e-Kareem c'est le dernier message d'Allah Ta'ala ki fine révélé lors le dernier prophète Hazrat Mouhammad , alors ça pou sufi pou croire et accepté ki tout ceki ena là-dans li vrai, correcte et dans l'avantage l'humanité en entier malgré li possible ki nou pas arrivé comprend certaine kitchose ou certaine point là-dans.
Dans le monde entier, ena boucou la loi ki en vigueur et ki ene quantité dimoune pas arrivé comprend banne raisons d'être de ça banne la loi-là. Mais aukene pays dans ça le monde-là pas autorise personne néglige kit la loi lors prétexte ki li pas pé comprend certaine point là-dans. Ça permette nou dire ki le monde d'accord par l'unanimité ki ene la loi li reste ene loi ki bizin respecté li, même si arrivé pas comprend certaine points là-dans.
Le fait ki Qour'aan-e-Kareem fine révélé de coté Allah Ta'ala lors Rassouloullah Hazrat Mouhammad , li ene réalité ki fine témoigné par toute ene génération. Et ça fine transmette de génération à génération.
Ti ena ene quantité ki ti l'ennemi acharné de Rassouloullah  mais finalement zotte pas fine capave résisté devant ça réalité-là et zotte fine fini par accepté li. Banne ki fine continué opposé, c'est necque par l'orgueil ki zotte fine faire ça. Mais zotte aussi zotte fine bien comprend la vérité-là.
C'est banne faits et banne données historiques ki fine être préservé de toute sorte de manipulation et ki fine être transmis de génération à génération dans ene façon pli authentique ki capave. Tourne le dos avec banne faits semblable li représente tourne le dos avec banne faits historiques. Ça li pou ene façon pou refuse accepté l'existence ene kitchose ki appelle l'histoire.
Quant à Rassouloullah (S.A.W), toute ene le peuple fine gagne l'occasion vive avec li pendant ene bon boute le temps. Ça fine permette zotte observe li avec tous banne tipti détail ziska so gros détail. Zotte fine étudié so banne caractères exemplaires et incomparables dans tous banne circonstances. Tout ça-là fine amene zotte vers ene seul conclusion: Hazrat Mouhammad  li ene Nabi (Prophète) parceki caractère très noble ki li possédé, c'est ene Nabi même ki capave possédé et le message ki li pé transmette, c'est ene message tellement éloquent ki ene telle éloquence li dépasse capacité humaine. Apart ca, banne miracles ki li fine montré, ça aussi li ene de banne preuve ki li ene Nabi. Ça li montré ki ena ene l'autre la force ki pé travail derrière ça. Et ça la force-là, c'est la force divine.
Banne miracles ki Rassouloullah (S.A.W) fine montré, fine témoigné par tout un chacun. Si le monde encore considère ça kitchose ki appelle témoignage-là, li pas pou ena aukene raison pou rejette ça banne miracles-là lors ene fausse prétexte ki ça c'est banne zistoire ça. Eski pas lors la base témoignage même ki ranne jugement dans la cour et dans tribunal? Eski pas lors témoignage même ki ene la cour li permette li condamne ene accusé à mort? Par la façon de faire, le monde pé montré ki témoignage c'est ene kitchose ki bizin accepté et bizin prend en considération si li ene témoignage ki vine de la part ene ki digne de foi.
Li bon conné ki la véracité de Rassouloullah (S.A.W) et so banne miracles ki li fine faire et l'authenticité de ça message ki li fine amené en forme de Qour'aan-e-Kareem, li basé lors banne témoignages solide et catégorique. Donc perna aukene raison pou pas considère li. Li tellement catégorique ki ene dimoune ki fine refuse accepté ça, li pas pou ena aukene justification ou kit raison pou justifié ceki li fine faire apart li dire ki li pas accepté.
Quand fine accepté ki Hazrat Mouhammad (S.A.W) li l'envoyé d'Allah Ta'ala et Qour'aan-e-Kareem c'est le message d'Allah Ta'ala à l'humanité ki encore existé dans so forme d'origine sans ki ça fine subir kit manipulation ou falsification, alors pas pou ena question pou pas mette li en pratique. La question de l'inégalité, l'injustice ou discrimination pas pou posé même parceki c'est le message du Créateur Suprême ki Juste, Sage et ki conne tout. C'est li même ki conné ki sanla ki li bizin, combien li bizin, quand li bizin et dans ki façon li bizin. C'est ene dernier imbécile même ki capave pretanne conne pli bien ki le Créateur Suprême.

