AL-Jamiat V.3 No.6

Tabligh Jamaate

Et

Commentaire ene ducal dans Deen

Commentaire:

Tout ceki ti ena pou expliqué concernant Tabligh Jamaate, le prophète r fine fini cause tout. Pas dans 14eme siècle ki (Hazrat Maulana) Mouhammad Ilyaas pou montré nou ene nouveau façon de faire (40 jours ou 4 mois).

Ça c'est ene commentaire ki ene personne fine faire. Li paraite ça li émane de ene personne ki manque sens du respect ou bien ki perna même sens du respect pou banne seniors dans Deen. A nou avis, ça commentaire-là pas mérite aukene réponse. Mais nou reconnaite ki banne ducal dans Deen zotte capave induire banne ducal pareil couma zotte dans l'erreur par zotte banne commentaire banal. Donc nou fine juge li pli correct pou expliqué ki ignoré.

Réponse:

Faire ene nombre d'années pou apprane Deen dans l'université, pas ti ena ça dans l'époque Rassouloullah r. Mais zordi nou trouvé ki dimoune zotte tellement pas intéressé avec Deen, ki pé bizin paye zotte gros la monnaie pou zotte apprane Deen. Chaque l'année bizin donne zotte billet allé-retour. Tout ça-là zisse pou gagne ene certificat ou ene diplôme B.A ou M.A. et finalement avec ça même certificat B.A ou M.A zotte arrivé embête le public en général ki attiré par l'apparence. Eski ti ena ça ti boute papier B.A ou M.A dans Deen dans l'époque Rassouloullah r? C'est ene système kaafir ki banne l'université islamique aussi pé adopté. Si 40 jours ou 4 mois pas ti ena, eski 7 ans ou 10 ans apprane Deen dans l'université ti ena li dans l'époque Rassouloullah r? Système l'éducation ki prévaloir dans banne l'université islamique zordi jour, eski ti ena li dans l'époque Rassouloullah r ou bien ça fine bizin adopté pou adapté avec le temps? Définitivement pas ti ena li. Si malgré ça li correcte, alors ki pas bon avec 40 jours ou 4 mois si fine adopté li comme ene durée de temps avec but pou couvert ene certaine stage de formation islamique?

Souvent zotte annonce banne cours de certain nombre de sessions. Eski ça système-là ti existé? Si li pas ti existé, et en réalité ça pas ti existé dans l'époque Rassouloullah r, alors ki manière zotte permette zotte adopté li? Si malgré ça li correct, alors ki faire 40 jours ou 4 mois pas correcte? 40 jours ou 4 mois li couma tous lezot système l'éducation ki fine fixé comme ene durée de temps avec but pou couvert ene certaine syllabus ou ene certaine stage.

Manzere gousse = criminel social

C'est ene dimoune indigne ki prend bribe (mange gousse). Ene société cote tipti ziska so grand pé prend bribe, li ene société indigne malgré ki zotte capave paraite sociable. Ça manière mange gousse ki prévaloir à tout niveau, li brise l'avenir ene quantité ki compétent et ki fine faire la nuit lijour vine ene, pou zotte faire ene bon carrière mais malheureusement zotte fine reste attrape zotte ti boute papier dans zotte la main sans gagne l'occasion servi la société zisse acoze ki zotte pas fine "chanté" (donne gousse). Banne ki pas compétent fine arrive acote zotte pas ti mérité zisse acoze zotte appartenance sociale, ethnique ou politique. Valeur du jour nou trouve nou dans ene situation cotte banne compétent pé être dirigé par banne ki pas compétent. Nabi r fine dire dans ene hadice:

"Quand banne responsabilité important (poste clé) pou être confié à banne ki pas compétent pou ça, donc attane Qiyaamat."

Réflexion

Si ou pas gagne droit lire Qour'aan-e-Kareem ene quantité fort ki ça dérange ene dimoune, eski ou pou gagne droit dérange toute ene localité dans zotte sommeil par la pratique haraam de "gamate"? Ceki pli étonnant, ou attane après tout ça-là pou gagne barakat dans mariage ou zenfant!

Valeur chaque seconde ki passé dans faire zikrullah, li pas moins ki l'univers. Ça natte déchire-déchiré cote banne Ahle-Wafaa (banne ki sincère envers Allah Ta'ala) assizé pou faire zikrullah, li pas moins ki trône banne le roi.                                                                                (Aarif Billah Hazrat Maulana Hakeem Akhtar Sahab)

A Tabligh jamaate : 40 jours ou 4 mois ???

Question:

Banne Tabligh Jamaate zotte 40 jours ou zotte 4 mois cote sorti ça? Eski ti ena ça dans l'époque Rassouloullah r?

Réponse:

Dans l'époque Rassouloullah r pas ti ena le système d'éducation ki zordi nou ena. Dans ça l'époque-là, banne Sahaba-e-Kiraam ti pé apprane par tendé seulement. Pas ti ena banne accessoires couma plume, cahier, tableau, la craie etc. Le système écrire ti presque inexistant. Ça ti tellement rare ki dans ene certaine l'époque pas ti considère li même autorisé et permette. Mais zordi couma nou conné, le système l'éducation fine évolué pou capave adapté avec l'époque ki nou pé vive.

