AL-Jamiat V.3 No.4

Make your choice: Arrangé ou dérangé!

Ou pas capave arrange tout kitchose. C'est à dire ou pas pou capave arrange tout sans dérange narien. Quand ou arrange ene kitchose, ça li capave dérange ene l'autre kitchose. Parfois ou bizin dérange ene kitchose pou arrange ene l'autre kitchose. Si ou envie mange omelette, ou pou bizin casse dizef. Ou pas capave mange ene omelette sans casse ene dizef. Ou bizin dérange ene dizef  si ou envie arrange ou par mange ene omelette.

Nou ena deux kitchose devant nou. Ene c'est ça le monde ki nou pé vive-là ki nou appelle li la vie dans dounia. Et deuxième c'est ene l'autre le monde ki pé attane nou après la mort et ki nou appelle li aakhirat. Si nou content ça le monde-là plis ki l'autre-là pareil couma banne kaafir et banne moushrik, alors nou pou préfère dérange aakhirat pou arrange dounia. Mais si couma ene bon musulman, nou content nou aakhirat plis ki ça dounia-là, alors nou pas pou hésité pou sacrifié ça le monde-là pou arrange nou aakhirat. Si fallait bizin donne la vie aussi, nou pou accepté.

Nou bizin conné ki ena ene ki pou arrangé et ene pou dérangé. Ça la vie-là c'est ene question de arrangé et dérangé. C'est à ou de choisir pou accepté dérange banne habitant de ene l'endroit dans zotte sommeil par ou 'gamat' et ou sega ki ou faire la vieille mariage, ou bien ou pou arrange banne habitants par dérange ou même dans résister contre ou désir et ou plaisir.

C'est à ou pou choisir! Ou pou dérange ou aakhirat pou arrange ou dounia ou soit ou pou dérange ou dounia pou arrange ou aakhirat. Mais toujours bizin pensé ki ou ena ene compte à rendé! Make your choice!

Doah

"O Allah! Nou dimane Toi protection contre tout connaissance, tout travail, tout l'amitié et tout kitchose ki pou vine ene barrière entre nou et Toi."

La lumière mobile ….

Li vrai ki bizin gagne Tawfeeq de coté Allah Soubhanahou Wa Ta'ala pou capave faire bon. Banne ki dans l'obéissance Allah Soubhanahou Wa Ta'ala, zotte fine gagne ça Tawfeeq-là et banne ki zotte le cœur pas pé vine dans ça direction-là, au moins zotte bizin pas reste satisfait avec condition ki zotte été. Zotte bizin toujours dimane doua pou ki Allah Soubhanahou Wa Ta'ala donne zotte Tawfeeq. Hier banne ki ti insouciant de zotte Deen, et dans l'état et condition ki zotte ti été, pé gagne l'occasion reste dans Allah Soubhanahou Wa Ta'ala so zikr gramatin tantôt et vire-viré de masjid à masjid. C'est vraiment ene Tawfeeq de coté Allah Soubhanahou Wa Ta'ala ki zotte fine gagné à travers ça travail ki nou appelle travail de Da'wah. Ça travail de Da'wah ki pé assuré par ene groupe de personne ki Allah Soubhanahou Wa Ta'ala fine choisir zotte pou sacrifié corps et âme zisse pou développe ça imaan ki ena dans zotte-là et amene Deen dans zotte la vie ki zordi jour nou appelle zotte Tabligh Jamaat. En réalité c'est ene lumière mobile ki pé circulé dans tout coin et recoin du globe.

Allah Soubhanahou Wa Ta'ala fine servi ça travail-là comme ene moyen pou transforme la vie des milliers et des milliers de personne lors ça la terre-là. Banne ki ti pé passe zotte le temps dans batte carte, dans joué dans casino, dans boire dans banne tavernes etc., zordi fine gagne l'occasion pou ploré dans au milieu la nuit dans sajdah divant zotte Rabb. Si nou envie guette l'exemple de ene virage de 180 degré, nou pou gagne li dans la vie banne ki zotte la vie fine changé et transformé grâce à ça travail-là.

…  et Le déviateur ambulant

Mais shaitaan jamais pou capave guette dimoune change zotte la vie. Jamais li pou capave guette dimoune pratique Deen. Jamais li pou satisfait avec banne ki hier pas ti pé faire aukene namaz mais zordi pé faire namaz tahajjud, namaz chaaste et namaz awwaabeen aussi. Mais nou ena banne ki nou capave appelle zotte banne déviateur ambulant ki pé rente dans joué shaitaan. Hier zotte pas ti ena le temps pou alle guette banne dimoune ki pas ti pé faire namaz, mais zordi quand ça dimoune-là fine commence faire namaz, zotte vine fatigue so la tête ki soi-disant so namaz na pas bon. Et pourtant zotte pé faire ene namaz ki li d'après la façon ki fine être pratiqué de génération en génération ziska zordi. Zotte tire banne prétextes ki soi-disant ena boucou kitchose dans Fazaail-e-A'maal ki na pas bon. Et pourtant c'est banne kitchose ki trouve dans livre Sheikhul-Islam Allaamah Ibn Taimiyah (R) aussi. Malgré ça, pou banne raisons inconnu, jamais zotte pou osé dire ki Allaamah Ibn Taimiyah (R) fine propage la fausseté. C'est ene tache ki zotte pas pou hésité mette lors Tabligh Jamaat. Nou comprend zotte difficulté et zotte problème ki empêche zotte dire la vérité, parceki bizin de quoi aussi pou vive. Dans dire la vérité, peut-être pou arrête vive couma pé vive astere-là. Couma certain dire ki zotte pied du riz capave sec. Allah conné ki vrai ki menti!

