Jihaad Akbar
Taqwa ou bien l'obéissance à Allah Ta'ala li ena deux l'aspects. Ene ki concerne exécute banne commandements et deuxième ki concerne évite banne kitchose interdites.
Dans ça deux aspects-là, le deuxième aspect c'est-à-dire abstenir de banne kitchose ki empêché, li pli essentiel et pli important parceki ça même pli difficile. Rassouloulah r fine qualifié l'abstention de banne kitchose interdits de pli grand ibaadat. C'est par ça même qualité ki ene dimoune li vine pli grand Aabid (ene ki faire boucou ibaadat).
Dans ene l'autre hadice, Rassouloulah r fine qualifié ene ki combatte so nafs (désir) par reste dans l'obéissance Allah Ta'ala de ene véritable Mujahid (combattant).
A la lumière de ça hadice-là, le véritable Jihaad ki ene véritable Mujahid faire c'est combatte so nafs dans l'obéissance Allah Ta'ala. Donc ça montré ki le jihaad Akbar (pli grand jihaad) ki ene dimoune amené, c'est ene combat ki li faire contre so propre désir et plaisir injustifié. Ça c'est ene l'idée ki fine toujours approuvé par tous banne 'Oulama dans tous banne l'époques. C'est ene l'idée ki bénéficié l'appuye de l'ijma. Mais le fait ki combatte so nafs c'est le jihaad Akbar, faudré pas ça li diminué l'importance et la nécessité faire jihaad lors frontière. Quand bizin et cote bizin, chakene bizin assume so responsabilité d'après so capacité et dans la façon ki bizin.
L'AMOUR
L'amour pas fine faire pou banne imbéciles ou pou banne jouisseurs ou pou banne ki orgueilleux. C'est ene kitchose pure et propre ki li digne seulement pou banne ki pur, propre, pieux et humbles. Vrai l'amour c'est l'amour pou Allah Ta'ala et pou nou Nabi r. Donc banne vrai amoureux c'est banne ki pur, propre, pieux, intelligent et humble ki zotte le cœur rempli avec l'amour pou Allah Ta'ala et Rassouloullah r. Ou capave testé ou l'intelligence et ou piété par l'amour ki ou ena pou Allah Ta'ala et so Rasoul r. A son tour, ça l'amour ki ou pretanne ena li dans ou pou être testé par la quantité de sounnat ki ou ena dans ou.
Le point inévitable
Ou capave pas joine ene quantité ki ena dans ça le monde-là. Mais ene kitchose ki tous ena pou joine, c'est la mort. Ou pas bizin invite li. Li vine par li même. Li suive ou acote ou été. Li pou joine ou, même si ou cachiette ou dans ene forteresse bien renfermé et bien équipé et entouré avec ou banne gendarmes, soldats et garde du corps. Perna barré, quand li vini li prend ou li allé et tous reste guetté.
La mort c'est ene rappel pou nou tous ki narien pas éternel. A tel point la mort aussi li pas éternel. Ou pou étonné pou conné ki la mort aussi pou joine la mort. Après la mort, ena ene l'autre étape inévitable. C'est-à-dire ça l'étape cote chakene ena pou ranne compte de tout ceki li fine faire. Donc dossier bizin à jour et bizin toujours dimane pardon et la volonté pou amélioré avec Allah Ta'ala.
Pas bouleversé …
Insaan li égoïste. Li ena l'esprit dominere. Li garde ceki pou li et li content prend ceki pou ou. Et quand li prend aussi, li prend ça avec l'esprit de gourmandise. Mais Allah Ta'ala prend ene et li donne ou dix. Li mette ou dans ene ti difficulté pou récompense ou énormément. Essaye donne li ça ene la vie ki ou ena-là, li pou donne ou la joie ki des milliers des milliers la vie aussi pas capave donne ou.
Faudré pas bouleversé dans difficulté parceki ou ena ene patron ki content ou et ki ou ena so support à chaque instant. Mazine li dans ou banne bon moments, li pou rappel ou dans ou banne moments difficile. Et dans banne moments difficile aussi, ou ena ene seul la porte pou tappé ki li dans sur. C'est la porte de nou Rabb et nou véritable bien aimée, Allah Ta'ala!