Coumsa même le système l'école maternelle, primaire, secondaire, universitaire, cote ti existé dans l'époque Rassouloullah r! Mais quand même, nou fine trouve la nécessité faire l'éducation Deen de la nouvelle génération par passe par ça système-là. Ça jamais fine être contesté par kikene lors prétexte ki ça genre de l'éducation Deen-là pas ti existé dans l'époque Rassouloullah r. Similairement faire 4 ans ou 5 ans au niveau universitaire pou apprane Deen pas ti existé dans l'époque Rassouloullah r. Coumsa même le degré de B.A ou M.A ou PhD dans Shariah, c'est banne diplômes et banne degré ki fine copié avec système kaafir. Ceki bien drôle, c'est banne dimoune ki écrire B.A en Shariah ou M.A en Shariah avec zotte nom ki faire banne objection futile couma "Cote ena 40 jours ou 4 mois dans Shariah".

Li vraiment ridicule ki dimoune avoye roche dans la cour lezot quand so la caze même li en vitre. Si 40 jours ou 4 mois pas ti existé, alors ki verset ou ki hadice dans Boukhari, Muslim ou dans lezot livre hadice ou capave montré lors faire B.A, M.A ou PhD dans Shariah? Montré ene hadice si ena, quand même li ene hadice fabriqué aussi! Si malgré tout ça-là, capave ena justification pou adopté ene tel système de l'éducation, alors ki empêche nou accepté 40 jours ou 4 mois ki fine fixé zisse couma ene délai pou assure ene certaine niveau de formation islamique là-dans?

Dans l'Islam perna aukene mention de B.A ou M.A ou PhD en Shariah. Mais nou ena banne mention de banne délai de 40 jours ou 4 mois dans l'Islam ki nuancé avec ceki fine adopté dans tabligh jamaate. Dans ene hadice ki trouve dans le Mouswannaf Abdurrazzaaq, Hazrat Abou Hourairah t dire:

"من رابط اربعين ليلة فقد اكمل الرباط"

"Celui ki fine alle lors frontière pou surveille frontière pendant 40 nuit, alors certainement li fine complète le (délai de) ribaat (surveille frontière)." (Mouswannaf Abdurrazzaaq)

C'est-à-dire ene ribaat complète c'est ene ribaat ki faire continuellement pendant ene période de 40 jours. Normalement banne Sahaba-e-Kiraam ti comprend surveille frontière islamique contre l'attaque banne l'ennemi même comme ribaat. Mais Rassouloullah r fine attire zotte l'attention ki le vrai ribaat c'est surveille frontière de ou Deen et de ou Imaan contre l'attaque shaitaan par continué reste dans ibaadat. Selon ene hadice rapporté par Hazrat Abou Hourairah t ki trouve dans Sahih Muslim, Rassouloullah r fine qualifié attane namaz après namaz etc. de ene véritable ribaat. Coumsa même selon ene hadice ki trouve dans Mousnad Ahmad, Rassouloullah r fine dire:

"منتظر الصلاة من بعد الصلاة كفارس اشتد به فرسه فى سبيل الله على كشحه تصلى عليه ملائكة الله ما لم يحدث او يقوم وهو فى الرباط الاكبر "

"Ene personne ki attane namaz après namaz, li couma ene cavalier ki so cheval pé galoupe avec li lors so le dos dans chemin Allah Ta'ala. Allah Ta'ala so banne farishta zotte continué faire douah dans so faveur tanque ki so wazou pas cassé ou bien tanque ki li pas levé (depi dans ça place-là). Et ça personne-là li engagé dans الرباط الاكبر  (pli grand  ribaat)." (Mousnad Ahmad).

Ça signifié ki ki ena deux sorte de ribaat. Ene ki faire lors frontière, face à face avec banne l'ennemi visible. Et deuxième, c'est ene combat ki ene dimoune faire avec so nafs, c'est-à-dire li résisté contre so banne désirs et so banne passions par garde li engagé dans banne ibaadat. Ça combat-là li qualifié de ene combat supérieur par Rassouloullah r vu ki li ene combat permanent et bien difficile. Dans ça combat-là, ene dimoune li surveille frontière de so Deen et de so Imaan conte l'attaque de shaitaan. D'après tous banne savants de l'Islam, le combat pli essentiel et pli dur, c'est le combat conte so nafs, so désir et so passion. Dans ene hadice ki trouve dans Tirmizi, Rassouloullah r dire:

" المجاهد من جاهد نفسه"

"Le (véritable) Mujahid, c'est celui ki faire jihad (ki amene combat) contre so nafs". (Tirmizi)

Sheik Mullah Ali Al-Qari dire dans so Al-Mirqaat:

"والمجاهد اى الحقيقى من جاهد نفسه فى طاعة الله اذ هو الجهاد الاكبر وينشأ منه الجهاد الاصغر"

(المرقات شرح المشكاة)

Le Mujahid, c'est-à-dire le véritable Mujahid c'est celui ki combatte so nafs dans l'obéissance Allah Ta'ala parceki ça c'est Jihad Akbar (pli grand jihad) et apartir ça même le jihaad Asgar (ti jihad) émergé.