--------------------------------------------------------------------

Redacteur en chef: Moufti Mouhammad Raffick Meerun
Email: jamiat2009@gmail.com
 

Al-Jamiat V.2 No 15

CAUSE VRAI !

Cause vrai ! Ou pli chagrin quand ou manque ene namaz ou bien quand ou perdi ene somme d’argent ? Ça li depanne eski ou ene dimoune dans Deen ou bien ou content dounia. Si ou content ou Deen, ou pou pli chagrin quand ou arrivé manque ene namaz. Nou pas dire ki ou pas pou chagrin quand ou perdi ene somme d’argent ou ene kitchose mondaine. Li tout à fait normal ki ene dimoune li senti li affecté quand li perdi kitchose. Mais ene dimoune dans Deen li éprouve la chagrin ene ti pé plis quand li perdi so namaz.

Cause vrai ! Eski ou madame li habille pou ou, ou bien pou lizié dimoune ? Si li vrai ki li pas habille pou lezot, abé ki faire li dévide so l’armoire quand li sorti ? Et dans la caze ena des fois ou capave pas reconnaite li !

Ene madame li gagne droit habille chic. Mais li bizin faire ça pou so missié dans so la caze. Li pas gagne droit expose so charme et so beauté ki Allah Ta’ala fine accorde li devant banne zommes étrangers. Li ene péché bien grave. Ene joli dimoune aussi quand li commette ene péché, li paraite bien vilain pou banne anges. Quand Allah Ta’ala fine donne nou beauté, laisse nou garde li bien pou nou paraite joli physiquement et aussi spirituellement.

Cause vrai ! Ene visage avec la barbe d'après sounnat li pli ressemblé avec le visage de Rassouloullah SAW ou bien ene visage bien rasé ? Mille ou justifié mais endans ou, ou bizin reconnaite ki rase la barbe jamais ti ene pratique islamique. Si ou pencore ena la volonté faire li, pas critique banne ki ena li ni dire ki perna narien dans perna li. Nou espéré ki ene jour ou pou réussi garde li si malgré ou appréciation, ou pas pé réussi garde li pou kit raison.

Cause vrai ! Eski Hazrat ‘Oumar RA pas conné ki veut dire bid’ah pli bien ki ou ? Ou pas capave pretanne le contraire. Bé ki faire ene pratique ki Hazrat ‘Oumar RA fine approuvé, ou qualifié li de bid'ah? Hazrat ‘Oumar RA fine approuve 20 rakaat taraawih mais ou qualifié li de bid'ah. Hazrat ‘Oumar RA compte trois talaaq ki fine donné ene seul coup comme trois talaaq. Et ou mathématique dire li compte ene seul. Ou pas capave déclare conne Deen et comprend hadice de Nabi SAW pli bien ki Hazrat ‘Oumar RA. Cause vrai! Vrai, pas vrai!

Cause vrai! Li pas pli bon faire khutbah jum'ah en arabe? Tout banané l'oummah fine pratique coumsa même. Si ou perna l'esprit desordeur, bé ki faire ou fine commence faire li en créole ki fine bouleverse l'oummah? Ki profit ou fine gagné dans faire ça apart divise musulmans? Ceki ti pé faire Eid ene jour avant tout dimoune, fine reconnaite so l'erreur. Nou salué so courage ki li fine aligne li avec l'oummah. Faudré pas attane quand position aggravé pou rétracté. Ki Allah Ta'ala donne nou tawfeeq reconnaite nou erreur!