Lors requête de la part de plusieurs frères, nou pé reproduire ça l'article-là ki li en forme question/réponse:

Question:­

D’après ene certaine information, ça hadice suivant-là fine être considéré comme ene hadice fabriqué: Eski li vrai?

"Cherche la connaissance même jusqu’à en chine".

Réponse:

“Cherche la connaissance même jusqu’à en chine parceki cherche la connaissance li obligatoire lors chaque musulman”

C’est ene hadice ki fine être rapporté par Hazrat Anas t et fine être sélecté par Ibn Adi dans Al-Kamil, par Hafiz Ibn-ul-Barr dans so Jami-ul-Bayaan Fil-Ilm, par Al-Baihaqui dans so Al-Moudkhal et Shou’bul-Imaan. Imam Al-Ghazaali (rahmatoullahi alayh) aussi fine faire mention de ça hadice-là dans so Ihyaa-ul-Uloom.

Al-Hafiz Zain-ud-Deen-Al-lraqui, ene éminent savant de hadice du 8eme siècle Hijri, dans ene livre ki li fine écrire pour situé position de chaque hadice mentionné dans Ihyaa-ul-Uloom dire: “Al-Baihaqui dire ki so Matn (contenu) li Mash-hour (reconnu) mais so banne sanad (chaîne de narration) zotte faible".

Donc selon Imam Al-Baihaqui, ene savant de hadice de 5eme siècle Hijri, le hadice en question li rapporté par plusieurs sanad et ki chaque sanad là-dans li faible. A la lumière de ceki Al-Baihaqui fine déclaré, nou comprend ki le hadice en question, li pas “Mawdou” (fabriqué) parceki ene Sanad faible pas veut dire nécessairement fabriqué. Ena des fois, ene hadice semblable ena la chance et la possibilité vine dans rang ene hadice “Hassan” (bon/passable) quand li rapporté par plusieurs Sanad couma ça li ene principe établi chez banne “Mouhaddices” (savants de hadice).

Al-Hafiz AI-Iraqui aussi ki ti fine engage li pou situé position de banne hadices mentionnés dans lhyaa-ul-Uloom de Imam Al-Ghazaali (rahmatoullahi alayh), pas fine trouve narien pou qualifié li comme "Mawdou" (fabriqué) couma li ena l’habitude faire li à cote li nécessaire.

Donc le hadice en question li pas “Mawdou” (fabriqué). Li ene hadice faible avec ene possibilité d’être élevé au rang de “Hassan” (bon/passable). Effectivement Allaamah Al-­Mizzi dire ki le hadice ena plusieurs Sanad. Dans so l’ensemble, li capave accède au rang ene hadice “Hassan”. Quant à Allaamah Al-Azeezi de As-Sirajul-Munir, ene commentaire lors Al-Jami-us-Sagheer, li considère le hadice comme ene hadice “Hassan Lighairihi”, c’est à dire ene hadice ki fine être considéré comme Hassan (bon) pou banne raisons apart et extérieurs.

Question:

Eski li vrai ki ene madame li gagne so talaaq si li reste séparé avec so missié pendant ene bon boute le temps?

Réponse:

Quand ene missié et ene madame vive ensemble couma missié-madame pendant ene bon boute le temps sans faire nikah, ça pas faire zotte vine missié-madame d'après Shariah. Coumsa même quand ene missié-madame ki fine fini faire nikah, reste séparé après zotte nikah pendant ene siècle aussi, ça pas faire ça madame-là gagne talaaq.

Missié-là bizin donne so madame talaaq pou ça madame-là gagne so talaaq. Ou bien dans certaine cas, ene Qazi ou bien société musulman aussi capave casse ça nikah-là avec certaine condition si madame-là li faire ene demande pareil.

Question:

Eski ene madame capave donne so missié talaaq?

Réponse:

Talaaq li dans la main missié. Li pas dans la main madame. Donc mille ene madame donne so missié talaaq, ça pas pou ena aukene l'effet. Zotte continué reste missié-madame.

Ene pratique Maqboul (acceptable)

Mille ou causé mais narien perna valeur tanque ou pas mette li en pratique. Mais ça aussi bizin conné, grand-grand travail aussi perna valeur divant Allah Ta'ala si perna la sincérité. Ene dimoune li capave donne ziska so la vie aussi mais ça pas pou protége li de l'enfer si li fine faire ça pou lizié dimoune. Pas fini! Après tout ça-là, ça travail ki ou faire-là, li bizin d'après le sounnat de Nabi r.

Donc pou ene pratique accepté, ça pratique-là bizin faire li avec la sincérité et en conformité avec le principe et sounnat de Rassouloullah r.