(Al-Mirqaat commentaire lors Al-Mishkaat)

C'est-à-dire résisté contre désir, plaisir et passion et reste engagé dans l'obéissance Allah Ta'ala, c'est ça même véritable et pli grand jihad ki donne naissance à son tour à jihaad Asghar ou bien ceki nou appelle jihaad avec banne l'ennemi visible.

Quand ene dimoune li sorti dans jamaate, li gagne maximum le temps pou li reste engagé dans ibaadat et banne activités de Deen. En fait li faire ene l'entraînement pendant ene bon boute le temps pou combatte so nafs, résisté contre so banne l'habitudes, activités et so banne passions injustifié. Doucement doucement ça permette li consacré entier so la vie pou Allah Ta'ala et vine ene bon mususlman. En réalité c'est ene zeffort pou reste engagé dans l'obéissance Allah Ta'ala ki faire li vine le ribaat Al-Akbar ou bien le pli grand jihaad.

Selon ene hadice ki trouve dans sahih Boukhari, Rassouloullah r fine dire:

"رباط يوم فى سبيل الله خير من الدنيا وما فيها ..." (البخارى)

"Ene jour so surveillance lors frontière li meilleure ki le monde et tout ceki ena là-dans …"

D'après Allaamah Bin Hajar (R), ça récompense-là li applique pou tous banne qualités ribaat. Au contraire li pou applique pli bien pou Ribaat-Al-Akbar. Donc pou chaque jour ki ene dimoune sorti dans jamaat avec l'intention pou forme li même, li gagne ça récompense-là.

Ar-Rahmaan

Ar-Rahmaan li sorti depi Ar-Rahmah ki signifié bénédiction ou ene tendresse ki rempli de bonté. Allah Ta'ala li Ar-Rahmaan dans le sens ki li rempli de pitié et de bonté énorme ki perna limite.

Ene dimoune li chagrin so camarade quand li trouve li dans la misère ou dans kit difficulté. Li oulé aide li d'après so capacité. Parfois li trouve li incapable pou aide li malgré ki li ena la volonté ferme pou aide li.

Mais Allah Ta'ala li ena capacité lors tout kitchose. Donc li Ar-Rahmaan dans le sens ki li vine en aide à so serviteur dans tout banne circonstance quand so serviteur dimane li so grâce et et so faveur. D'après ene hadice, Allah Ta'ala li content so banne serviteurs plis ki ene mama content so ti bébé ki pé encore boire avec li. Allah Ta'ala dire dans Qour'aan-e-Kareem:

"Et mo Rahmat (pitié) li couvert tout kitchose …" (S7/V156)

Dimoune dans difficulté ena tendance pense et tappe la porte ene ki li ena l'espoir dans so bonté. Parfois li réussi couma parfois li déçu. Donc ki faire na pas tappe la porte de Ar-Rahmaan ki so la porte de bonté reste ouvert 7 lors 7, nuit et jour, dans tout saison avec ene réussite et garanti à 100 pour 100?

Mais Allah Ta'ala so Rahmat li dessane dans différent forme. Ena fois li dessane en forme de difficulté aussi ki nou appelle "Blessing in disguise".

Ar-Rahmaan so bonté li pas restreint à banne ki dans Deen seulement. Ar-Rahmaan so bonté li ouvert pou banne pécheurs aussi parceki li Rabb pou tous. Mais eski li joli abuse bonté ene Rabb aussi généreux ki rempli de pitié immense par casse so banne l'ordres?

اَللهُمَّ ارْحَمْنِىْ بِتَرْكِ الْمَعَاصِىْ اَبَدًا مَا اَبْقَيْتَنِىْ

"O Allah! Dessane Rahmat (pitié) lors moi par accorde moi le tawfeeq quitte banne péchés tout le temps tanque to garde moi!"

Ene dimoune ki ena dignité, li pou toujours reconnaissant envers ene ki fine ranne li kit service. Li pou ena tendance pas déplaire li. Ene dimoune digne, li toujours ene dimoune ki ena reconnaissance. Donc ene dimoune digne pou toujours reconnaissant envers Ar-Rahmaan ki so Rahmah (bonté) pé dessane à chaque instant lors li.

Si ene dimoune li ena vraiment reconnaissance pou Allah Ta'ala, li pou servi le Rahmah ki li fine gagné en forme de courage, la santé, la richesse, lizié, zoreille, la bouche, la main, li pied etc. dans Allah Ta'ala so l'obéissance.

La méditation lors ça ene attribut-là même li sufi pou change nou la vie. C'est ene attribut ki ena le message de l'amitié, l'espoir et soumission à Allah Ta'ala ki couvert chaque atome de l'univers par so Rahmah infinie à chaque instant.

Choisir ou camp!

Allah content humilité!

Allah pas content l'orgueil!

Développe dans ou ceki Allah Ta'ala content! Vine humble! Tous banne bon dimoune ti banne dimoune humble. Tous banne prophète, zotte ti ena humilité à ene degré très avancé. Perna aukene bon dimoune ki fine ena l'orgueil dans li parceki l'orgueil et piété li couma dire chatte li chien. C'est à nou pou guetté dans ki camp nou envi retrouve nou. Camp banne bon dimoune ou bien dans camp banne couma Fir'aun, Namroud, Abou Jahal etc. Marqué gardé, a peine ou pensé ki ou même "TOP", tout de suite ou déviré ou vine "POT".