Gloire humaine
Reste dans ibaadat Allah Ta'ala avec toute humilité, c'est ça même la gloire et pli grand fortune humaine. Kifer bizin galoupe derrière miracle, grandeur et la popularité ki fine avale ene quantité auparavant!
Ene ti conseil
La vie ki nou fine gagné li bien courte. Pas capave vive li dans l'amertume. Bizin vive li dans l'amitié.
Pou gagne l'amitié, Rassouloullah r fine recommane nou pou faire salaam. Li vrai ki ene deux coup salaam ki ou faire ou camarade li capave pas faire li vine ene ou camarade intime, mais ça autant-là li sur ki li diminué l'intensité de so hostilité. Et li pas drôle aussi ki li capave vine ene ou pli bon camarade si ou continué garde ou relation avec li par faire li salaam.
La dernière partie de la nuit
Ene ou zenfant ki pé vive à l'extérieure depi ene bon boute le temps fine décide finalement pou passe so vacance chez ou. Li fine mette ene date ki li supposé vine maurice. Ou commence attane li impatiemment. Ou commence compte jour. Ou trouve jour pé tardé pou vini. Ou ti à content ki ça jour-là vine jordi même. Ou ti envi ça jour-là galoupé. Pourtant si jour pé galoupé, ou la vie aussi pé galoupé et la vie ou zenfant aussi pé diminué. Mais ou pas conne narien parceki ou oulé trouve ou zenfant divant ou lizié pli vite ki capave.
Banne ki zotte le cœur rempli avec l'amour pou Allah Ta'ala, zotte attane la dernière partie de la nuit avec même ferveur ou bien impé plis aussi. Depi gramatin même zotte reste attane ça dernier moment de la nuit cote zotte pou vine en contacte ene ti pé pli proche avec Allah Ta'ala. Zotte rente en contacte avec Allah Ta'ala par tombe dans sajdah devant li et zotte trempe zotte mouswallah par verse zotte larmes. C'est ene moment bien bien valeureux de zotte la vie et en réalité li bizin coumsa même pou chaque musulman.
Selon ene hadice ki trouve dans Sahih Boukhari et ki rapporté par Hazrat Abou Hourairah t, Rassouloullah r fine dire:
"Nou Rabb Tabaraka wa Ta'ala li dessane dans dernier tiers de la nuit chaque soir lors le ciel de ça monde-là et li dire: Ena kikene pou faire doah avec moi pou mo repone li (so l'appel). Ena kikene pou dimane moi pou mo accorde li. Ena kikene pou dimane moi pardon pou mo pardonne li." (Sahih Boukhari)
Acoze ça, banne personnages pieux fine toujours ena l'habitude reste éveillé et faire ibaadat dans ça l'heure-là bien propice et bien valeureux pou capave plaigne zotte la misère et pou dimane Allah Ta'ala ceki zotte bizin.
Ki Allah Ta'ala faire nou comprend la vraie valeur de ça moment béni-là et donne nou la volonté pou consacré ene ti pé nou le temps dans ça moment-là ki bénéfique pou nou dans tous façon au lieu passe nou la nuit dans banne activités ki nuire lezot et ki pou nuire nou dans aakhirat.
Ene dimoune intelligent li engage li dans banne activités ki bénéfique. Dans ce sens, banne personnages pieux zotte banne dimoune pli intelligent parceki zotte pas nuire zotte l'avenir par engage zotte dans banne kitchose ki nuisible et ki inutile.
Dounia
Depi ki ou fine vine dans ça dounia-là, ça dounia-là fine commence éloigné avec ou. Et chaque instant li pé éloigné avec ou. Perna li approché avec ou. Li couma dire ou content kikene ki pé vire so le dos avec ou.
Dounia pas fine vine pou kikene ni li pou vine pou kikene. Dounia c'est ene déception ou bien couma ene rêve. Ou rêve joli-joli kitchose mais quand ou rêve cassé, ou pas trouve narien apart ene regret. Ou bien li couma ene mirage ki donne ene l'image tout à faire différent de ceki li été. Dimoune ki galoupe en direction ene mirage pé vive dans illusion.
A noté ki tout kitchose ki approche ou avec Allah Ta'ala, c'est aakhirat quand même li en forme dounia. Et tout kitchose ki éloigne ou de Allah Ta'ala, c'est dounia quand même li ena ene forme de ibaadat. Donc vive pou aakhirat veut dire vive dans l'obéissance Allah Ta'ala en suivant le moubaarak tareeqah (principe sacré et béni) de Rassouloullah r avec l'unique but pou faire Allah Ta'ala plaisir.