Hadice

"Ena trois catégories de personne ki zotte lizié pas pou trouve du feu (l'enfer):

Ene lizié ki surveillé dans chemin Allah. Ene (deuxième) lizié ki fine verse l'arme par la frayeur d'Allah et ene (troisième) ki fine abstenir de (guette) banne kitchose ki Allah fine interdit." (At-Tabraani)

"Pas pou trouve du feu l'enfer" veut dire ki Allah Ta'ala pou protège zotte de du feu l'enfer et pou garde ça banne catégories dimoune-là tellement loin de l'enfer ki zotte pas pou gagne l'occasion trouve l'enfer aussi.

p              Surveillé dans chemin Allah Ta'ala signifié tout zeffort ki ene dimoune faire pou préserve l'Islam et banne musulmans, pareille couma ene combattant ki surveille frontière l'Islam ou bien ene ki pé amene combat pou libère l'Islam et banne musulmans de l'emprise de Kufr et de banne Kaafir. Coumsa même ene personne ki pé lutté pou empêche infiltration banne conceptions et banne doctrines de kuffaar dans banne musulmans, li ene combattant ki Allah Ta'ala pou protège li de l'enfer. C'est ene bonne nouvelle aussi pou banne ki zotte la nuit pé vine li jour dans pense banne moyens ki capave préserve la communauté de l'attaque de shaitaan et de so banne partisans.

p              Ploré par la frayeur d'Allah li ene kitchose ki Allah Ta'ala bien content parceki ça li vine apartir humilité ki ene dimoune ena dans li par reconnaite capacité et grandeur Allah Ta'ala. Quand ene dimoune li humble et modeste dans ça façon-là, li pas hésité pou accepté so erreur. Ene dimoune pareille, li pou toujours reconnaite so erreur divant Allah Ta'ala et li pou regretté ceki li fine faire. Ça regret-là pou empêche li ou bien au moins li pas pou ena courage faire kit erreur librement et sans hésitation. Donc ploré par la frayeur d'Allah Ta'ala li ene indication de la piété ene dimoune. Et Allah Ta'ala li bien content banne ki pieux.

p              Abstenir guette banne kitchose ki Allah Ta'ala fine empêché, li applique principalement lors guette ene personne de sexe opposé. Couma li haraam pou guette ene madame, coumsa même li haraam pou guette so photo ou bien pou guette li lors l'écran. D'après hadice, ena malédiction Allah Ta'ala lors celui ki guetté et lors ça madame ki expose li pou zomme guette li.

C'est ene kitchose ki ena boucou tentation et donc dimoune tire ene plaisir extraordinaire là-dans. Acoze ça celui ki sacrifié so plaisir par baisse so regard acoze Allah Ta'ala, li gagne ene douceur de Imaan dans so le cœur. Allaamah Mulla Ali Qari (R) dire ki ça douceur de Imaan-là li ene cadeau de coté Allah Ta'ala à so serviteur. Allah Ta'ala li Al-Kareem (généreux par excellence). Li pas reprend ene cadeau après ki li fine donne li kikene. Donc ça douceur de Imaan-là pou resté avec la personne ki fine faire ene telle sacrifice. Alors c'est ene façon pou dire ki ene telle personne pou quitte ça le monde-là avec Imaan. Quitte dounia avec Imaan, c'est ene faveur inégal et inestimable parceki li garanti le salut éternel. Dans ça façon-là nou capave dire ki résisté contre tentation guette beauté et charme de sexe opposé li ene moyen ki garanti le salut éternel.

Ene le cœur malade et so traitement

Ene dimoune ki fine conne ene quantité kitchose et fine gagne banne degré couma B.A ou M.A ou Phd etc. sans ki li conne Allah Ta'ala, alors li pas fine conne narien. Conne Allah Ta'ala li ene connaissance pli essentielle ki tous connaissance.

Ki manière ou pou conné ki ou conne Allah Ta'ala?

Ena ene signe pou ça. Quand ou gagne l'amitié pou Allah Ta'ala, ça veut dire ki ou fine conne Allah Ta'ala. Tous dimoune capave dire ki li content Allah Ta'ala. Mais signe de vrai l'amitié pou Allah Ta'ala li trouve dans pas donne narien préférence lors l'amitié Allah Ta'ala.

Chaque parti dans le corps, li ena ene fonction spécifique. Quand li pas fonctionne bien, nou appelle li ene handicap et nou dire ki ça parti-là li malade. Le cœur so fonction principale c'est garde l'amitié avec Allah Ta'ala plis ki tout kitchose. Quand ça le cœur-là li pas fonctionne dans ça façon-là, spirituellement parlant, appelle li ene le cœur malade.

Remède de ça malade-là li trouve dans piétine désirs et plaisirs et amene li pou reste dans banne limites ki Allah Ta'ala fine fixé. C'est-à-dire applique Shariah dans so totalité d'apres le model parfait de Nabi r. Et ça li depanne lors la volonté. Couma tous kitchose, la volonté pou pratique Deen ki nou appelle li twafeeq, li trouve dans la main Allah Ta'ala. Mais couma tous kitchose, Allah Ta'ala fine mette ene moyen pou ca aussi.

Normalement Allah Ta'ala fine attache la volonté pou pratique Deen avec Souhbat (compagnie) de banne personnages pieux. Acoze ça Nabi r fine recommande pou reste dans compagnie banne bon dimounes. Parceki d'après ceki Rassouloullah r fine faire ressortir, ene dimoune ena tendance adopté manière so camarade intime. Donc si so camarade intime li ene bon dimoune, alors li aussi li pou inculqué et développe banne bon manière ki ena dans li. Au contraire, li capave fini absorbe li sans ki li conné.