Destination, l'énergie, orientation et la volonté

Ene dimoune sage c'est ene dimoune ki ena ene but dans la vie. Ça but-là c'est so destination. Pou arrive lors so destination, li bizin d'abord ena deux kitchoses:

1. L'énergie ki pou faire li bougé et
2. L'orientation ki pou faire li dirigé vers so destination.

Si li conne la direction cote li bizin ena pou allé, mais li perna l'énergie voulue pou li alle dans ça direction-là, li pou reste en place. Coumsa même si li ena l'énergie mais li mal oriente so l'énergie, li pou gaspille li dans ene direction ki pou éloigne li de plis en plis de so destination. Après tout ça-là, bizin ena l'autre kitchose ki encore pli important. C'est la volonté pou servi ceki li ena à so disposition pou arrive lors destination. Ene dimoune li capave conné cote li ena pou allé et li ena aussi l'énergie mais li perna la volonté pou servi so l'énergie dans ça direction-là. Li pou bouge fixe sans ki li faire kit l'avancement.

Zordi jour nou banne jeunes pé gaspille zotte la vie soit acoze manque de volonté ou bien acoze mal orientation. Nou bizin reconnaite, nou ena boucou nou banne jeunes ki zotte bien dévoués et bien sincère. Mais zotte pé mal orienté par banne "prédicateurs" ducal et irresponsable ki fine amene zotte à ene point cote zotte permette zotte dénigré banne 'Oulama couma Sheikh Mouhayiddeen Ibn-ul-Arabi (R) et Sheikh Jalaaluddeen Rumi (R) aussi.

Donc le temps, l'énergie et zeffort nou banne jeunes pé gaspillé dans critique banne 'Oulama et dans developpe rancune pou banne ki pas d'accord avec zotte. Premier kitchose ki ou apprane avec ça banne "prédicateurs ducal-là", c'est manque du respect. Avant ou conne zotte, ou ti ene dimoune humble, doux et calme. Couma ou rente avec zotte, ou transforme en ene personne grossier et vulgaire à tel point ki ça li manifesté ziska dans ou namaz aussi. Acoze ça banne 'Oulama dire ki quand ou trouvé ki par fréquente ene 'Aalim, ou pé approché avec Allah Ta'ala et de plis en plis ou ena l'amitié pou ou prochain, alors conné ki ou dans ene bon l'entourage. Par contre si ou remarqué ki ou fine commence faire namaz couma gagné, par exemple ou pé mette T-shirt ou pé faire namaz avec ou cheveux chifonne-chifonné, alors ou bizin conné ki ou l'entourage pas bon. Pas attane pou l'entourage-là dire ou ki li pas bon. Ou bizin remarque ou caractère doux ki ou ti ena avant ou vine dans ça l'entourage-là. Ça même sufi pou montré ki li pas bon.

Punition ki gagné quand pas faire namaz

1. "Celui ki fine quitte namaz, couma dire li fine faire Kufr" (Abu Dawood)
2. "Barrière entre Imaan et Kufr, c'est namaz" (Mouslim/Ahmad)
3. "Celui ki quitte namaz avec connaissance, Allah so protection li enlevé depi lors li …" (Mousnad Ahmad)
4. "Celui ki pas ponctuelle lors namaz, pou levé jour Qiyaamat avec Qaaroune, Fir'aun, Hamaan et Ubayy Bin Khalaf." (Mousnad Ahmad)

 Question:

Eski ene madame capave alle faire hajj avec so belle-mère so frère, c'est à dire so missié so mamou?

Réponse:

Non, li pas capave allé parceki si so missié quitte li, li pou gagne droit marié avec so missié so mamou. Donc li pas ene mahram. A noté ki ene mahram c'est ene kikene ki ene madame pas gagne droit marié avec li jamais.

Question:

Ene missié ki ena ene garçon de so premier madame, fine marié avec ene madame ki ena ene tifille de so premier missié. Eski ça garçon-là capave marié avec ça madame-là so tifille?

Réponse:

Oui, li capave marié parceki zotte perna aukene relation disang ni kit relation dulait. C'est necque ça missié-là ki pas capave marié avec ça tifille-là et ça madame-là pas capave marié avec ça garçon-là.

Hadice:

"Action pli appréciable auprès d'Allah Ta'ala, c'est ene action ki faire li régulièrement, même si li tigite." (Boukhari/Mouslim)

Explication:

Ça hadice-là pé faire référence à ene action supplémentaire et nafil. D'après ça hadice-là, li pli bon faire ene tigite nafil mais régulièrement, ki faire li ene seul jour boucou et après ça arrête faire li. Par exemple li pli bon ki ene dimoune li lire Qour'aan ene tigite tous les jours ki li faire ene khatam entier dans ene seul jour et après ça li pas lire ditout. Donc vaut mieux tigite tous les jours ki boucou ene seul jour.

Ça tigite ki ene dimoune faire tous les jours lors ene base régulier, li ena pli bon l'effet et ki Allah Ta'ala pli content, par rapport à ene action en grande quantité mais ki pas faire li lors ene base régulier.