Ene principe banale

Souvent dimoune ena tendance justifié ene façon faire ibaadat avec prétexte ki perna narien ki empêche faire ça ibaadat-là dans ça façon-là. Par exemple faire deuxième doah après banne namaz sounnat et nafil. Normalement doah c'est ene kitchose ki très recommandé. Là-dans perna aukene restriction tanque ene dimoune faire li à titre individuel. Mais quand dimoune faire li avec jamaate, là li prend ene l'autre tournure. Surtout quand dimoune commence faire li régulièrement avec jamaate, là li ena ene l'autre l'aspect.

Dimoune ki faire li, li dire ki perna narien dans faire li parceki perna narien dans shariat ki empêche faire li. Mais eski c'est ene bon principe ki capave servi pou soutenir ene pratique? En ceki concerne banne formes de ibaadat, ça principe-là li pas valable. Nou bizin adopté ça même forme de ibaadat ki banne salaf (Sahaba-e-Kiraam, Tabeines et Taba Tabeines) fine adopté. Banne forme de ibaadat ki banne salaf pas fine pratiqué, alors ça li pas d'après shariah. Quand banne salaf pas fine pratique ene forme de ibaadat, alors ça même sufi pou dire ki ça li pas bon. Li pas correcte ni li nécessaire dimane ene preuve spécifique cote zotte fine dire ki ça forme de ibaadat-là li pas bon. Banne salaf pas fine pratique deuxième doah après sounnat et nafil avec jamaate. Donc ça façon faire doah-là li pas d'après shariah. Si li ti d'après shariah, zotte ti bizin faire li.

Coumsa même ene banne ki autorise faire khutbah Jum'ah en créole aussi amène ene thèse pareil. C'est-à-dire d'après zotte perna narien dans shariah ki dire ki pas gagne droit faire li dans ene l'autre langue. Mais couma fine expliqué, ça façon raisonné-là li pas ene bon façon parceki le fait ki salaf pas fine faire li dans ça façon-là malgré ki ti ena la nécessité pou faire li dans ene l'autre langue, li sufi pou montré ki li pas ene bon façon faire khutbah. Pas nécessaire ena ene preuve spécifique ki empêche ça pratique-là.

Donc bizin pratique ene ibaadat d'après structure ki banne salaf fine pratiqué. Pratique li autrement et différemment li pou ene facon indésirable.

L’indépendance

Depi plis ki ene quart siècle chaque l’année nou pays pé fête l’indépendance. Mais ki ça l’indépendance ki nou pays pé fêté depi tout banané ? Nou pays ti dans la main ene l’autre. Lezot ti pé décide pou nou. Nou fine réussi tire nou pays depi dans ça la main-là et nou fine ena l’honneur prend nou propre décision pou nou propre l’avenir. Ça nou fine appelle li l’indépendance nou pays ki nou fêté chaque l’année.

Nou pays fine gagne l’indépendance mais nou même, nou encore pé subir l’esclavage parceki nou pencore libère nou de banne virus couma l’égoïsme, jalousie, rancune, l’orgueil, vantardise, l’injustice etc. Nou encore sous l’emprise de shaitaan. Nou pencore conne servi nou prochain. Li vrai ki nou pencore conne vive couma dimoune avec dimoune. Ça amene nou pou dire ki l’indépendance ki nou fine gagné c’est necque ene parti l’indépendance. Li pas l’indépendance complète. Ena encore boucou pou faire pou ki ça l’indépendance-là vine ene l’indépendance complète. Quand même, nou satisfait avec ceki nou ena. Mais sans ki ça empêche nou alle de l’avant et faire maximum zeffort pou perfectionne ceki nou ena.