Causé

Allah Ta'ala fine honore insaaan par accorde li la capacité pou causé et pou exprime li. Couma tous banne faveurs Allah Ta'ala, ça faveur-là aussi nou bizin remercié Allah Ta'ala boucou. Comme reconnaissance pou ça faveur-là, nou bizin toujours utilise li dans banne kitchose ki bénéfique pou nou dans Dounia et dans Aakhirat couma Tilaawat-ul-Qour'aan, Zikrullah, Daroud Sharif etc.

Nou bizin conné ki chaque kitchose ki nou tiré depi dans nou la bouche, nou ena ene compte pou rendé cote Allah Ta'ala. Ça dimane nou pou être pli vigilant et pli prudent avant nou causé. Dans ene hadice ki trouve dans Abou Dawoud et Tirmizi, Rassouloullah r fine montré ki la Salut li trouve dans contrôle la langue. Ça la bouche ki capave faire nou profité énormément, capave coute nou boucou cher si nou pas conne servi li. Nou bizin calcule bien avant nou dimane kikene ene kitchose ou bien quand nou repone kikene. Tout depanne dans ki façon et avec ki formule nou pé faire li. Ene kitchose ou ti capave gagne li dans bon façon mais ki ou pas fine gagne li simplement acoze ou façon causé pas ti bon. Banne disputes, banne querelles dans ménage, entre banne collègues dans travail et en général, li provoqué par ça même mauvais façon adresse ene dimoune. Ça banne querelles-là zotte termine dans banne façon bien chagrinant. Parfois ménage cassé couma parfois ça coûte la vie dimoune aussi. Tout ça-là acoze ki nou laisse ça morceau sans lezos-là batté sans contrôle. Donc contrôle la langue li épargne nou de boucou dégâts dans la vie mondaine et dans Aakhirat aussi. Dans ene hadice, Rassouloullah r fine dire:

"Celui ki donne moi garantie concernant ça parti ki trouve entre so deux la mâchoire (la langue) et concernant ça parti ki trouve entre so deux la jambe, mo garantie li jannat."

Ça signifié ki mal servi la langue capave prive ene dimoune de ene cadeau inestimable couma jannat. Dans ene façon nou capave dire ki la bouche li capave rende ene dimoune heureux ou malheureux. C'est à nou pou choisir nou malheur ou nou bonheur.

Who am I?

Si ou envi conné exactement ki ou été, ou bizin étudié ou quand ou faire ou besoin. Dans ça l'heure-là ki ou pou conné ki dernier pauvre diable ou été. Si ou garde ça dans ou la tête, ou pou arrêté cause grand-grand causé.

Ilm, 'Oulama et Qiyaamat

D'après hadice de Nabi r, quand Qiyaamat près pou arrivé, Ilm (la connaissance de Deen) pou enlevé et ça pou remplacé par l'ignorance. Le taux de zina pou augmenté. Dimoune pou boire l'alcool boucou.

Ena dimoune croire ki la connaissance pou enlevé quand Qour'aan-e-Kareem so l'écriture pou effacé. Mais en réalité Qour'aan pou reste intacte. C'est necque banne dimoune ki ena la vrai connaissance de Qour'aan ki pas pou resté. Donc quand banne 'Oulama pou enlevé, connaissance de Deen aussi pou enlevé. Et après ça Qiyaamat pou vini.

Ça montré ki l'existence banne 'Oulama lors ça dounia-là li ene bénédiction et ene moyen de hidaayat ki garantie l'existence de connaissance et la pratique de Deen lors ça la terre-là. Li ene erreur capital tourne le dos avec banne 'Oulama couma boucou dimoune dire "ki faire bizin banne 'Oulama quand nou ena Qour'aan et hadice dans nou la caze". Bizin faire bien attention! La connaissance de Deen nou gagné à travers banne Oulama. Sinon nou capave ena Qour'aan et hadice dans nou la main, mais de coté connaissance et la pratique, nou pou zéro.

Acoze ça même nou trouvé ki jamais Allah Ta'ala fine envoye ene livre sans li envoye ene Nabi pou enseigne ça. Par contre, ena des fois Allah Ta'ala fine envoye seulement Nabi sans envoye kit livre avec li. Ça montré ki l'enseignement de Deen fine toujours assuré par banne Nabi et so banne z'héritiers.

Donc tourne le dos avec banne 'Oulama li représente tourne le dos avec Deen.

Hadice

"Etabli ou relation avec celui ki casse relation avec ou. Pardonne celui ki fine faire l'injustice envers ou. Agir bien avec celui ki mal agir avec ou".

Redacteur en chef: Moufti Mouhammad Raffick Meerun
Email: jamiat2009@gmail.com
 

AL-Jamiat V.3 No.3

Statu de la pratique banne Sahaba-e-Kiraam 

Ene kitchose ki Rassouloullah r fine déclaré, appelle li hadice Qawli. Ene kitchose ki Rassouloullah r fine pratiqué, ça nou conne li par hadice Fei'li. Et ene kitchose ki ni li fine pratiqué ni li fine dire mais seulement ça kitchose-là fine traversé divant li et li pas fine désapprouve li, ça aussi appelle li hadice même. Ça genre de hadice-là appelle li hadice Taqreeri.