Redacteur en chef: Moufti Mouhammad Raffick Meerun
Email: jamiat2009@gmail.com
 

AL-Jamiat V.3 No.5

Karaamat Ibrahim At-Taimi rahmatoullahi ‘alayh

“Ene fois Hazrat Ibrahim At-Taimi rahmatoullahi ‘alayh fine sorti pou alle cherche nourriture pou so la famille. Mais li pas fine réussi gagne narien. En retour, li fine traverse acote ene l’endroit ki so la terre ti rouge. Alors li fine rempli so sac avec ene ti pé ça la terre-là et li fine retourne so la caze. Quand li fine ouvert so sac, li fine trouvé ki ça fine converti en du blé couleur rouge.” (Al Fourqaan par Allaamah Ibn Taimiyah (R)

 Explication :

Ça c’est ene karaamat ki Allah Ta’ala fine accorde Hazrat Ibrahim At-Taimi rahmatoullahi ‘alayh ki ti ene Tabei. Dans Qour’aan-e-Kareem, Allah Ta’ala fine promette tout ceki reste dans so l’obéissance, ki li pou donne zotte, zotte nourriture dans ene façon ki jamais zotte ti à croire. Karaamat ki ene personne gagné, li gagne li de coté Allah Ta’ala par Barakat suive Rassouloullah r. Tout karaamat ki arrivé avec n’importe ki wali, li ene l’honneur pou Rassouloullah r. Rassouloullah r li couma ene institution. Le succès et la réussite de n’importe ki étudiant, li ene l’honneur ki retourne vers l’institution. Ou bien li couma ene l’océan. Mérite de chaque goutte de l’eau li ene mérite et ene l'honneur pou ça l’océan-là.

Li bien triste pou constaté ki banne anecdotes pareille quand zotte paraite dans Fazail-e-‘Aamal de Sheikh-ul-Hadice Hazrat Maulana Zakariyyah rahmatoullahi ‘alayh, ça li qualifié de banne fausse zistoires par banne soi-disant B.A ou M.A dans shariat. Eski ça banne B.A ou M.A dans shariat-là, zotte pou ena le courage traite le livre Al-Fourqaan de Allaamah Ibn Taimiyah de ene livre de banne fausse zistoires ?

Ça même livre de Allaamah Bin Taimiyah (R) mentionne ene l'autre anecdote selon lequel ene personne so bourrique ti mort mais ki Allah Ta’ala fine faire li revive quand ça personnage-là fine faire doah. Selon ene l’autre anecdote, ene personne fine gagne faim. Alors li fine faire doah. Donc ene grappe tamme enveloppé dans ene tissue en la soie fine tombé derrière li ki li fine mangé et ki le reste fine continué reste acote so madame pendant ene bon boute le temps. D’après ene l’autre anecdote, ene personne ki ti paralysée fine faire doah avec Allah pou ki so la main li pied largué dans l’heure wazou. Et coumsa même ti pé arrivé.

Tous ça banne anecdotes-là zotte trouve dans Al-Fourqaan de Allaamah Ibn Taimiyyah (R). Eski banne ki fine qualifié le Fazail-e-‘Aamal de ene livre de fausse zistoire acoze banne anecdotes pareille pou ena le courage critique le Al-Fourqaan de Allaamah Ibn Taimiyyah ? Nou pou reste attane!

Zenes conne to valeur!

Zenes! To ena tout dans toi ki permette toi faire grand progrès dans to la vie. Mais to bizin conne investi et gère to courage, to savoir et to le temps. Ki sanla ki fine embête toi ki faudré to cheveu bizin vine blanc pou to commence faire bon? Si to ti conné ki quantité to Rabb li content et apprécié ça Ibaadat ki to faire dans to jeunesse! Laisse mo dire toi mo garçon ki ene Ibaadat pareil pou faire toi gagne to place dans l'ombrage acote Allah Ta'ala quand tous dimoune pou grillé dans ene soleil ki pou dessane nette enbas. Li vraiment ene grand l'honneur ça si to ti capave saisi so valeur.

Donc ki faire pas sacrifié tout de toi pou to Rabb ki li Al-Hayy (vivant éternellement) et Al-Qayyoum (indépendant) si vraiment to oulé donne to l'existence même so vrai valeur et so dimension réelle?

Qazi Sana'oullah (R):

"Aukene parole pas acceptable tanque na pas mette li en pratique. Aukene pratique et aukene parole pas acceptable tanque perna bon l'intention. Aukene l'intention, pratique et parole pas acceptable tanque li pas d'après sounnat".

 

 faire namaz tout seul dans ene saff

Li pas bon lire namaz tout seul dans ene saff quand pé faire namaz avec jamaat. Quand ene dimoune vine dans masjid et li trouve banne saff fine rempli, alors li pas diboute tout seul. Li bon ki li risse ene mouswalli avec li afin ki li pas reste tout seul dans ene saff. Ça c'est le principe. Dans applique ça principe-là, li possible ki dimoune-là pas comprend et li capave casse so namaz. Dans ene cas pareil, faudré pas risse kikene. Vaut mieux faire namaz tout seul ki casse kikene so namaz. Zordi jour, bon bon dimoune aussi pas conne principe. Acoze ça bizin pas applique ça principe-là. Parceki nou applique principe pou arrangé. Si acoze l'ignorance banne dimoune li vine ene moyen pou dérangé au lieu arrangé, alors li perdi so raison d'être. Bizin pas faire li. Mais bizin continué instruire dimoune pou zotte arrive dans ene stage cote capave applique tous banne principes.