Deen Al-Islam
Si kikene so la religion li ene zaffaire secondaire dans so la vie, li pas coumsa pou ene musulman. Pou ene musulman, so Deen vine avant tous. C'est en fonction de so Deen ki li réglé so la vie. Li adapté so banne activités avec Deen dans tout domaine de la vie. Ça Deen-là li contrôle ziska même so relation pli intime avec so madame et so banne sentiments le plus interne et pli sensible. Pou ene musulman le verdict li "clear-cut". Disons li pas capave empêche li ena l'attraction pou kikene parceki ça li pas dans so contrôle mais li pas laisse li emporté par ça. Li bizin sacrifié li, so désir et so sentiment pou le plaisir de so Rabb parceki so Rabb et so Deen dépasse tout et vine avant tout.
Zikrullah
Différence entre ene dimoune ki faire zikrullah et ene dimoune ki pas faire zikrullah li couma dire différence ki ena entre ene dimoune vivant et ene cadavre mort. Zikrullah li garde le cœur vivant. Et quand ene dimoune perna ça dans li, so le cœur li mort. Quand le cœur vivant, ene dimoune li ena l'envi pou faire ibaadat. Quand li mort, li perna goût faire ibaadat. Li capave passe divant la porte masjid ou bien li reste blagué en dehors masjid, mais li pas pou ena la volonté rente dans masjid. Acoze ça Nabi r fine recommane nou pou faire zikrullah boucou. Li ene lubrifiant pou le cœur ki crée à son tour le vrai goût de ibaadat.
La santé
La santé li ene très grand faveur ki Allah Ta'ala fine donne nou. Quand ou perna ça, ou vine ene dernier misérable parceki li empêche ou jouir ou confort ki ou ena et ou banne millions ki ou ena dans ou compte.
Vaut mieux perna narien mais ou ena la santé ki ena boucou sans ki ou capave jouir ceki ou ena. Selon ene hadice, Rassouloullah r fine dire:
"Celui ki ena so la santé et li ena de quoi pou li vive, couma dire li fine gagne fortune de entier le monde".
La santé ki nou ena, nou bizin remercié Allah Ta'ala. Et ça li réalisable par servi nou la santé dans banne activités ki faire Allah Ta'ala plaisir.
النّكاح - Mariage
Ki veut dire nikah?
Nikah d`après so sens littéral li signifié relation sexuelle. Et dans langage commun li signifié ene contrat entre deux personnes - ene de sexe masculin et l'autre de sexe féminin - par lequel zotte vine missié-madame.
Ça contrat-là li conclure par l`offre d`une part et l`acceptation d`une autre part. Nou appelle ça l`offre-là ايجاب ('ijaab) et ça l`acceptation-là nou appelle liقبول (qouboul).
D'après ça définition-là, pas capave ena aukene nikah entre deux zommes et ni entre deux madames. Coumsa même li clair ki jamais capave ena nikah entre ene insaan (être humain) et ene zanimau. Quand nou dire ki bizin ايجاب et قبول pou nikah existé, ça signifié ki ene missié et ene madame capave vive ensemble pendant des années sans ايجاب et قبول mais zotte pas pou vine missié-madame. Par contre deux étrangers capave vine missié-madame toute suite dans quelques secondes par ايجاب et قبول.
ايجاب et قبول bizin faire li divant minimum deux témoins. Faudré pas necque nou faire Allah Ta'ala et so Rassoul témoin et nou faire nikah couma dans film acteur-actrice faire zotte mariage divant zotte idoles sans présence banne témoins. Pou ça ايجاب et قبول là valable, bizin ena au minimum deux témoins présent en chair et en os. Ça deux témoins-là bizin deux personnes majeur du sexe masculin ki musulman et ki sain d`esprit. Pou le besoin de témoignage, ene zomme et deux madames aussi li sufi. Donc l'offre et acceptation bizin conclure divant deux hommes musulmans majeurs ou bien ene zomme et deux madames en sorte ki banne témoins zotte tendé et conné qui sanla pé marié avec ki sanla.