Coumsa même ceki banne Sahaba-e-Kiraam fine pratiqué après Rassouloullah r aussi, li ena ene statu de hadice même. Au contraire ça forme de hadice-là li pli fort ki lezot parceki c'est la forme appliqué de hadice de Nabi r ki fine être adopté par toute ene génération de Sahaba-e-Kiraam et banne Tabeines. D'ailleurs Nabi r fine donne l'ordre pou suive le principe de banne Khoulafaa-e-Rashideen pareil couma li fine ordonne pou suive so propre sounnat.

Donc ça thèse ki dimoune avancé pou pas accepté trois talaaq couma trois talaaq ou bien 20 rakaats taraweeh lors prétexte ki ça perna dans hadice, c'est ene fausse prétexte parceki ceki banne Sahaba-e-Kiraam fine décidé et fine pratiqué, li ena ene statu de hadice Nabi r dans la forme appliquée.

Si jamais la pratique banne Sahaba-e-Kiraam li paraite en conflit de ceki Nabi r fine dire et faire, alors en realité c'est ene contradiction entre deux hadice: Ene hadice verbale et ene hadice appliquée. Li pas ene contradiction entre hadice et la pratique de banne Sahaba. Dans ene situation pareil, d'après principe, bizin donne priorité ça hadice ki li dans la forme appliquée. C'est à coze ça ki banne 'Oulama fine dire ki trois talaaq ki donné ene seul coup li compte trois même et salaat-ut-Taraweeh c'est 20 rakaat. Et li pas correct pou dire ki ça pas basé lors hadice. C'est ene erreur capital ki boucou pé faire pou induire le public dans l'égarement.

Pen's down

Ou vive ene jour lors la terre ou bien 100 jours; Ou vive ene banané ou bien 100 bananés, finalement ou pou bizin passe par ene étape ki appelle la mort.

La  mort c'est ene vérité ou ene réalité ki tout dimoune accepté indépendamment de zotte tendances ou convictions religieuses. Acoze ça Qour'aan-e-Kareem fine appelle la mort "Al-Yaqeen" ki signifié la certitude.

Ena ene quantité kitchose ki sur et certain mais ena ki dimoune accepté li couma ena ki dimoune pas croire là-dans. Quant à la mort, c'est ene vérité ki tout dimoune croire là-dans. C'est acoze ça li mérite ça nom "Al-Yaqeen" là. Comme si perna aukene kitchose sur et certain apart la mort.

Allah Ta'ala dire dans Qour'aan-e-Kareem ki chaque être vivant ena pou goûte la mort. Ou pas pou capave sauve la mort. Li pou attrape ou sans rendez-vous et sans faire ou conné quand même ou cachiette dans ene forteresse bien renfermée.

Si la mort li ene étape ki tout être vivant bizin traversé, alors ti bizin prend ça étape-là dans ene façon très normal. D'ailleurs ene quantité pé prend li-même comme si ça pas dérange narien dans zotte la vie. Mais la mort li pas ene étape acote tout fini après ça. C'est apartir ça même ki tout commencé. C'est-à-dire interrogatoire dans Qabar ou bien punition dans Qabar etc. li commencé apartir la mort. Donc la mort ki nou considère li comme la fin, en vérité c'est le commencement de tout.

Ça causé ki dire "tanque ena la vie, ena l'espoir" li bien vrai ça parceki tanque ene dimoune li encore vivant, li ena toute chance et toute l'occasion capave améliore so position dans Qabar et dans Aakhirat. Mais couma li mort, li perdi tout ça-là. Couma dire li ti dans la salle l'examen. Le temps ki li ti gagné pou faire l'examen fine terminé et fine annonce "Pen's down". Là pas capave ni ajouté ni retiré. Acoze ça, la mort li ene étape très important et crucial dans la vie ene musulman ki conné li bizin ranne compte pou tout ceki li fine faire dans la vie lors ça la terre-là. Si li fine joine la mort dans ene l'état appréciable, li ena l'espoir ki tout pou passe bien après ça. Au cas contraire, li pou ena ene regret ki jamais pou capave réparé.

La mort li ene moyen ki sépare ou de ou banne bien-aimés. Ça li faire ou quitte ou trône, ou travail, ou famille, ou banne camarades, ou la caze et ou l'auto etc. pou amene ou dans ene longue trajet dans ene ti pé le temps avec quelque mètres la toile blanc lors ou le corps. Tout commence par dormi dans ene fossé de quelques pied de profondeur ki appelle Qabar et couvert avec ene bon couche la terre. Donc la mort li ene signe ki nou la vie lors ça la terre-là li temporaire ki mette fin à tous banne activités lors la terre.

Ene l'amusement ki suive par la détresse li pas ene l'amusement dans le vrai sens du mot. Acoze ça Nabi r fine recommanne nou pou continué pense la mort afin ki ça capave mette ene frein à nou banne désirs injustifiés.

Attention!

Banne ki pé continué vive après 3 talaaq pé vive dans haraam. La vie dans ça le monde-là li pou ene deux jours ça. Sacrifié ou ene tigite même ici pou récolté énormément et éternellement dans Aakhirat.

3 Talaaq en questions/Reponses

Question 1: Dans l'époque Hazrat 'Oumar t, 3 talaaq ti compte ene seul talaaq ou bien 3 talaaq?