Allah, le véritable bien-aimé

Quand ene dimoune li bien avec nou, nou ena tendance pas faire narien ki capave déplaire li. Ena des fois nou gagne invitation acote kikene. Nou conne très bien ki ça invitation-là li pas encadré avec principe islamique. Mais nou trouve nou dans ene grand l'embarras pou refuse so l'invitation zisse acoze ki li ene très bon dimoune ki ena très bonne relation avec nou.

Eski ena kikene ki pli bon ki Allah Ta'ala? Eski ena kikene ki fine faire pli boucou faveur lors nou ki Allah Ta'ala? Définitivement non, non et non! Bé alors ki faire nou pas capave résisté contre nou banne tentations, nou banne plaisirs et nou banne désirs zisse pou pas déplaire nou Rabb, le pli grand et véritable bien-aimé de tous?

Réflexion

Pou ou trouve banne tache ki ena lors ou visage, ou bizin guette ou dans ene miroir. Mais si ou trouve kit défaut, pas bizin lève ek miroir-là au lieu tire banne tache-là depi lors ou visage. Parceki défaut-là li trouve dans ou. Si ena pou lève contre kikene, ou bizin lève ek ou même. Miroir-là fine ranne ou service quand li fine montré ou ceki ena lors ou visage. Perna aukene défaut dans miroir-là. Coumsa même si kikene attire ou l'attention lors ene défaut et si arrivé ça défaut-là li trouve dans ou, ou bizin reconnaissant envers ça kikene-là. Faudré pas ou lève ek li. Si jamais ou ti pé alle guette tifille avec ene visage ki ene coté moustache fine tiré et ene dimoune fine attire ou l'attention à temps, ou pou remercié ça dimoune-là parceki li fine sappe ou de ene grand la honte. Li pas facile paraite couma ene cartoon divant toute ene la famille et surtout quand ou fine alle guette tifille cote ou bizin pli chic ki capave dans ou la vie. Coumsa même nou ena pou présenté devant Allah Soubhanahou Wa Ta'ala, devant nou Rabb, devant nou bien-aimé. Nou bizin faire maximum zeffort pou nou capave présenté dans ene façon désirable. Si ene dimoune attire nou l'attention vers ene quelque chose ki capave faire nou paraite indésirable divant nou Rabb jour Qiyaamat, alors nou bizin remercié li boucou. Nou bizin suive la mode et le model parfait de Rassouloullah r pou capave paraite bien dans regard Allah Ta'ala.

Hazrat Junaid Baghdaadi (R)

Hazrat Junaid Baghdaadi (R) ki le monde conne li par ene très grand wali, fine gagne ça degré et ça valeur-là par sacrifié so l'honneur, so célébrité et so popularité en faveur ene dimoune bien pauvre ki ti sorte depi dans la famille de Rassouloullah r. L'amitié pou Rassouloullah r li vraiment ene cadeau inestimable et incomparable.

Ki quantité malheureux li été celui ki capave rase so la barbe pou ene cadavre mobile ou bien acoze li honté avec dimoune mais li pas capave garde li dans l'amitié de nou Habeeb Rassouloullah r!

Causé inutile

D'après Qour'aan-e-Kareem et hadice de Nabi r, ene bon musulman bizin pas engage li dans kit activité inutile.

Inutile c'est ene kitchose ki perna aukene bénéfice dans dounia ni dans aakhirat. Dans ene l'époque cote dimoune pas pé conné ki appelle Imaan, couma faire wazou, couma faire roussal, couma faire namaz, vine soulève banne sujets compliqué couma cote Allah été, Wahdatul-Woujoud et Taqdeer (destin), c'est vraiment ene perte de temps et ene travail inutile ki pé dévié le public de ceki pli essentiel. C'est banne kitchose ki appelle Moutashaabihaat ou bien banne kitchose extrêmement compliqué ki apart Allah Ta'ala personne pas conne so vrai porté.

Banne ki Allah Ta'ala fine accorde zote la vrai connaissance, zotte amene Imaan sans rente dans les détails. Par contre banne ki soulève banne sujets pareils, c'est banne ki Qour'aan-e-Kareem qualifié zotte de banne ki zotte le cœur travers. Li dans l'intérêt de nou Imaan ki nou amène Imaan lors ça banne sujets-là sans rente dans les détails. Sinon nou pou perdi nou la vie précieux sans gagne narien.