Nou pou perfectionne ça par libère nou et débarrasse nou de banne maladies ki trouve dans nou l’intérieur ki fine détruire l’humanité de génération en génération. C’est ene defi ki nou banne dirigeants bizin relevé si vraiment zotte ena la volonté pou donne ça mot l’indépendance-là so vrai dimension et so valeur réelle. Sinon nou pays pou toujours ene joli cadavre avec ene endans totalement carriaté.

La Reconnaissance

Si kikene fine faire ou kit faveur, eski ou pou osé faire quelque chose ou agir avec li dans certaine manière ki pou déplaire li ? Li tout à fait normal et naturel ki ene dimoune bizin ena reconnaissance pou ene kikene ki fine traite li bien. De par so nature même ene dimoune li éprouve l’amitié pou kikene ki fine soulage li dans so banne moments difficile et fine faire li du bien. Donc ene dimoune ki encore pé raisonné, jamais capave perna reconnaissance pou ene ki fine ranne li service. Agir autrement li anormal, inhumain et pas naturel. C’est ene sentiment ki ene zanimau couma li chien aussi li éprouvé envers kikene ki fine mette ene ti boute lezos divant li. Ça veut dire ki ene être humain bizin ena ça qualité-là pli bien dans li.

Celui ki nou bizin pli reconnaissant envers li c’est Allah Ta’ala. C’est li même ki fine crée nou et fine accorde nou tout ceki nou bizin pou nou capave vive. Tous banne faveurs ki ena lors nou c’est so bonté et so faveur.

La santé, l’emploi, l’environnement favorable, l’harmonie et le bien-être en général, tout ça-là c’est faveur Allah Ta’ala. Allah Ta’ala dire dans Qour’aan-e-Kareem :

“Et tout ceki ena lors ou comme faveur li de coté Allah …” (S16/V53)

Perna aukene faveur ki sorti quelque part. ni ena kit possibilité ki li vine de quelque part apart Allah Ta’ala parceki li dans la main Allah Ta’ala même. Si tout ceki nou ena lors nou li faveur Allah Ta’ala et ça faveur-là li continué reste lors nou 24 lors 24, alors ki quantité reconnaissant nou bizin été envers Allah Ta’ala ? Ça pas capave estimé ni kikene capave faire li. Mais Allah Ta’ala de par so grâce et so bonté fine dimane nou pou montré nou reconnaissant envers li d’après nou capacité.

Nou montré nou reconnaissance envers Allah Ta’ala par amene nou la vie d’après ceki li oulé et par reste dans so l’obéissance. Pli grand reconnaissant c’est celui ki pli obéissant. Donc pli ou désobéir, pli ou vine ingrat. Finalement le plus ingrat c’est celui ki refuse accepté l’existence Allah Ta’ala. C’est banne ingrats ki pas reconnaite faveur Allah Ta’ala et ki refuse accepté so l’existence même ki Allah Ta’ala qualifié zotte de pli égaré ki banne zanimau.

LA POLITIQUE

Tanne dire ki bizin ene expert dans conne cause menti pou capave être ene politicien. Si ça vrai, veut dire ki ene bon musulman pas capave exerce la politique ni li capave être ene bon politicien. Autant ki nou conné, aukene religion pas autorise cause menti. Ça signifié ki ene homme de foi pas capave être ene bon politicien.

Et pourtant la politique pé être exercé partout à tout niveau. Eski ça li ene façon pou dire ki le monde li sous l’emprise de banne menteurs et de mensonge ? Tout ça-là pé arrivé acoze dimoune pé mal servi li. Sinon la politique dans so vrai sens, li signifié l’art de gouverner. Li ene kitchose indispensable dans la société. Bizin ena kikene ki épaule ça responsabilité-là pou ena la justice sociale et pou ki la société pas vive dans l’anarchie. Li ene kitchose très noble et louable pou celui ki capave faire li dans ene façon correct et convenable. Dans ene hadice ki trouve dans Saheeh Boukhari, Rassouloullah (s.a.w) dire :