Réponse 1: Dans l'époque Hazrat 'Oumar t, 3 talaaq ti compte 3 talaaq même.

Question 2: Dans l'époque Nabi r, 3 talaaq ti compte ene seul talaaq ou bien 3 talaaq?

Réponse 2: Dans l'époque Nabi r aussi, 3 talaaq ti compte 3 talaaq même.

Question 3: Bé ki faire dans ene hadice ki trouve dans Saheeh Mouslim, li dire ki 3 talaaq dans l'époque Nabi r ti compte ene seul talaaq?

Réponse 3: ça 3 talaaq ki ti compte ene seul talaaq auparavant dans l'epoque Nabi r ti applique dans banne cas spécifique cote ene dimoune dire so madame talaaq, talaaq, talaaq. C'est-à-dire li prononce le mot talaaq 3 fois avec l'intention pou zisse mette l'emphase. Pas avec l'intention pou donne 3 talaaq. Ça pas ti appliqué pou ene dimoune ki dire ça avec l'intention pou donne so madame 3 talaaq.

Astere pou conne en vérité ki ça fine donné avec l'intention pou donne 3 talaaq ou bien avec l'intention pou mette l'emphase, ça li dépanne lors dimoune-là même so dire.

Auparavant banne dimoune ti honnête. Acoze ça quand dimoune ti pé dire ki li fine dire ça avec l'intention pou mette l'emphase, alors ti pé accepté li. Mais quand Hazrat 'Oumar t fine constaté ki mentalité dimoune pé changé et de plus en plus pé dégénéré, alors li fine passe la loi ki si ene dimoune dire talaaq, talaaq, talaaq, alors li pou compte 3 talaaq même. Li pas pou guette l'intention dimoune-là.

Question 4: Eski ça signifié si ene dimoune prononce le mot "TROIS" quand li donne talaaq, tous les trois porté?

Réponse 4: Exactement. Si ene dimoune dire so madame "Mo fine donne toi to 3 talaaq", alors 3 talaaq même pou compté parceki quand li fine dire le mot trois, ça pas capave signifié dans aukene façon, ki li fine dire ça pou mette l'emphase. Li ena ene sens précis et catégorique ki pas capave être interprété autrement. Donc ça façon donne talaaq-là fine compte 3 talaaq même tous le temps. Dans l'époque Nabi r aussi, ça ti compte 3 talaaq même. Jamais ça façon donne talaaq-là ti compte ene seul talaaq.

Question 5: Zordi jour si ene dimoune dire so madame talaaq, talaaq, talaaq, alors combien talaaq li pou compté?

Réponse 5: Li pou compte 3 talaq même. D'ailleurs zordi jour, en général tout dimoune prononce le mot talaaq 3 fois avec l'intention pou donne 3 talaaq même. Et ça c'est ene décision ki fine prend dans l'époque Hazrat 'Oumar t par Hazrat 'Oumar t en présence banne Sahaba-e-Kiraam sans être contesté par kikene. Si jamais ça décision-là ti ene décision ki pas corresponne avec Shariah et l'enseignement de Nabi r, banne Sahaba pas ti pou reste tranquille. Continué pretanne 3 talaaq comme ene seul talaaq li ene coup dure lors l'intégrité et l'honnêteté de jamaat de Sahaba-e-Kiraam ki capave seulement émane de la part de ene ki pas Sunni couma banne Rafzi ou bien banne Shia.

Question 6: Si ene dimoune continué vive avec so madame après ki li fine donne li 3 talaaq, ki so position d'après Shariah?

Réponse 6: Li ene fassiq (pécheur endurci). Li pé vive dans haraam. Li ene personne ki pas capave fréquente li. Bizin pas accepté so l'invitation et ni invite li. Bizin ena ene boycottage complète avec ça qualité dimoune-là.

Question 7: Ki position ene dimoune ki donne fatwa ki 3 talaaq li compte ene seul talaaq?

Réponse 7: C'est ene personne ki fine perdi la vrai direction parceki li fine isole li avec l'ijma de banne Sahaba-e-Kiraam et de As-Sawaad Al-A'zam. Rassouloullah r fine dire:

"Suive As-Sawaad Al-A'zam (la grande majorité) parceki celui ki fine retire li ene coté, li pou être jeté dans l'enfer."

Hazrat 'Oumar t, Hazrat Usmaan t, Hazrat Ali t, Hazrat Abdullah Bin Mas'oud t, banne Sahaba-e-Kiraam en general, banne Tabeines et les 4 Imams, zotte tous dire ki 3 talaaq ki fine donné dans ene seul coup, li compte 3.

Après 3 talaaq, pas capave reste ensemble. Donne fatwa ki 3 talaaq li compte ene seul, en réalité li ene certificat pou vive dans haraam. Ene dimoune normal pas capave retire li de la grande majorité et néglige banne preuves clair, explicite et évident pou attrape ene deux ti boute texte ambigu.

Du feu l'enfer

Du feu l'enfer li 70 fois pli intense ki du feu dans dounia. Dimoune ki pou gagne ene punition pli faible et pli léger, c'est ene dimoune ki pou gagne pou mette ene soulier ki faire avec du feu. So la cervelle pou bouille avec so chaleur. Acoze ça nou bizin toujours dimane protection Allah Ta'ala contre so punition et contre du feu l'enfer.