Apart ça, missié ki pé marié-là, li bizin donne so madame ene kitchose ki ena valeur commercial. Ça appelle mahar ou bien swadaaq. Ça kikchose-là li capave être en forme la monnaie liquide couma capave donne li en forme kit z'effet ou objet aussi. Bijou ki normalement la famille garçon faire pou ti fille, ça aussi capave donne li comme mahar.
Le taux maximum de Mahar perna aukene limite. Mais li déconseillé pou exige ene Mahar exorbitant. Ene Nikah ki ena pli tigite dépense et pli tigite Mahar, ena pli boucou barakat. Mahar li suggéré par garçon ou bien li capave proposé par ti fille aussi. Mais de toute façon ça bizin finalisé par ene accord mutuel entre les deux parties.
Le taux minimum de mahar li de 10 dirhams ki équivaut à peu près 31.5 grammes d`argent. Selon ene hadice, Hazrat Ali t dire ki perna aukene Mahar moins ki 10 dirhams. Li bon conné ki c'est ene hadice ki fine être qualifié de ene hadith faible. Ça li capave vrai par rapport à ene certaine sanad (source). Mais ceki Ibn Abu Hatim fine rapporté, li ene hadith correcte.
Mahar de Rs 27.50
Mahar de Rs 27.50 ki en vigueur à Maurice, cote ça sorti ça? Bizin guetté eski nou bizin continué avec ça. Si li ene kitchose de shariat, perna doute nou bizin pas abandonne li. Mais si li pas ene kitchose ki prouvé dans shariat, alors li pas bon aussi ki nou continué avec ça. Longtemps Rs 27.50 ti ene grand la monnaie. Banne grand dimoune dire ki ti ena ene l'époque quand ene souverain l'or ti pé vende Rs 5.00. Pou ça l'époque-là, Rs 27.50 li équivaut à 5 1/2 souverain l'or. Li paraître ki dimoune de certaine l'endroit ti fixé ça comme ene facilité ou bien ça li ti la valeur de Mahar Fatimi. Si zordi nou évalué Mahar Fatimi, li tombe Rs 15000/- à Rs 16000/-. Donc de toute façon, nou pas trouve aukène raison ki nou bizin continué avec ene mahar Rs 27.50 ou Rs xx 27.50.
Lazzat-e-Mounajaat
Mounajaat c'est ene conversation ki déroulé entre deux personne dans ene façon tellement discrète ki ene troisième pas conné. Quand ene personne ki pé cause avec so bien-aimée, li pas oulé kikene dérange li. Li oulé la solitude totale avec ene l'atmosphère calme et tranquille. Parfois causé-là li tellement bon et agréable ki ene nuit entier capave traversé couma narien ditout. Li ti à content ki le temps faire ene ti escale pou permette zotte cause ene ti pé encore. Ene personne ki engage li dans Mounajaat avec so Rabb dans au milieu la nuit, li expérience ene la joie plis ki ça. C'est ene la joie inestimable ki pas capave décrire li. Li couma dire goût de ene fruit ki bizin mangé même pou conné. Mille ou faire li comprend ki li coumsa-coumsa mais li na pas pou comprend. Li ene moment tellement délicieux ki dimoune ki conne ça, li attane ça l'heure-là impatiemment depi gramatin même. Li trouve réveil fine arrêté tellement li oulé ki ça l'heure-là vine vite. Et quand l'heure-là arrivé, li senti réveil pé galoupé, tellement li apprécié ça moment-là. Banne personnages pieux ki fine atteine ene degré très avancé de proximité avec Allah Ta'ala, zotte trouvé ki ça le monde-là fine dévalué totalement comparé à la joie et au sentiment de bien-être ki zotte éprouvé dans ça moment-là. C'est pou ça genre de la joie-là même ki Nabi r fine dire:
"جعلت قرة عينى فى الصلاة"
"Fraîcheur mo lizié li trouve dans namaz".
Hazrat 'Oumar t dire:
"Si pas ti ena ça la joie pose mo font dans sajdah divant mo Rabb, mo ti à souhaité ki Allah Ta'ala lève moi".
Et pou atteine ene stage pareil, ça li nécessite ena l'amitié avec Allah Ta'ala. Et l'amitié avec Allah Ta'ala li trouve dans suive Nabi r. Donc suive sounnat Nabi r dans tous banne domaines de la vie, c'est la clé de l'amitié pou Allah Ta'ala. Et ça même c'est la clé de la réussite dans Dounia et dans Aakhirat.