"Ena sept catégories de personne ki Allah Ta’ala pou mette zotte enbas so l’ombrage ça jour ki pas pou ena aukene l’ombrage apart so l’ombrage : Premièrement ene chef (d’état) ki ‘aadil (juste) … "

Pou être ene dirigeant juste, li dimane trois kitchoses :

1. Le savoir faire,
2. L’honnêteté,
3. La volonté et le courage.
Le savoir faire pou guide li dans ceki li bizin faire. L’honnêteté pou empêche li agir contre ceki li conné. La volonté et le courage pou faire li applique ceki li conné.

Par exemple ene dirigeant li conné ki l’existence casino li cancéreux et néfaste pou la santé ene société. So l’honnête empêche li déclare le contraire. Et li ena le courage empêche casino opéré, même si ça ranne li impopulaire. C’est ene dirigeant pareil ki ene dirigeant juste et ki capave faire kitchose pou dresse la société. Par contre si ene dirigeant li marche d’après tendance le peuple, alors li pas pou capave faire narien apart soutire le peuple dans toute sorte bêtise. Li pou légalise homosexualité et banir la polygamie. Li pou autorise dimoune marche indécent et empêche madame mette hijaab. Tout ça-là ziste pou li capave reste au pouvoir. Zordi jour dimoune pé guette so l'intérêt avant tout. Si li trouve so l'intérêt dans donne ene kitchose ki li ti rassé hier et vice-versa, alors li pou faire li nez-nez ouvert. C'est ça même ki faire vice du hier vine vertu d'aujourd'hui et vice-versa. Ça veut dire ki perna aukene principe. Le but principal c'est pou reste à la tête du pays et au pouvoir. Ça but-là li autorise tout et légalise tout.
La politique fine vine analogue à tout ceki insignifiant. Acoze ça banne dimoune prend le terme la politique dans le sens insignifiant quand zotte dire "Eh pas vine faire politique ici."

Quantité et qualité

"Pas bizin guette quantité, bizin guette qualité."
Ça causé-là li ene causé ki ena boucou sagesse et li appliqué aussi dan boucou circonstance. Mais malgré ça, pas capave généralise li. Ça li appliqué quand ene coté ena boucou mauvais et l'autre coté ena tigite mais seulement li bon. Par exemple ene dimoune ena ene quantité zenfants mais zotte tous mauvais et ene l'autre dimoune ena ene seul zenfant mais li bien bon. Dans ene situation pareil nou dire: "Vaut mieux ene seul bon zenfant ki ou ena ene tas ki pas bon". Ena des fois, dans ene situation pareil ou tanne dimoune dire: "Vaut mieux perna même zenfant ki ena zenfant mauvais coumsa."

Couma ça aussi li possible ki ene dimoune ena ene quantité zenfants et zotte tous bon. Et ene l'autre ena ene seul zenfant mais li bien mauvais. Définitivement ça premier dimoune-là li dans ene meilleur position ki ça deuxième-là. Dans ça cas-là nou pas capave donne tigite préférence lors boucou parceki l'essentiel c'est ki ene kitchose bizin bon. Ene bon kitchose li reste toujours bon. Ene bon kitchose ki tigite li pli bon ki ene kitchose ki pas bon quand même li bien boucou. Ene bon kitchose ki li en grande quantité li pou pli bon encore. Donc comparaison-là li pas entre boucou et tigite, li entre bon et mauvais. Ceki mauvais-là li pou toujours inférieur à ceki bon quand même li en minorité. Donc quand ene ti minorité pé pratique le sounnah de Nabi SAW, ça li pli bon ki la grande majorité ki noyé dans bid'ah. Astere si ene kitchose fine pratiqué par la majorité de banne Sahaba-e-Kiraam, banne Tabeines et banne Taba-Tabeines, li pou encore pli bon. Ene pratique ki pou oppose ça, li pou être qualifié de ene pratique isolé, ene bid'ah et ene kitchose ki mérite d'être abandonné. Ici nou pas gagne droit amene ça thèse ki bizin guette qualité, pas quantité. Parceki si nou servi ça principe-là ici, nou pou contredire ceki Rassouloullah SAW fine enseigne nou. D'après hadice, nou bizin suive As-Sawaad Al-A'zam ki signifié la grande majorité. D'après ça même hadice, ene dimoune ki isole li de As-Sawaad Al-A'zam pou alle dans l'enfer.