L'enfer li ene manifestation de la colère Allah Ta'ala. Allah Ta'ala li en colère avec so serviteur ki pas obéir li. Donc nou bizin faire zeffort vive dans l'obéissance Allah Ta'ala. Si jamais nou arrivé faire kit erreur, faudré pas nou reste lors la même. Nou bizin repentir de ça erreur ki nou fine faire-là et dimane Allah Ta'ala pardon au pli vite possible.

Souvent dimoune cause ene qualité causé ki donne l'impression ki li pas peur punition Allah Ta'ala. Nou bizin faire bien attention parceki pas peur punition Allah Ta'ala c'est Kufr.

Allah

Allah c'est ça nom par ki nou conne le Créateur Suprême. Le Créateur Suprême fine présente li par ça même nom dans Qour'aan-e-Kareem. Acoze ça Allah c'est le "Ismuzzaat" du Créateur Suprême. "Ismuzzaat" li couma dire ene nom propre. Donc "Allah" c'est le nom propre du Créateur Suprême.

La majorité banne 'Oulama zotte considère ça même nom comme le pli grand nom pou le Créateur Suprême parceki ça nom-là li tellement vaste de par so sens ki li renferme tous banne attributs ki li possédé.

Hazrat Sheikh Abdul Qadir Jeelani (R) dire: "Le nom Allah c'est le Ismul-A'zam". Mais ena ene façon prend ça nom-là afin ki li capave faire so vrai l'effet. Selon Sheikh Abdul Qadir Jeelani (R), bizin dévide le cœur avec tous banne pensées étrangères et pense seulement Allah quand pé prend ça nom-là. A ce moment-là pou trouve so vrai l'effet.

Li pas difficile pou arrive dans ça stage-là. Mais li pas aussi facile et simple ki capave être inculqué dans ene deux jours. Tous kitchose vine facile avec pratique pendant quelque jours ou ene bon boute le temps. Gagne Allah Ta'ala dans le cœur li pas ene ti zaffaire. C'est ene kitchose vraiment inestimable. Si ça prend nou ene longue la vie aussi, li encore bien bon marché ki sans grâce Allah Ta'ala pas ti pou capave gagne li. Donc laisse nou essaye faire li et récite li cent-cent fois gramatin et tantôt tous les jours dans la façon ki fine expliqué. Insha-Allah nou pou trouve so l'effet.

Zikrullah 

Ene personne fine dimane Rassouloullah r pou montré li ene pratique ki li capave attrape li bien fort. En réponse Nabi r fine dire li:

"Laisse to la langue trempé dans Allah so zikr".

Laisse la langue trempé dans zikrullah signifié reste faire zikr continuellement. D'après ça hadice-là, nou comprend ki faire zikr avec la langue li pas moins essentiel, même si faire zikr avec le cœur li pli essentiel. D'après ene hadice ki trouve dans Ibn Majah et An-Nisaa-ï, Rassouloullah r fine qualifié لا اله الا الله de meilleur zikr. Donc li pou ene pratique très très louable si ene dimoune li faire ça zikr-là continuellement. Ça li pou ene moyen pou renforci so Imaan, illumine so le cœur et faire li gagne la volonté pou reste toujours dans l'obéissance Allah Ta'ala.

Dans le but pou facilite la tache, mette ene target de 40 jours par exemple. Dans ça l'intervalle-là, faire le maximum zeffort pou préserve regard, la bouche et zoreille. Et apart ça, laisse la langue reste engagé dans faire zikr لا اله الا الله. Lors chaque 7 ou 8 fois, ajoute محمد رسول الله صلى الله تعالى عليه وسلم.

Dans commencement, li possible ki ou pou blié-blié li mais pas bizin découragé. A chaque fois ki ou rappelle li, ou recommence faire li. Dans ene morceau jour, Insha-Allah ou pou remarqué ki ça blié-blié là pé diminué et zikr so fréquence pé augmenté.

Shaitaan li reste dans ene le cœur ki fine noirci par manque de zikrullah. Quand la lumière et Noor rente dans le cœur par faire zikrullah boucou, shaitaan li nepli ena le control ki li ti ena auparavant. Donc faire zikrullah boucou, c'est ene moyen très efficace pou être libéré de l'emprise de shaitaan.

Selon ene hadice ki trouve dans Mousnad Ahmad et Tabraani, Rassouloullah r fine recommanne nou pou renouvelé Imaan par dire لا اله الا الله boucou. Le mot "renouvelé" montré ki Imaan li ene kitchose ki li abîmé et affaibli par manque de zikrullah. Donc d'après ça recommandation-là, لا اله الا الله li ene moyen pou remette Imaan à l'état neuf. C'est ene façon pou entretenir et faire servicing de la machinerie de Imaan. Donc faire zikr avec لا اله الا الله abondamment li ene garantie dans ene certaine sens pou quitte ça le monde-là avec Imaan. Quand ene dimoune quitte ça dounia-là en état de Imaan, ça c'est le vrai succès et le succès total. Donc faire zikrullah abondamment et surtout lire لا اله الا الله boucou li résoudre plus grand problème de l'humanité et honore li par le plus grand succès.