ISTIQAAMAT OU STABILITE DANS DEEN

Nou bizin faire bon travail et pou ki ça bon travail-là ena so l'effet ki bizin, bizin faire li régulièrement. Disons si ene jour nou fine prend ene livre et nou fine lire ene kitchose, ça lecture-là li ene kitchose très bénéfique. Mais li pou vraiment bénéfique quand nou faire li tout le jour. Faire ene bon travail tout le jour et régulièrement sans ratte li, appelle li Istiqaamat. Banne 'Oulama dire ki Istiqaamat ou stabilité ou ponctualité lors ene certaine bon travail, li vaut plis ki 1000 karaamat (miracle). C'est parceki pou lève ene poids de 200-300 lbs pendant 2-3 seconds, li bien facile. Ene quantité dimoune capave faire li. Mais pou tini ene poids de 1/2 lbs régulièrement, ça li bien difficile. Li couma dire ou fine passe ene seul nuit dans Ibaadat ene fois le temps. Ça li tellement facile ki ene dimoune ki jamais fine lire namaz dans so la vie, li aussi li capave faire li sans kit difficulté. Pourtant 2 rakaat fajar ou bien 4 rakaat namaz Esha, boucou dimoune trouve li difficile pou faire li tout le jour.

Quand Rassouloullah r ti pé faire ene kitchose, li ti content faire li régulièrement. Acoze ça li fine recommande nou pou adopté banne ibaadat supplémentaire dans ene quantité ki li na pas vine ene fardeau à la longue. D'après Allaamah Bin Hajar Asqalaani dire:

"Nou bizin adopté banne ibaadat supplémentaire tigite par tigite. Nou faire ça ibaadat-là pendant ene bon boute le temps ziska ki ça fine rente dans nou system et nou fine adapté avec li avant ki nou augmente li. C'est dans ça façon-là ki nou capave gagne Istiqaamat dans Ibaadat.

Si nou envi gagne Istiqamat dans faire tilaawat Qour'aan, alors nou commence faire tilaawat Qour'aan ene quantité ki li pas vine ene fardeau à la longue. Nou commence faire li quand même ene seul page mais nou faire li tout le jour. Coumsa même nou tire 5-10 mins tout le jour pou faire zikrullah. Mais nou faire li tout le jour. Quand ça l'habitude-là pou fini rente dans nou systeme, nou pou faire li en grande quantité et tout le jour sans trouve li difficile.

Banne soulard jamais ti vine soulard par boire ene bouteille whisky entier ene seul coup. Zotte ti commencé par boire tigite tigite la bière. Ça tigite-tigite là fine faire zotte vine ene lanteau noir zordi. Ça c'est ene خمار (soulaison) dans dounia ça. Si nou envi gagne خمار dans Deen, nou bizin commence par tigite et au fur et à mesure, augmente li tigite par tigite. C'est dans ça façon-là ki nou pou gagne istiqaamat dans Deen. C'est dans ça façon-là ki nou évite pratique Deen couma le temps.

Allah – pli bon patron

Ene travailleur ou ene employé li senti li en sécurité quand li travail dans ene établissement ou ene département de grande carrière. Et surtout quand li ena ene bon patron.

Celui ki amene so la vie dans l'obéissance Allah Ta'ala, li bizin senti li pli sécurisé ki n'importe ki sanla parceki la paye ki li gagné ici, personne pas capave payé. Ici so la paye li commencé même par dix pou ene. C'est-à-dire chaque bonne action ki li faire, li gagne dix fois plis en récompense. Si li dépense ene roupie, li gagne dix roupies en récompense. Li amplifié par sept cent fois aussi et ena fois li gagne ziska 2 millions aussi pou ene seul roupie ki li dépensé. Et finalement so récompense li tellement immense ki banne calculatrices aussi jette zarme parceki personne pas capave évalué li. Donc Allah Ta'ala même li prend la responsabilité pou récompense li.

Ici ou gagne ceki ou fine faire. Personne pas capave passe lors ou la tête. Donc perna pression, ni dépression ni tension. Ou pas bizin réclame ou droit pou ou gagné. Sans réclamé, ou gagne ou droit et ou gagne ceki ou fine blié aussi.

Ici pas guette couleur ou la peau ni guette ou longueur ou bien ou grosseur. Ki l'endroit ou sorti et ki langage ou causé ou bien couma ou appelé, ça pas important. Ici ena ene seul qualification ki acceptable et c'est la sincérité.

Ici ou patron c'est Allah Ta'ala. Li tellement bon et généreux ki appelle li Al-Kareem. Nou appelle li Al-Kareem parceki li donne ou sans ki ou mérité, mais sans pénalise celui ki mérité, sans passe lors la tête kikene et sans prend part kikene. Li Al-Kareem parceki li donné sans ki ou dimane li. Li Al-Kareem parceki li donne plis ki ou dimane li. Li Al-Kareem parceki li donne ene quantité ki pas capave compté. Li Al-Kareem parceki li donne ou sans ki ou attane. Li Al-Kareem parecki li converti ou banne mauvais actions en bonne actions quand ou dimane li pardon sincèrement.

O Allah! Honore nou par accorde nou le taqwa (l'obéissance à Allah Ta'ala) et pardonne nou par To grâce et par To faveur".

Haraam et Halaal

Ene kitchose ki empêché ou bien ene kitchose ki permette, ça li bizin ena preuve pou ça. Si ça preuve ki pé empêche ene kitchose-là li ene preuve ki catégorique, alors nou appelle ça kitchose-là haraam.