Le pont!
La vie dans Dounia li couma dire ene pont. Dans so ene coté ena berceau et l'autre coté ena qabar. Ena ki fine fini marche 1/3 de ça pont-là! Ena aussi ki fine reste quelques pas pou li complété mais li pas conné. Donc ça pont-là fine faire pou traverse li. Pas pou perdi le temps dans embellir li.
Commentaire de ene ki pas baaligh (majeur) dans Deen:
Qui sanla quand pou mort et cote sa li pour mort, ça c'est connaissance de Ghaib qui personne pas conné excepté Allah. Allah dire: "Aucun Nafs pas conné lors qui la terre li pour mort.] 31:34 D'après ça fausse zistoire-là, sa Murid la fine fini conné qui li pour mort apres zohar. Si sa pas appelle attribué connaissance de ghaib à ene l'autre apart Allah, bé couma nou pour explique sa alors?
Réponse:
Connaissance de ghaib ou bien Ilm-ul-Ghaib, c'est ene connaissance ki necque Allah Ta'ala li tout seul, li conné. Mais si Allah Ta'ala oulé, li dévoile certaine l'information à celui ki li oulé. Dans langage Qour'aan, appelle ça "Naba-ul-ghaib" (information de ghaib). Ene Nabi li gagne ça à travers wahi et ene ki li pas Nabi, li gagne ça à travers Ilhaam. L'information ki ene Nabi li gagné à travers wahi, li ene l'information catégorique. Par contre ene l'information ki basé lors Ilhaam, li pas ene l'information catégorique. D'après ene hadice ki trouve dans Sahih Mouslim, à la veille bataille de Badr, Rassouloullah r ti pose so la main, ti indiqué cote-cote ça tel-tel dimoune pou tombé. Mais pourtant Allah Ta'ala dire dans Qour'aan dans S31/V34:
"… Et personne pas conné ki li pou faire demain …"
Et d'après ça hadice-là, nou trouvé ki Rassouloullah r ti fini annoncé ene jour avant même ki pou arrive ki sanla et cote ça.
Dimoune ki encore tanne et pencore vine baaligh (majeur) dans Deen, souvent zotte gagne difficulté dans banne situation pareil et l'autre coté la tête-dir ki zotte ena, faire zotte pas apprane avec banne ki conné. En réalité perna aukene contradiction parceki Allah Ta'ala fine faire Rassouloullah r conne ça par wahi. Aukene part dans Qour'aan pas fine dire ki pas capave conne ça si Allah Ta'ala faire conné. Couma Allah Ta'ala fine faire Rassouloulah r conne ça par wahi, coumsa même Allah Ta'ala fine capave faire ça murid-là conné ki li pou mort après zohar par Ilhaam. Si ça anecdote concernant ça mourid-là li ene fausse zistoire, eski le hadice Mouslim aussi pou bizin rejeté par qualifié li de ene "zistoire" ou de "ene fausseté"? Li paraite ki l'auteur de ça commentaire-là fine copié ça depi quelque part sans comprend ceki li fine copié. Sinon d'après so analyse même, bizin pas accepté ça hadice-là aussi. Mais pourtant ça hadice-là li ene hadice Sahih.
"O Allah! Si mo pé gagne l'occasion vive dans to plaisir et pou donne la vie pou faire toi content, c'est necque ene faveur de to part ki to fine verse lors moi".
(Aarif Billah Hazrat Sheikh Moulana Hakeem Akhtar Sahab)
Question:
Ki shariah dire concernant ene garçon ki content ene tifille et papa ça tifille-là pretanne ki ça garçon-là li so garçon ki li fine gagne li en dehors mariage. Mama garçon-là admette ki papa tifille ti déjà gagne relation avec li mais li dire ki garçon-là pas pou li parceki li ti déjà gros vente ça garçon-là quand papa tifille-là ti gagne relation avec li. Dans ça cas-là eski garçon-là capave marié avec ça tifille-là?
Réponse:
Ça garçon-là li pas garçon ça missié-là. Donc ça missié-là so tifille li pas sœur pou ça garçon-là. D'après shariah, na perna aukene empêchement ki empêche ça garçon-là marié avec ça tifille-là.
Redacteur en chef: Moufti Mouhammad Raffick Meerun
Email: jamiat2009@gmail.com
No comments:
Post a Comment