Sourat-ul-Kahf

Ça sourah-là li relate nou trois l'événement très importants ki fine arrivé auparavant:

1. Zistoire ene groupe de jeunes ki ti alle cachiette dans ene Kahf (la cave) pou sauve zotte Deen et zotte Imaan. Par ça rapport-là fine appelle li sourah Al-Kahf.
2. Zistoire Hazrat Moossa u quand li ti gagne l'ordre pou alle joine Hazrat Khidr u.
3. Zistoire Zul Qarnain ki ti voyagé et ti faire tourné entier le monde.

Ça sourah-là ti révélé pou repone banne questions ki banne kaafir et banne moushrik de Makkah ti pose nou Nabi r lors conseille banne juifs de Madinah. C'était dans le but pou testé si Hazrat Mouhammad r li ene Nabi. Quand banne-là ti pose question, nou Nabi r ti promette zotte pou réponne zotte le lendemain lors l'espoir ki li pou gagne révélation. Mais dans ça promesse-là, Nabi r pas ti dire INSHA-ALLAH. Alors le lendemain pas fine ena aukene révélation. C'est necque après 15 jours ki wahi fine dessane. Rassouloullah r fine gagne conseil pou dire toujours INSHA-ALLAH concernant ene kitchose ki li ena l'intention faire dans l'avenir.

Ena banne bienfaits énormes dans récite sourah Al-Kahf partiellement ou intégralement. D'après ene hadice rapporté par Hazrat Abou Dardah t ki trouve dans Sahih Mouslim, Rassouloullah r fine dire ki celui ki apprane les 10 premiers verset de sourah Al-Kahf, li pou être protégé de Dajjaal. D'après ene l'autre hadice, Rassouloullah r fine dire ki celui ki récite le commencement et la fin de sourah Al-Kahf, li pou ena ene Noor (lumière) ki pou couvert li depi so lipied ziska so la tête. Et celui ki récite li complètement, li pou ena ene Noor depi la terre ziska le ciel.

D'après ene hadice ki trouve dans Al-Moustadrak de Al-Haakim, li recommandé pou récite ça sourah-là tous les Jum'ah. Selon ça hadice-là, celui ki récite li le jour de jum'ah, li pou ena ene Noor ki pou éclairé devant li ziska l'autre Jum'ah.

Ene commentaire anti Sunnah ?

“Pour qui ene dimoune faire 12 jours swalaat avec ene seule wudu, sa veut dire qui pendant sa 12 jours-la li pas fine uriné, ni li fine alle laselle ni l’air fine sorti de li et ni li fine dormi …..”

Ça c’est ene commentaire ki kikene fine faire pou contesté ene anecdote ki trouve dans Fazail-e-Namaz de Hazrat Sheikh Zakariyyah (R). Selon ça anecdote-là, ene personne ti faire tous namaz avec ene seul wazou pendant 12 jours.

Ça commentaire-là li paraite ki pas ene Sunni ki fine faire ça. Parceki d’après conception Ahlus-Sunnah Wal Jama’ah, karaamat de Aulia-Allah li Haqq (vrai). Ça kitchose ki fine arrivé-là, fine arrive li par karaamat. Et c’est Allah Ta’ala ki faire karaamat paraite à travers kikene ki li oulé. Refuse accepté banne karaamat pareil, li ene façon pou contesté pouvoir et capacité Allah Ta'ala parceki narien pas impossible pou Allah Ta’ala. Ça Allah Ta’ala ki fine mette système pou uriné, alle la selle, mangé boire dormi etc., li ena capacité change ça système-là pou kikene ki li oulé. Ça Allah ki capave garde Hazrat Yunus u sain et sauf pendant 40 jours dans vente poisson, ena capacité garde so serviteur sans mangé boire et sans dormi pendant 12 jours. Pou ene non-Sunni ki pas croire dans karaamat, ça li paraite étonnant mais pou ene Sunni, perna narien de impossible là-dans. Li paraite ki c'est ene personne ki bien pauvre et faible dans so l'étude de Qour'aan et hadice. Li paraite ki so analyse li basé lors ene source ki pas Islamique. Allaamah Ibn Taimiyah (R) dire dans so الفرقان :

وكان ابراهيم التيمى يقيم الشهر والشهرين لا ياكل شيئا

Traduction :- "Ibrahim Bin Taimi ti pé reste sans mange narien pendant ene mois deux mois." (Al-Furqaan)

Colère 

Quand ene dimoune en colère, shaitaan joué avec li couma banne zenfants joué avec boule".

(Imam Al-Ghazali R)

N.B:- Ça li appliqué pou ene colère injustifiée. C'est à dire quand ene dimoune li en colère pou so propre l'intérêt. Mais si ene dimoune li en colère acoze Deen, ça pas appliqué parceki ça qualité colère-là li ene signe de Imaan parfait. Rassouloullah SAW fine dire dans ene hadice:

الحب فى الله والبغض فى الله

L'amitié ou dégoût, ça li bizin pou la cause Allah Ta'ala.

Mais ena des fois li difficile pou distingué ki ça colère-là li pou Deen ou bien pou so l'intérêt personnel. Acoze ça li bon si reste en contact permanent avec ene Sheikh Kaamil (guide spirituel) et informe li de nou l'état d'esprit de temps à autres. Li capave aide nou pou vérifié et détecté ça.

Redacteur en chef: Moufti Mouhammad Raffick Meerun
Email: jamiat2009@gmail.com