Par exemple la viande porc li empêché par banne preuves catégoriques. Donc la viande porc li haraam. Donc haraam li ene degré de l'interdiction ki basé lors ene preuve catégorique.

Coumsa même halaal c'est ene kitchose ki permette et ki so preuve li catégorique. Li bien grave considère ene kitchose haraam comme halaal et vis-versa. Par faire ça erreur-là, ene personne nepli reste ene musulman. Li sorti en dehors l'Islam. Par exemple ene dimoune li conné Allah Ta'ala et so Rasool r fine déclare l'alcool haraam. Malgré ça, li considère li halaal. Alors ene dimoune pareil li nepli reste musulman. Coumsa même l'Islam fine permette ene zomme ena 4 madames. Mais ene dimoune dire ki ça li pas permette. Ça dimoune ki dire ça-là, li pas reste ene musulman parceki ene kitchose ki li halaal, li pé déclare haraam.

Makrouh

Parfois ena certaine kitchose ki ena tous les deux porté. D'après certaine preuve, ou trouvé ki li bizin haraam et d'après ene banne preuves, li paraite ki li halaal. Si ena pli boucou preuve ki li haraam, ça veut dire ki li batte pli près avec haraam. Ene tel degré de l'interdiction, nou appelle li makrouh tahreemi.

Et si ena pli boucou preuves ki li halaal, ça veut dire li batte pli près avec halaal. Ene tel degré de l'interdiction, nou appelle li makrouh tanzeehi.

D'après ene hadice rapporté par Hazrat Nou'maan Bin Bashir (RA) ki trouve dans Sahih Boukhari, Sahih Mouslim et lezot livres de hadice, Rassouloullah r fine recommane nou pou abstenir de banne kitchose douteux. Parceki ça c'est ene moyen ki préserve ene dimoune so Deen et so l'honneur. Et dans pas prend précaution avec banne kitchose pareil, ena toute chance tombe dans haraam ki catégorique. Acoze ça nou bizin évite makrouh tahreemi et makrouh tanzeehi aussi si nou envi vraiment préserve nou de haraam. Dans ça façon-là, abstenir de makrouh tahreemi et makrouh tanzeehi li pou ene barrière ki pou sépare nou de commette haraam.

Souci pou Deen

Quand ene dimoune li content ene kitchose, li ena ene grand souci pou ça kitchose-là. Par exemple ene dimoune li content so zenfant, alors li tracassé pou so zenfant. Li prend boucou précaution ki so zenfant pas tombe malade. Li garde li loin de fraîcheur, soleil, la poussière etc.

Ene dimoune ki content so Deen aussi, li gagne tracas pou so Deen. Li garde li-même loin de banne tipti-tipti kitchose aussi pou pas tombe dans kitchose pli grave et pou ki so Deen pas affecté. Parfois ça souci pou préserve ça Deen-là li vine tellement fort ki zotte accepté ziska même quitte tous zotte conforts dans la caze et zotte alle dans ene l'autre l'endroit cotte zotte capave pratique zotte Deen. Dans le passé, ene groupe de jeunes ti quitte zotte l'endroit, ti alle cachiette dans ene la cave pou sauve zotte Deen. Ça l'événement-là li mentionné dans Sourah Al-Kahf. Et dans l'époque Rassouloullah r, banne Sahaba-e-Kiraam de makkah ti quitte zotte l'endroit pou alle établi dans madina. Nou appelle ça déplacement-là hijrah.

Couma parfois ça souci-là li tellement faible ki nou permette nou faire toute sorte de concession dans Deen. C'est ça même manque de souci et l'excès de concession dans Deen ki fine amene nou dans ene l'époque acote ene musulman so la vie pas d'après Deen. So mangé, boire, so façon habillé, so mariage, so tenue, so la coupe, so l'attitude etc. tous en dehors cadre. Narien pas pé corresponne avec Deen. Kikene fine bien dire ki pé arrive tous ça-là acoze ki mususlman li nepli musulman. Li fine vine 'lascar'. Zordi jour tous banne problèmes ki musulman pé faire face, c'est li même ki coupable. Li coupable acoze ki li fine quitte so Rabb.

Quand mususlman pou comprend ki so succès, so victoire et so salut li trouve dans Deen?

L'essentiel

Ou ena pou alle ene l'endroit ki ene chauffeur pé amene ou. Si chauffeur-là pé conduire bien, bizin laisse li faire so travail avec tranquillité et liberté. Si malgré ça ou essaye pou prend volant depi dans so la main, ça capave cause ene accident, même fatal aussi. Tout ça-là acoze ene simple ti désir ki ou fine échoué résisté conte ça. Ça même kitchose quand ene dimoune dans Deen pou analysé, li pou conclure ki ou fine dicté par ou nafs ki fine néfaste pou ou et pou ou camarade. Et li bien vrai ki nafsaniyyat li détruire bon-bon dimoune quand ça li monte dans la tête. Donc l'essentiel ki ene dimoune compétent pé bien faire so travail. Faudré pas interfère dans so travail. D'après l'enseignement Rassouloullah r, faudré pas la guerre avec ene kikene ki pé assume bien so responsabilité.

Redacteur en chef: Moufti Mouhammad Raffick Meerun
Email: jamiat2009@gmail.com