Donc nou ena plusieurs principes devant nou:

1. Ene kitchose ki bon et li en grande quantité, li pli bon ki ene bon kitchose ki tigite ou bien ene mauvais kitchose ki boucou.

2. Ene mauvais kitchose ki en grande quantité li pli mauvais ki ene mauvais kitchose ki tigite.

3. Ene kitchose ki bon et ki tigite li pli bon ki ene mauvais kitchose quand même li boucou.

Quand nou dire As-Sawaad Al-A'zam, ça li vine d'après le principe numéro ene. C'est-à-dire banne sujet couma trois talaaq compte trois talaaq même, Khutbah Jum'ah bizin en arabe même etc. C'est banne sujet ki fine adopté par As-Sawaad Al-A'zam. Donc li pou ena priorité et préférence à tout niveau. Pas accepté ça, c'est ene façon pou isole ou de As-Sawaad Al-A'zam ki li ene kitchose bien grave.

Salaat-ud-Doha

Salaat-ud-Doha c'est ene namaz nafil ki varié entre deux à huit rakaat. D'après certaine hadice li dire ziska 12 rakaat aussi. Ça namaz-là faire dans gramatin. Le mot doha même signifié ça l'intervalle ki trouve entre levé du soleil ziska avant istiwaa. C'est-à-dire avant ki soleil complète so la moitié trajet.

Donc l'heure salaat-ud-doha li commencé à partir ki soleil fini levé et li resté ziska avant soleil complète so la moitié trajet. Mais so l'heure pli recommandé c'est quand soleil fini complète so ene quart trajet. A noté ki la moitié trajet ou ene quart trajet li par rapport à levé du soleil et couché du soleil.

Ene fois Rassouloullah SAW fine trouve banne Sahaba-e-Kiraam pé faire ça namaz-là ziste après levé du soleil. Lors ça li fine dire: "Salaat-ul-Awwaabeen c'est l'heure ki la patte banne ti chameau commence brûlé". Ça l'heure ki banne ti chameau commence gagne difficulté pou marché acoze chaleur, c'est ça l'heure quand soleil fine monte assez haute dans le ciel. Ça li arrive apeu près quand soleil fini complète so ene quart trajet. Donc d'après ça hadice-là, li permette pou faire ça namaz-là pli bonheur aussi apartir ki soleil fini levé. Mais so pli bon l'heure ou bien banne awwaabeen ou bien banne ki dévoué zotte l'heure faire ça namaz-là, c'est ça l'heure quand banne ti chameau commence gagne difficulté pou marché acoze li commence faire chaud et la terre fini bien chauffé.

Dans ça l'heure-là, normalement dimoune intéresse pou reposé. Malgré ça, quand ene dimoune li consacré ça l'heure-là dans faire namaz au lieu reposé, dans ene certaine façon li prouve so sincérité et so dévotion. Par ça rapport-là, ça namaz ki faire dans ça l'heure-là fine qualifié de ene namaz de banne awwaabeen (dévoués). C'est-à-dire ene namaz ki banne ki bien dévoué accomplir.

Ça namaz-là li dimane ene ti pé sacrifice enplis. Et ça c'est necque banne ki dévoué même capave ena li. Acoze ça, Nabi SAW dire:

"Personne apart ene ki awwaab (dévoué) même ki capave observe salaat-ud-doha régulièrement parceki ça c'est namaz ene ki awwaab (dévoué).

Couma ene dimoune li prouve so dévotion et so sincérité par engage ça l'heure-là dans namaz, coumsa même li exprime ça par consacré li dans namaz nafil pendant l'intervalle entre Maghrib et Esha. Par ça rapport-là li correct pou appelle ça namaz-là aussi salaat-ul-Awwaabeen couma ça fine être qualifié par Hazrat Abdullah Bin Abbaas RA et Hazrat Abdullah Bin 'Oumar RA. Li vrai ki salaat-ud-doha fine être qualifié de salaat-ul-Awwaabeen mais ça pas empêche ene l'autre namaz appelle par ça nom-là parceki fine appelle li par ça nom-là par rapport à l'état d'esprit ça banne dimoune ki accomplir ça namaz-là. Ça l'état d'esprit-là li capave existé dans plusieurs circonstances à l'occasion différent namaz. Li bon conné ki jamais salaat-ul-Awwaabeen ti ene nom propre pou salaat-ud-doha en sorte ki ça pas capave appliqué pou ene l'autre namaz.
Li pareil couma Rassouloullah SAW fine qualifié ene certaine façon faire namaz de salaat-ul-Mounaafiq. Couma nou conné ki ça nom-là li pas ene nom propre de kit namaz. C'est necque par rapport à certaine mauvaise façon ki trouve dans le mouswalli ki Rassouloullah SAW fine appelle ça namaz ki li faire-là salaat-ul-Mounaafiq.

Acoze ça même banne 'Oulama pas fine trouve aukene contradiction dans appelle namaz nafil après maghrib comme salaat-ul-Awwaabeen. Donc appelle ça namaz-là salaat-ul-Awwaabeen li pas ene fausse conception. Au contraire refuse accepté li ainsi li basé lors ene mal compréhension de hadice.

Hadice

"Ene personne ki donne depeine dans occupe banne veuves et banne dimoune pauvre, li couma dire ene dimoune ki pé combatte dans chemin Allah ou bien couma ene dimoune ki reste engagé dans Ibaadat pendant la nuit et ki garde roza dans la journée" (Sahih Boukhari)
Explication: Ena boucou récompense dans faire Ibaadat pendant la nuit. Coumsa même garde roza li ene kichose de grande mérite. Si ene personne pas gagne le temps ou bien li incapable faire tout ça-là acoze ki li pé donne so le temps dans occupe banne pauvres, alors d'après ça hadice-là, so banne z'effort pour être considéré couma banne zeffort ki ene dimoune donné dans faire Ibaadat dans la nuit et dans garde roza ou bien ene kikene ki faire jihad dans chemin Allah Ta'ala.
Normalement ene dimoune bizin faire boucou sacrifice et boucou zeffort pou faire banne Ibaadat pareil ki tous déjà conné. Le hadice fine compare zeffort ene ki occupe bannes veuves et bannes pauvres avec zeffort ça banne Ibaadat difficile-là pou donne ene l'idée de la valeur et mérite de ça travail ki normalement dimoune ena tendance pas considère li couma ene grand travail.

Sounnat avant namaz Zohar

Avant faraz de namaz zohar ena 2 rakaat ou bien 4 rakaat sounnat? Ena hadice ki dire Rassouloullah SAW ti pé faire 2 rakaat couma ena hadice ki dire ki Rassouloullah SAW ti pé faire 4 rakaat. Mais pli boucou hadice faire mention de 4 rakaat. Et la plupart du temps, Rassouloullah SAW ti pé faire 4 rakaat. Acoze ça, selon Imaam Tirmizi, la majorité de Sahaba-e-Kiraam et de Tabeines ti préfère faire 4 rakaat avant faraz namaz zohar.

...............................................................................

Redacteur en chef: Moufti Mouhammad Raffick Meerun
Email: jamiat2009@gmail.com